Lovryjyon

1An Arloedh a gewsis orth Moyses hag Aron, ow leverel, 2Pan eus dhe dhen bothenn po krammenn po namm gwynn war gneus y gig, kepar ha'n pla a lovryjyon, ev a vydh dres dhe Aron an oferyas po dhe onan a'y vebyon, an oferysi, 3ha'n oferyas a hwither an dises war gneus an kig; ha mars yw gyllys gwynn an blew y'n pla, ha mar kyllir gweles bos an pla downa es kneus an kig, pla lovryjyon yw, ha'n oferyas a'n hwither ha desta y vos avlan. 4Mars yw an namm yn kneus y gig gwynn ha mar kyllir gweles nag yw downa es an kneus, ha nyns yw an blew gyllys gwynn, keas a wra an oferyas an den plagys seyth dydh, 5ha'n seythves dydh an oferyas a'n hwither, ha mar kwel an pla dhe vos heb chanj, ha nag yw an pla omlesys y'n kneus, an oferyas a'n ke seyth dydh moy; 6Ha'n oferyas a'n hwither arta an seythves dydh, ha mars yw gyllys tewal an pla, ha ny wrug an pla lesa y'n kig, an oferyas a dhest y vos glan. Nyns yw marnas krammenn, hag ev a wolgh y dhillas ha bos glan. 7Mes mar omles an grammenn y'n kneus wosa y vos gwelys gans an oferyas rag y lanheans, ev a vydh gwelys arta gans an oferyas. 8An oferyas a'n hwither, ha mars yw an grammenn lesys y'n kneus, an oferyas a dhest y vos avlan. Lovryjyon yw.

9Pan eus pla lovryjyon yn den, ev a vydh dres dhe'n oferyas, 10Ha'n oferyas a'n hwither, ha mars yw bothenn wynn y'n kneus, a janjyas an blew dhe wynn, ha mars eus kig bew y'n vothenn, 11lovryjyon koth yw yn kneus y gig, ha'n oferyas a dhest y vos avlan, ha ny wra ev y geas, rag avlan yw. 12Ha mar omles an lovryjyon y'n kneus ha gorheri yn tien kneus an den plagys, a'y benn bys yn y droes, plepynag may firro an oferyas, 13an oferyas a hwither, ha mar kwrug an lovryjyon kudha oll y gig, ev a dhest an den gans an pla dhe vos glan; oll yw chanjys dhe wynn. Glan yw. 14Mes pan omdhiskwa kig bew, ev a vydh avlan. 15Ha'n oferyas a hwither an kig bew ha desta ev dhe vos avlan. Avlan yw an kig heb kneus. Lovryjyon yw. 16Mar treyl an kig bew arta ha chanjya dhe wynn, ev a dheu arta dhe'n oferyas, 17ha'n oferyas a'n hwither, ha mars yw an pla chanjys dhe wynn, an oferyas a dhest y vos glan neb a'n jeves an pla. Glan yw.

18Pan eus gwennenn y'n kneus re beu yaghhes, 19ha bothenn wynn po namm gwynnrudh yn tyller an wennenn, y fydh diskwedhys dhe'n oferyas. 20An oferyas a hwither, ha mar hevel y vos downa y'n kig es an kneus ha bos an blew ynno gyllys gwynn, an oferyas a dhest y vos avlan. Pla lovryjyon yw terrys yn-mes a'n wennenn. 21Mes mar hwither an oferyas ha nyns eus blew gwynn ynno ha nyns yw downa es an kneus, mes nebes tewal, an oferyas a wra y geas seyth dydh; 22Ha mar omles meur y'n kneus, an oferyas a dhest y vos avlan. Pla yw. 23Mes mar korta an namm gwynn yn y le heb omlesa, kreythenn an wennenn yw, ha'n oferyas a dhest y vos glan.

24Po pan vo kneus an kig leskys gans tan, ha kig bew an losk a dheu ha bos namm gwynnrudh po gwynn, 25an oferyas a'n hwither, ha mars yw gyllys gwynn an blew y'n namm, hag yth hevel bos downa es an kneus, lovryjyon yw, terrys yn-mes a'n kig leskys. Ytho an oferyas a dhest y vos avlan. Pla lovryjyon yw. 26Mes mara'n hwither an oferyas ha nyns eus blew gwynn y'n namm, ha nyns yw downa es an kneus arall, mes nebes diliw, an oferyas a wra y geas seyth dydh, 27ha'n oferyas a'n hwither an seythves dydh; mars yw omlesys meur y'n kneus, an oferyas a dhest y vos avlan. Pla lovryjyon yw. 28Mes mar korta an namm yn y le heb omlesa y'n kneus, mes bos nebes diliw, bothenn an losk yw, ha'n oferyas a dhest y vos glan, rag kreythenn a'n losk yw.

29Gour po benyn, mars eus dhedha pla y'n penn po an varv, 30an oferyas a hwither an pla, ha mar hevel bos downa es an kneus ha mars eus ynno blewenn velyn-rudh tanow, an oferyas a dhest y vos avlan. Troskenn yw, lovryjyon war an penn po an varv. 31Ha mar hwither an oferyas pla an droskenn ha ny hevel bos downa es an kneus ha nyns eus ynno blew du, an oferyas a ge an den plagys gans an droskenn seyth dydh. 32Ha'n seythves dydh an oferyas a hwither an pla ha mar nyns yw an droskenn omlesys ha nyns eus ynno blew melyn, ha ny hevel bos an droskenn downa es an kneus, 33ev a omdhivarv, mes ny dhivarv an droskenn, ha'n oferyas a ge neb a'n jeves an droskenn seyth dydh moy; 34ha'n seythves dydh an oferyas a hwither an droskenn ha mar ny omlesas an droskenn y'n kneus, ha ny hevel bos downa es an kneus, an oferyas a dhest y vos glan, hag ev a wolgh y dhillas ha bos glan. 35Mes mar omles an droskenn yn feur y'n kneus wosa y vos glanhes, 36an oferyas a'n hwither, ha mars yw an droskenn omlesys y'n kneus, ny hwila an oferyas blew melyn. Avlan yw. 37Mes mar hevel dhodho na wrug an droskenn chanjya ha mars eus blew du tevys ynno, yaghhes yw an droskenn. Glan yw; ha'n oferyas a dhest y vos glan.

38Mars eus dhe wour po benyn nammow war gneus aga hig, nammow gwynn 39an oferyas a hwither, ha mars yw an nammow diliw, namm brygh dhidhregynnus usi ow tevi y'n kneus. Glan yw.

40Gour, koedhys y wols dhiworth y benn, yw blogh, mes glan yw. 41Ha mars yw y wols koedhys dhiworth an tu a-rag a'y benn, blogh yw y dal, mes glan yw. 42Mes mars eus gwennenn wynn-rudh war y benn blogh po y dal vlogh, lovryjyon yw terrys yn-mes a'y benn blogh po y dal vlogh. 43An oferyas a'n hwither, ha mars yw gwynnrudh bothenn an wennenn war y benn blogh po y dal vlogh, gans an semlans a lovryjyon war gneus an kig, 44gour lovrek yw. Avlan yw. An oferyas a dhest y vos avlan dres eghenn. Yma y bla war y benn.

45Ha'n klavorek hag ynno an pla, y dhillas a vydh skwardys, ha gols y benn a vydh ow kregi lows, hag ev a gudh y vinvlew ha kria ‘Avlan! Avlan!’ 46Oll an dydhyow may ma an pla warnodho, y fydh avlan. Avlan yw; ev a drig y honan. Mes a'n kamp y fydh y drigva.

Lovryjyon y'n Dillas

47Dillasenn may ma ynni pla lovryjyon, dillasenn a wlan po dillasenn a lien kyn fo, 48y'n steuv po y'n anwi, a lien po a wlan, yn ledher po neppyth gwrys a ledher, 49ha mars yw gwyrdh po rudhik an pla y'n dillas po y'n ledher, y'n steuv po y'n anwi, po yn neppyth gwrys a gneus, pla lovryjyon yw, hag y fydh diskwedhys dhe'n oferyas. 50Ha'n oferyas a hwither an pla, ha keas an dra may ma an pla warnodho seyth dydh; 51ena ev a hwither an pla an seythves dydh. Mars yw an pla omlesys y'n dillas, y'n steuv po y'n anwi, po y'n kneus po yn neppyth gwrys a ledher, lovryjyon plagus yw. Avlan yw. 52Ytho ev a lesk an dillas, steuv po anwi, gwlan po lien, po neppyth a ledher, le may ma an pla, rag lovryjyon plagus yw. Y fydh leskys y'n tan.

53Ha mar hwither an oferyas, ha ny wrug an pla omlesa y'n dillas, nag y'n steuv nag y'n anwi nag yn travyth gwrys a ledher, 54an oferyas a ergh may fo golghys an dra may ma an pla warnodho, hag ev a'n ke seyth dydh moy. 55Ha'n oferyas a hwither an pla wosa y vos golghys, ha mar ny wrug an pla chanjya y semlans ha ny wrug an pla omlesa, avlan yw. Ty a'n lesk y'n tan. Poder yw, war an keyn po war an tu a-rag kyn fo.

56Ha mar hwither an oferyas ha mars yw an pla diliw wosa bos golghys, ev a'n skward yn-mes a'n dillas po yn-mes a'n kneus po yn-mes a'n steuv po a'n anwi, 57ena mar omdhiskwa hwath y'n dillas, po y'n steuv po y'n anwi, po yn neppyth a ledher, pla owth omlesa yw; ty a lesk gans tan an dra may ma an pla ynno. 58Ha'n dillas, po steuv po anwi, po pyth a ledher, a wredh y wolghi, mars yw an pla diberthys dhiworto, a vydh golghys an eyl torn, ha glan vydh.

59Hemm yw an lagha rag an pla a lovryjyon yn dillas a wlan po lien, po y'n steuv po y'n anwi, po neppyth a ledher, dhe dhesta mars yw glan po avlan.