Glanheans wosa Lovryjyon

1An Arloedh a gewsis orth Moyses, ow leverel: 2Hemma a vydh lagha an klavorek y'n jydh mayth yw glanhes. Ev a vydh dres dhe'n oferyas; 3ha'n oferyas a wra mos yn-mes a'n kamp, ha'n oferyas a'n hwither, ha, mars yw an pla a lovryjyon yaghhes y'n klavorek, 4an oferyas a ergh may fo dres rag neb a dal bos glanhes diw edhen vew ha glan, prenn keder, pann kogh ha hyssop. 5Ha'n oferyas a ergh may fo ledhys onan an ydhyn yn lester a bri a-ugh dowr ow resek. 6Hag ev a gemmer an edhen vew ha'n prenn keder ha'n pann kogh ha'n hyssop ha troghya an re ma ha'n edhen vew yn goes an edhen a veu ledhys a-ugh an dowr ow resek. 7Hag ev a'n skoell seythgweyth war neb a dal bos glanhes ha desta y vos glan, ha delivra an edhen vew dhe wari y'n gwel igor. 8Ha neb a dal bos glanhes a wolgh y dhillas ha treghi dhe-ves oll y vlew hag omwolghi yn dowr may fo glan; ha wosa henna ev a dheu a-ji dhe'n kamp, mes ev a worta mes a'y dylda seyth dydh. 9Ha'n seythves dydh ev a dregh oll y vlew; y benn ha'y varv ha'y dhiwabrans, ev a dregh oll y vlew. Ena ev a wolgh y dhillas, ha badhya y gig yn dowr, hag ev a vydh glan.

Sakrifisow Glanheans

10Ha'n ethves dydh ev a gemmer dew oen heb namm hag unn oenes heb namm unn bloedh, ha teyr degves rann a efa a vleus fin kemmyskys gans oyl rag offrynn greun, hag unn log14:10 log: A-dro dhe 0.3 liter. a oyl. 11Ha'n oferyas neb a'n glanha a worr an gour dhe vos glanhes ha'n taklow na dherag an Arloedh orth daras tylda an kuntelles. 12Ha'n oferyas a gemmer onan a'n eyn gorow ha'y offrynna rag offrynn kammweyth, ha'n log a oyl, ha'ga gwevya rag offrynn gwevys dherag an Arloedh. 13Hag ev a ladh an oen y'n tyller may ladh an offrynn pegh ha'n offrynn leskys, y'n tyller sans; kepar dell yw an offrynn pegh rag an oferyas, yndellma yw an offrynn kammweyth; an moyha sans yw. 14Ha'n oferyas a gemmer rann a woes an offrynn kammweyth, ha'n oferyas a'n gorr war vin skovarn dhyghow neb a dal bos glanhes, ha war veus y leuv dhyghow, ha war veus y droes dyghow. 15Ena an oferyas a gemmer rann a'n log a oyl ha'y dhinewi yn palv y leuv gledh y honan, 16ha'n oferyas a drogh y vys dyghow y'n oyl usi yn y balv gledh ha skoellya rann a'n oyl gans y vys seythgweyth dherag an Arloedh. 17Ha'n oferyas a worr rann a remenant an oyl usi yn y balv war vin skovarn dhyghow neb a dal bos glanhes, ha war veus y leuv dhyghow, ha war veus y droes dyghow, war woes an offrynn kammweyth. 18Ha'n oferyas a worr remenant an oyl usi yn y balv war benn neb a dal bos glanhes; ha'n oferyas a wra dehwelyans ragdho dherag an Arloedh. 19Ha'n oferyas a offrynn an offrynn pegh ha gul dehwelyans rag neb a dal bos glanhes a'y avlander, ha wosa henna, ev a ladh an offrynn leskys. 20Ha'n oferyas a offrynn an offrynn leskys ha'n offrynn greun war an alter, ha'n oferyas a wra dehwelyans ragdho, hag ev a vydh glan.

21Mes mars yw boghosek ha nyns eus yn y leuv pygans lowr dhe gavoes kemmys, ev a gemmer unn oen rag offrynn kammweyth dhe vos gwevys, dhe wul dehwelyans ragdho, hag unn degves rann a efa a vleus fin kemmyskys gans oyl rag offrynn greun, ha log oyl; 22ha diw durenn po diw golomm yowynk, par dell eus yn y leuv pygans lowr, ha'n eyl anedha a vydh offrynn pegh ha'y ben offrynn leskys. 23Hag ev a's dre an ethves dydh rag y lanheans dhe'n oferyas, bys yn daras tylda an kuntelles, dherag an Arloedh; 24ha'n oferyas a gemmer oen an offrynn kammweyth ha'n log a oyl, ha'n oferyas a's gwev rag offrynn gwevys dherag an Arloedh. 25Hag ev a ladh oen an offrynn kammweyth, ha'n oferyas a gemmer rann a woes an offrynn kammweyth ha'y worra war vin skovarn dhyghow neb a dal bos glanhes, ha war veus y leuv dhyghow, ha war veus y droes dyghow. 26Ha'n oferyas a dhinwa rann a'n oyl yn palv y leuv gledh y honan; 27ha'n oferyas a skoell rann a'n oyl usi yn y palv gledh gans bys y leuv dhyghow seythgweyth dherag an Arloedh; 28ha'n oferyas a worr rann a'n oyl usi yn y balv war vin skovarn dhyghow neb a dal bos glanhes, ha war veus y leuv dhyghow, ha war veus y droes dyghow, y'n tyller may feu gorrys goes an offrynn kammweyth; 29ha'n oferyas a worr remenant an oyl usi yn y balv war benn neb a dal bos glanhes, dhe wul dehwelyans ragdho dherag an Arloedh. 30Hag ev a offrynn onan a'n turennow po a'n kelemmi yowynk, par dell eus yn y leuv pygans lowr dh'aga havoes, 31an eyl rag offrynn pegh ha'y ben rag offrynn leskys, gans an offrynn greun, ha'n oferyas a wra dehwelyans rag neb a dal bos glanhes dherag an Arloedh. 32Hemm yw an lagha rag neb a'n jeves ynno pla lovryjyon, neb nag eus yn y leuv pygans lowr rag y lanheans.

Lovryjyon yn Chiow

33An Arloedh a gewsis orth Moyses hag Aron ow leverel, 34Pan dhyffowgh a-ji dhe bow Kanan, a rov dhywgh rag perghennogeth, ha pan worriv pla lovryjyon yn neb chi yn tir dha berghennogeth, 35ha perghennek an chi a dheu ha leverel dhe'n oferyas, ‘Yth hevel dhymm bos kepar ha pan ve pla y'n ji’, 36ena an oferyas a ergh may fo an chi gwakhes kyns es an oferyas dhe entra ynno dhe weles an pla, na vo pup-tra y'n chi deklarys avlan; ha wosa henna, an oferyas a enter ynno dhe hwithra an chi. 37Hag ev a hwither an pla, ha mars yw an pla yn parosyow an chi gans ribinow kow, glesik po rudhik, a hevel bos downa es enep an paros, 38an oferyas a yn-mes a'n chi dhe dharas an chi ha degea an chi seyth dydh. 39Ha'n oferyas a dheu arta an seythves dydh ha hwithra, ha mars yw an pla omlesys yn parosyow an chi, 40an oferyas a ergh may fo an meyn hag ynna an pla kemmerys dhe-ves ha tewlys yn tyller avlan mes a'n sita. 41Hag ev a wra dhe'n chi bos krevys a-ji oll a-dro ha'n doust yw krevys dhe-ves a vydh tewlys yn tyller avlan mes a'n sita; 42hag i a gemmer meyn erell ha'ga gorra yn le an meyn na, hag ev a gemmer plaster nowydh ha plastra an chi.

43Ha mar teu an pla arta hag omdhiskwedhes y'n chi wosa bos an meyn kemmerys dhe-ves, ha wosa bos an chi krevys ha plastrys, 44an oferyas a dheu ha hwithra, ha mars yw an pla omlesys y'n chi, lovryjyon plagus yw ev y'n chi. Avlan yw. 45Hag ev a derr an chi, an meyn ha'n prennyer anodho hag oll an plaster y'n chi, ha'ga doen yn-mes a'n sita dhe dyller avlan. 46Nebonan a dheu a-berth y'n chi hag ev deges a vydh avlan bys y'n gorthugher; 47ha neb a gosk y'n chi po dybri y'n chi a wolgh y dhillas.

48Ha mar teu an oferyas a-bervedh ha'y hwithra ha ny wrug an pla omlesa y'n chi wosa an chi dhe vos plastrys, an oferyas a dhest bos an chi glan, rag yaghhes yw an pla. 49Ha rag glanhe an chi ev a gemmer diw edhen ha prenn keder ha pann kogh ha hyssop. 50Hag ev a ladh onan an ydhyn yn lester a bri a-ugh dowr ow resek. 51Hag ev a gemmer an prenn keder ha'n hyssop ha'n pann kogh ha'n edhen vew ha'ga troghya yn goes an edhen ledhys hag y'n dowr ow resek ha skoellya seythgweyth war an chi. 52Hag ev a lanha an chi gans goes an edhen ha'n dowr ow resek ha'n edhen vew ha'n prenn keder ha'n hyssop ha'n pann kogh. 53Hag ev a dhelirv an edhen vew yn-mes a'n sita y'n gwel igor, ha gul dehwelyans rag an chi, ha glan vydh.

54Hemm yw an lagha rag pla lovryjyon a bub eghenn ha rag troskenn, 55ha rag lovryjyon dillas ha chi, 56ha rag bothenn ha rag krammenn ha rag namm gwynn, 57dhe dhyski pan yw avlan ha pan yw glan. Hemm yw an lagha a lovryjyon.