1Porth kov, A Arloedh, a'n pyth re goedhas dhyn;

mir ha gweles agan meth.

2Agan ertach re beu treylys dhe estrenyon,

agan chiow dhe alyons.

3Omdhivasow re beun heb tas;

agan mammow yw kepar ha gwedhwesow.

4Ni re evas agan dowr a bris arghans;

agan keunys a dheu dre varghadoryon.

5An yew war agan konna yw poes warnan;5:5 An yew war agan konna yw poes warnan: Amendys.

ni a lavur, nyns eus dhyn powes vyth.

6Dhe Ejyp ni a ros leuv,

ha dhe Assyria, rag kavoes bara lowr.

7Agan tasow re beghas, ny vewons hwath;

ni re beu beghys gans aga drogoberow.

8Kethyon a'gan rewl;

nyns eus neb a'gan delirv dhiworth aga dorn.

9Ni a gyv agan bara yn peryll a'gan bewnans,

drefenn an kledha y'n difeythtir.

10Agan kroghen yw poeth kepar ha forn

drefenn poethvann divoetter.

11Benynes yw defolys yn Sion,

gwyrghesow yn sitys Yuda.

12Pennsevigyon yw kregys der aga diwla;

nyns yw fasow henavogyon enorys.

13Gwer yowynk yw konstrynys dhe'n melinyow,

ha mebyon a drebuch yn-dann veghyow keunys.

14Tus koth re asas an porth,

tus yowynk aga menestrouthi.

15Difygys yw joy agan kolonn;

treylys dhe gynvann yw agan karoli.

16Koedhys yw an gurun dhiworth agan penn;

go-ni, rag ni re beghas!

17Rakhenna devedhys ha bos klav yw agan kolonn,

rakhenna tewlhes yw agan dewlagas,

18rag menydh Sion, hag yw ynyal;

owrgeun a gerdh warnodho.

19Ty, A Arloedh, a dhur bys vykken;

dha se a bes a henedh dhe henedh.

20Prag y hwre'ta agan ankevi bys vykken,

agan forsakya pub dydh oll?

21Gwra agan restorya dhis, A Arloedh, may tehwellyn;

nowydhha agan dydhyow kepar dell vons seuladhydh –

22po a wruss'ta devri agan denagha yn tien?

A wruss'ta serri orthyn dres musur?