Boesow Glan hag Avlan

1An Arloedh a gewsis orth Moyses hag Aron, ow leverel dhedha, 2Kewsewgh orth mebyon Ysrael, ow leverel: An re ma yw an kreaturs a wrewgh hwi aga dybri yn mysk oll an bestes war an nor: 3pypynag yw folsys y garn hag a dhaskni, yn mysk an bestes, henna hwi a dheber. 4Byttegyns ny dhebrowgh an re ma a'n re a dhaskni, po a's teves folsys aga harn: an kowrvargh rag ev a dhaskni mes nyns yw folsys y garn; avlan dhywgh yw ev. 5Ha'n konin, rag ev a dhaskni mes nyns eus karn folsys dhodho. Avlan dhywgh yw ev. 6Ha'n skovarnek rag ev a dhaskni mes nyns eus karn folsys dhodho; avlan dhywgh yw ev. 7Ha'n mogh, kynth eus karn folsys dhodho, ny dhaskni; avlan dhywgh yw ev. 8Ny wrewgh hwi dybri aga hig, na tochya aga horf; avlan dhywgh yns i.

9An re ma hwi a dheber, a bup-tra eus y'n dowrow, pypynag a'n jeffo eskelli-pysk po skans, y'n dowrow, y'n moryow hag yn avonyow. Hwi a dheber an re ma. 10Hag oll an re nag eus dhedha nag eskelli-pysk na skans y'n moryow hag y'n avonyow, pypynag a hes y'n dowrow, ha pup-tra bew y'n dowrow: pyth kasadow yns dhywgh. 11I a vydh pyth kasadow dhywgh; ny wrewgh hwi dybri a'ga hig, ha hwi a syns aga horfow dhe vos pyth kasadow. 12Pypynag na'n jeffo eskelli-pysk na skans y'n dowrow, henn yw pyth kasadow dhywgh.

13Ha'n re ma a vydh pyth kasadow dhywgh yn mysk an ydhyn. Ny vydhons dybrys; pyth kasadow yns i: an er, an vultur barvus hag er an mor, 14an skowl rudh, ha'n skowles du a bub eghenn, 15pub marghvran a bub eghenn, 16an strus, hok an nos, an woelann, ha falghunes a bub eghenn, 17an oula byghan, an vorvran, ha'n ibis, 18an oula kornek, oula an difeythtir, ha'n vultur, 19an hwibon, kerghydhyon a bub eghenn, an houpou, ha'n ughsommys.

20Pup-tra owth hesya hag ow nija hag a bedrevan war beswar troes yw pyth kasadow dhywgh. 21Byttegyns, hwi a yll dybri pup-tra owth hesya hag ow nija hag a bedrevan war beswar troes, a's teves garrow a-ugh hy threys may hyll lemmel war an dor. 22A'n re ma, hwi a yll dybri: an lokust a bub eghenn, ha'n lokust blogh a bub eghenn, ha'n gryll a bub eghenn, ha'n kulyek-reden a bub eghenn. 23Mes pup-tra arall owth hesya hag ow nija hag a bedrevan, ha dhodho peswar troes, yw pyth kasadow dhywgh.

24Ha der an re ma hwi a vydh avlan: neb a docchyo korf onan anedha a vydh avlan bys y'n gorthugher. 25Ha nebonan a dhokko korf onan anedha a wra golghi y dhillas ha bos avlan bys y'n gorthugher. 26Korf pub best mayth yw rynnys y garn, mes nag yw y garn folsys yn tien, ha na dhaskni, yw avlan dhywgh. Pubonan a'n toch a vydh avlan. 27Ha pypynag a gertho war y bawyow, yn mysk pub best a gerdh war beswar troes, avlan yns dhywgh. Piwpynag a docchyo aga horf a vydh avlan bys y'n gorthugher. 28Ha neb a dhokko an korf anedha a wolgh y dhillas ha bos avlan bys y'n gorthugher. Avlan yns dhywgh.

29An re ma yw avlan dhywgh hwi yn mysk kreaturs owth hesya, a hes war an dor: an wodh, ha'n logosenn ha'n bedresyf veur a bub eghenn, 30ha'n gekko ha'n bedresyf vrygh, ha'n bedrevan, ha'n bedrevan dewes ha'n kameleon. 31Avlan dhywgh yw an re ma yn mysk oll an re a hes; piwpynag a's tocchyo hag i marow a vydh avlan bys y'n gorthugher. 32Ha pypynag may koedh nebonan anedha warnodho hag ev marow, a vydh avlan, kyn fo lester prenn, po dillas po kneus po sagh. Py lester pynag a vo mayth yw ober gwrys ynno a dal bos gorrys yn dowr hag y fydh avlan bys y'n gorthugher. Ena y fydh glan. 33Ha pub lester a bri may koedh ynno neppyth anedha, a vydh avlan. Pypynag a vo ynno a vydh avlan, ha hwi a'n terr. 34Pub boes a yll bos dybrys, ha warnodho dowr avlan a goedh a vydh avlan, ha pub lin a vo evys dhiworth lester a'n par ma a vydh avlan. 35Ha pup-tra, koedhys warnedhi aga horfow, a vydh avlan, forn po fornigell kyn fo. Hi a vydh terrys, rag avlan yw, hag avlan vydh dhywgh. 36Byttegyns, fenten po puth mayth yw dowr kreunys ynno a vydh glan, mes an pyth a doch aga horfow a vydh avlan. 37Ha mar koedh rann a'ga horfow war has dhe vos hesys, glan yw; 38mes mar pydh dowr gorrys war an has ha mar koedh rann a'ga horf warnodho, avlan yw dhywgh.

39Ha mar merow neb best a yllowgh dybri, neb a dheppro rann a'y gorf a vydh avlan bys y'n gorthugher. 40Ha neb a dheppro an korf a wolgh y dhillas ha bos avlan bys y'n gorthugher; ha neb a dhokko y gorf a wolgh y dhillas ha bos avlan bys y'n gorthugher.

41Ha pub kreatur a hes war an dor yw pyth kasadow. Ny vydh dybrys. 42Pypynag a wayo a-dro war y dorr, ha pypynag a wayo war beswar troes po mayth eus dhodho treys pals, oll an kreaturs a hes war an dor: ny wrewgh hwi dybri an re ma, rag pyth kasadow yns i. 43Ny wrewgh hwi agas honan dhe vos pyth kasadow gans kreatur vyth a hes; na ny wrewgh hwi agas honan avlan gansa, ma na vowgh hwi defolys dredha. 44Rag my yw an Arloedh agas Duw. Ytho omsanshewgh, ha bedhewgh sans, rag sans ov vy. Ny wrewgh hwi omdhefola gans kreatur vytholl a hes, ow kreupya war an dor. 45Rag my yw an Arloedh a'gas dros yn-mes a bow Ejyp, dhe vos agas Duw; ytho bedhewgh sans, rag sans ov vy.

46Hemm yw lagha an bestes ha'n ydhyn ha pub kreatur bew a wayo y'n dowrow ha pub kreatur a hes war an dor, 47dhe dhissernya ynter an avlan ha'n glan, hag ynter an kreatur a yll bos dybrys ha'n kreatur na yll bos dybrys.