Ankenyow Pobel Yerusalem

1Ass yw an owr tewlhes,

ass yw treylys an owr pur!

Meyn an sentri yw skattrys

orth penn pub stret.

2Mebyon dhrudh Sion, talvedhys kepar hag owr fin –

Ass yns i akontys kepar ha sethow pri,

ober diwla priweythor!

3Ynwedh owrgeun a ri aga bronn

ha gasa aga helyn dhe sugna,

mes myrgh ow fobel yw gyllys fell

kepar ha strusyow y'n difeythtir.

4Taves an baban ow tena

a len orth y stevnik gans syghes,

fleghigyow a bys bara,

nyns eus neb a'n re dhedha.

5Myns a'n jevo sandow denti seuladhydh

a dhe goll y'n stretys,

myns a veu meythrys war goghlin

a len orth teylegi.

6Brassa yw kessydhyans myrgh ow fobel

ages an kessydhyans rag pegh Sodom,

a veu domhwelys yn unn lamm,

kyn na veu leuv vyth gorrys warnedhi.

7Glanna o hy nazirysi ages an ergh,

kanna ages leth,

ruttha aga horf ages koral,

aga fisment kepar ha saffir.

8Lemmyn moy du yw aga fas ages hylgedh,

nyns yns i aswonnys y'n stretys.

Aga kroghen a len orth aga eskern,

ha gwedhrys yw kepar ha prenn.

9Gwynnvys an re yw ledhys gans an kledha

drefenn fowt askorr an gwel.

10Diwla benynes truedhek

re vrojyas aga fleghes aga honan,

gyllys yns i yn boes dhedha

yn terroes myrgh ow fobel.

11An Arloedh re gowlwrug y sorr,

ha dyllo y sorr fers,

hag enowi tan yn Sion

a dhevoryas hy selyow.

12Ny wrug myghternedh an nor krysi,

na trigoryon vyth a'n norvys

y to eskar hag envi

bys yn porthow Yerusalem.

13Y feu rag pegh hy frofoesi,

drefenn kammwriansow hy oferysi

hag a skoell goes an dus wiryon

a-berth ynni.

14I a wandras dall y'n stretys,

mostys vons gans goes

bys ma na allas denvyth

tochya aga dillas.

15‘Dhe-ves! Avlan!’ a veu kriys warnedha.

‘Dhe-ves! Dhe-ves! Na dochyewgh!’

Ytho i a fias dhe'n fo ha gwandra.

Y leverys y'n kenedhlow,

‘Na wrens i triga omma namoy.’

16Fas an Arloedh re wrug aga skattra,

ny vir orta namoy,

ny enorsons fasow oferysi,

ny faversons henavogyon.

17Hwath agan dewlagas a fyllis,

ow kortos difres yn euver;

yn agan goelva ni a woelyas

rag kenedhel na allas sawya.

18I a holyas war agan lergh

bys ma na yllyn kerdhes yn agan stretys;

yth esa agan diwedh ow tos nes, kowlwrys veu agan dydhyow,

rag agan diwedh re dhothya.

19Skaffa veu agan helghysi

ages eryon an nevow;

war an menydhyow i a'gan chasyas,

y'n difeythtir i a'gan kontrewaytyas.

20Untys an Arloedh, anall agan dewfrik,

a veu kechys yn aga antylli,

may leversyn anodho ‘Yn-dann y skeus

y fewyn ni yn mysk an kenedhlow.’

21Lowenha ha bydh heudhik, A vyrgh Edom,

neb a drig yn pow Us,

ynwedh dhiso jy tremena a wra an hanaf.

Medhwys vydhydh, ha ty a lommha dha honan.

22Kowlwrys yw kessydhyans dha sherewneth, a vyrgh Sion,

ny wra ev dha witha yn divroedh na fella;

ev re wrug dha gessydhya drefenn dha sherewneth, a vyrgh Edom,

ha diskudha dha beghosow.