Purheans wosa Gwelivos

1An Arloedh a gewsis orth Moyses, ow leverel: 2Kows orth mebyon Ysrael, ow leverel: Mar kwra benyn konsevya has ha dineythi flogh gorow, hi a vydh avlan seyth dydh; kepar hag yn dydhyow hy amseryow misyek y fydh hi avlan. 3Hag y'n ethves dydh y fydh trodreghys kig y gudhgenn. 4Ha hi a wra pesya trydhek dydh warn ugens yn goes hy glanheans. Ny doch hi travyth sans na dos a-berth y'n sentri erna vo kowlwrys dydhyow hy glanheans. 5Mes mar kwra hi dineythi flogh benow, avlan vydh diw seythun kepar hag yn hy amseryow misyek, ha hi a bes hwegh dydh ha tri-ugens yn goes hy glanheans.

6Ha pan vo kowlwrys dydhyow hy glanheans rag mab po rag myrgh, hi a dhre oen unn bloedh rag offrynn leskys, ha kolomm yowynk po turenn rag offrynn pegh bys yn daras tylda an kuntelles, dhe'n oferyas. 7Ev a's offrynn dherag an Arloedh ha gul dehwelyans rygdhi, ha hi a vydh glanhes a fenten hy goes. Hemm yw an lagha rygdhi hi neb re dhineythis gorreydh po benynreydh. 8Ha mar nyns eus yn hy leuv pygans lowr rag oen, hi a dhre diw durenn po diw golomm yowynk, an eyl rag offrynn leskys ha'y ben rag offrynn pegh, ha'n oferyas a wra dehwelyans rygdhi, ha hi a vydh glan.