An Sansoleth a Woes

1Ha'n Arloedh a gewsis orth Moyses, ow leverel: 2Kows orth Aron hag orth y vebyon hag orth mebyon Ysrael yn kettep penn ha leverel dhedha, Hemm yw an pyth re erghis an Arloedh, ow leverel, 3Piwpynag a ji Ysrael a lattho ojyon po oen po gaver a-berth y'n kamp po y ladha a-ves dhe'n kamp, 4heb y dhri bys yn daras tylda an kuntelles dhe offrynna offrynn dhe'n Arloedh dherag tabernakel an Arloedh: goes a vydh reknys erbynn an gour na; an gour ma re skoellyas goes, hag ev a vydh treghys dhe-ves dhiworth y bobel. 5Hemm yw, may trollo mebyon Ysrael aga sakrifisow a sakrifions y'n gwel igor, orth aga thri dhe'n Arloedh, dhe dharas tylda an kuntelles, dhe'n oferyas, ha'ga sakrifia avel offrynnow kres dhe'n Arloedh. 6Ha'n oferyas a skoell an goes war alter an Arloedh, orth daras tylda an kuntelles, ha leski an blonek dhe wul sawer plegadow dhe'n Arloedh. 7Ytho ny wrons i na fella sakrifia aga sakrifisow dhe jevanow-gaver may horyons war aga lergh. Hemma a vydh ordenans bys vykken ragdha der oll aga henedhow.

8Ha ty a lever dhedha: Piwpynag a ji Ysrael po a'n alyons trigys yn aga mysk a offrynno offrynn leskys po sakrifis 9heb y dhri dhe dharas tylda an kuntelles, dh'y offrynna dhe'n Arloedh, an keth gour na a vydh treghys dhe-ves dhiworth y bobel.

10Ha piwpynag a ji Ysrael po a'n alyons trigys yn agas mysk a dheppro goes a neb sort, my a sett ow fas erbynn an den na a dheber goes, ha my a'n tregh dhe-ves dhiworth y bobel. 11Rag yma bewnans an kig y'n goes, ha my re'n ros dhywgh war an alter dhe wul dehwelyans rag agas enevow; rag an goes a wra dehwelyans rag an enev. 12Rag henna my a leveris dhe vebyon Ysrael, Ny dheber denvyth ahanowgh goes, ha ny wra alyon trigys yn agas mysk dybri goes. 13Ha piwpynag a vebyon Ysrael po a'n alyons trigys yn agas mysk a helgh ha kachya best po edhen vyth a yll bos dybrys, ev a skoell an goes anodho ha'y gorheri gans doust.

14Rag bewnans pub kig yw y woes. Ytho my a leveris dhe vebyon Ysrael, Ny wrewgh dybri goes kig vytholl, rag bewnans pub kig yw y woes. Piwpynag a'n dheppro a vydh treghys dhe-ves. 15Ha pub den a dheppro karyn po neppyth re beu skwardys gans bestes gwyls, genesik po alyon kyn fo, ev a wolgh y dhillas hag omvadhya yn dowr, hag ev a vydh avlan bys y'n gorthugher, hag ena glan vydh ev. 16Mes mar ny'n golgh na badhya y gig, ev a dheg y gammweyth.