Ny Fyll Tregeredhow Duw

1My yw an gour re welas galar

yn-dann vagel y sorr;

2Ev re'm hembronkas ha gul dhymm mos

yn tewlder a-der golow;

3Yn hwir, ev a dreyl y leuv er ow fynn

arta oll an jydh.

4Ev a wrug dhe'm kig ha'm kneus bos spenys,

ev a dorras ow eskern.

5Ev re dhrehevis er ow fynn ha settya a-dro dhymm

hwerowder hag anken.

6Ev re wrug dhymm triga yn tylleryow tewl,

kepar ha'n dus varow nans yw pell.

7Ev re'm keas ma na allav skapya,

ev a'm beghyas gans kargharow poes.

8Ynwedh pan griav ‘Harow!’

ev a dhege yn-mes ow fysadow.

9Ev re geas ow fordhow gans meyn treghys,

ha kamma ow hynsyow.

10Kepar hag ors ow kontrewaytya yth yw dhymm,

kepar ha lew yn kudhvaow.

11Ev re dreylyas ow fordhow a-denewen hag ow skethenna;

hag ow gasa forsakys.

12Ev re blegyas y warak, hag ow settya

dhe vos kostenn dhe'n seth.

13Ev re wanas ow lonethi

gans mebyon goen y sethow.

14Re beuv ges dhe oll ow fobel,

aga skorngan oll an jydh.

15Ev re'm lenwis a erbys hwerow,

ha'm medhwi a fuelenn.

16Ev re vrewis ow dyns gans growynn,

hag ow maga gans lusu.

17Ty re bellhas ow enev dhiworth kres,

ny berthis kov a sewena.

18Yn-medhav, ‘Gyllys dhe goll yw ow splannder,

ha'm govenek dhiworth an Arloedh.’

19Kovha ow galar, ha'm diannetter,

an fuelenn ha'n vystel.

20Ow enev a berth kov yn ta

ha plegya dhe'n dor a-berth ynnov.

21My a dhre hemma dhe'm kolonn –

rakhenna yma dhymm govenek.

22Yn hwir, ny fyll tregeredhow an Arloedh,

ha nyns yw y druedhow gorfennys.

23Nowydhhes vydhons pub myttin,

bras yw dha lelder.

24‘Ow rann yw an Arloedh’, yn-medh ow enev,

‘rakhenna govenek a'm beus ynno.’

25Da yw an Arloedh dhe seul a'n worto,

dhe'n enev a'n hwillo.

26Da yw, pan wortir yn tawesek

selwyans an Arloedh.

27Da yw, gour dhe berthi

an yew yn y yowynkses.

28Bedhes owth esedha y honan, tawesek,

rag Duw re'n beghyas warnodho,

29ha gorres ev y anow bys y'n doust,

mar pydh hwath govenek,

30ha res ev an vogh dhe neb a'n gwasko,

ha bedhes lenwys a dhespit.

31Rag ny wra an Arloedh

skonya bys vykken.

32Kyn hwra grev, byttegyns ev a gemmer truedh

herwydh braster y dregeredh;

33rag ny vynn a'y golonn plagya

na grevya mab-den.

34Pan vydh brewys yn-dann droes

oll prisnoryon an tir,

35pan vydh treylys a-denewen gwirvreus gour

a-wel dhe'n Ughella,

36pan vydh domhwelys neb den yn y gen,

ny vydh da gans an Arloedh.

37Piw a yll gorhemmynn hag y fydh gwrys,

mar ny'n ordenas an Arloedh?

38A nyns yw yn-mes a anow an Ughella

y teu drog ha da?

39Prag y krodhvol den bew,

gour, war gessydhyans y beghes?

40Hwithryn ni orth agan fordhow ha'ga studhya,

ha dehweles arta dhe'n Arloedh.

41Drehevyn ni agan kolonn ha'gan diwleuv

dhe Dhuw y'n nevow.

42Ni re gammdremenas ha rebellya;

mes ty, ny wrussys gava.

43Ty re omwiskas gans kudhlenn sorr, ha'gan helghya;

ty re ladhas heb piteth.

44Ty re omwiskas gans kommolenn,

ma na dremen pysadow vyth.

45Ty re wrussys dhyn bos lastedhes ha skubyon

yn mysk an poblow.

46Oll agan eskerens

re igoras aga ganow er agan pynn.

47Euth ha'n pytt re beu dhyn,

diswrians ha terroes.

48Goverow a dhowr a dhever yn-nans dhiworth ow lagas

drefenn terroes myrgh ow fobel.

49Ow lagas a dhiver ha ny hedh,

heb powes,

50bys pan wra an Arloedh mires war-woeles,

ha gweles dhiworth an nevow.

51Ow lagas a re galar dhe'm enev

drefenn oll myrghes ow sita.

52Ow helghya yn tynn kepar hag edhen

re wrug ow eskerens heb acheson.

53I a dhegeas ow bewnans yn pytt

hag ow labydha.3:53 hag ow labydha: Po ha'y geas gans men,

54Dowr a resas war ow fenn;

‘Gyllys dhe goll ov vy’, yn-medhav.

55My a grias war dha hanow, A Arloedh,

dhiworth downder an pytt.

56Klewes ow lev a wrussys, ‘Na dhege dha skovarn

dhiworth ow hanasenn, dhiworth ow kri.’

57Ty a dheuth nes y'n jydh mayth elwis warnas,

‘Na borth own’, yn-medhydh.

58Ty re bledyas, A Arloedh, kenyow ow enev,

ty re dhasprenas ow bewnans.

59Ty re welas, A Arloedh, an drogvreus er ow fynn;

gwra breusi ow hen.

60Ty re welas oll aga venjans,

oll aga thebel-dowlow er ow fynn.

61Ty re glewas oll aga despit, A Arloedh,

oll aga thowlow er ow fynn,

62diwweus ow eskerens, ha'ga krodhvolyow

warnav oll an jydh.

63Mir orta: owth esedh hag ow sevel,

yth ov vy aga skorngan.

64Attal dhedha aga gwrians A Arloedh

herwydh ober aga diwleuv.

65Diskwedh dhedha divethter dha golonn,3:65 Diskwedh dhedha divethter dha golonn: Po Doro dhedha kaletter an golonn.

re bo dha volleth warnedha.

66Gwra aga helghya ha'ga distrui y'th sorr

a-dhann nevow an Arloedh.