Kolmow Reydhel Anlaghel

1Ha'n Arloedh a gewsis orth Moyses, ow leverel: 2Kows orth mebyon Ysrael ha leverel dhedha: An Arloedh agas Duw ov vy. 3Ny wrewgh naneyl war-lergh gwriansow pow Ejyp le mayth esewgh trigys, na war-lergh gwriansow pow Kanan le mayth esov orth agas dri, na gwrewgh hwi kerdhes war-lergh aga ordenansow. 4Hwi a wra ow breusow vy ha synsi ow ordenansow vy dhe gerdhes ynna. An Arloedh agas Duw ov vy. 5Ytho, hwi a syns ow ordenansow vy ha'm breusow vy. Den mar kwra hemma, ev a vew ynna. An Arloedh ov vy.

6Ny wra denvyth ahanowgh dos nes dhe neshevin dhe dhiskudha aga noethedh. An Arloedh ov vy. 7Ny wredh diskudha noethedh dha das na noethedh dha vamm. Dha vamm yw hi. Ny wredh diskudha hy noethedh. 8Ny wredh diskudha noethedh gwreg dha das. Noethedh dha das yw. 9Ny wredh diskudha noethedh dha hwoer, myrgh dha das, po myrgh dha vamm, genys tre po genys tyller arall kyn fe. Ny wredh diskudha aga noethedh. 10Ny wredh diskudha noethedh myrgh dha vab na myrgh dha vyrgh. Ny wredh diskudha aga noethedh. Aga noethedh yw dha noethedh dha honan. 11Ny wredh diskudha noethedh myrgh gwreg dha das, dineythys dhe'th tas. Dha hwoer yw hi. Ny wredh diskudha hy noethedh. 12Ny wredh diskudha noethedh hwoer dha das. Kares ogas dha das yw hi. 13Ny wredh diskudha noethedh hwoer dha vamm rag kares ogas dha vamm yw hi. 14Ny wredh diskudha noethedh broder dha das – ny wredh nesa dh'y wreg. Dha vodrep yw hi. 15Ny wredh diskudha noethedh dha wohydh. Gwreg dha vab yw hi. Ny wredh diskudha hy noethedh. 16Ny wredh diskudha noethedh gwreg dha vroder. Noethedh dha vroder yw. 17Ny wredh diskudha noethedh benyn ha'y myrgh. Ny wredh kemmeres yn demmedhyans myrgh hy mab na myrgh hy myrgh dhe dhiskudha hy noethedh. Hy neshevin yns i. Tra vethus yw. 18Ny gemmerydh yn demmedhyans hwoer dha wreg avel iswreg, dhe dhiskudha hy noethedh, ha hi yn few.

19Ny wredh dos nes dhe venyn dhe dhiskudha hy noethedh, ha hi diberthys drefenn hy avlander misyek. 20Ha ny wredh growedha yn reydhel gans gwreg dha gentrevek, owth omdhefola gensi. 21Ha ny wredh gasa dha has dhe vos sakrifiys dhe Molek, na ny wredh disakra hanow dha Dhuw. An Arloedh ov vy. 22Ny wredh growedha gans gorreydh kepar ha gans benynreydh. Tra gasadow yw. 23Ny wredh growedha gans best vyth dhe omdhefola ganso. Ny wra benyn vyth sevel dherag best dhe rowedha ganso. Podrogeth yw.

24Na wrewgh omdhefola mann der oll an taklow ma, rag der oll an taklow ma yw defolys an kenedhlow a dowlav yn-mes dheragowgh, 25ha defolys yw an tir. Ytho my a'n kessydhyas rag y gammweyth, ha'n tir y honan a hwyj yn-mes y drigoryon. 26Ytho hwi a syns ow ordenansow ha'm breusow ha ny wrewgh nagonan a'n taklow kasadow ma, naneyl an genesik na'n alyon trigys yn agas mysk. 27Rag gwer an tir a dheuth kyns hwi dhe dhos re wrug oll an taklow kasadow ma, ha defolys yw an tir; 28ma na wra an tir agas hwyja yn-mes ynwedh pan y'n defolowgh, dell hwyjas yn-mes an kenedhlow esa ena dheragowgh hwi. 29Peub a wrello taklow kasadow a'n par ma, an re a's gwra a vydh treghys dhe-ves dhiworth aga fobel. 30Ytho synsewgh ow charj, ma na wryllowgh travyth a'n ordenansow kasadow a'n par ma a veu gwrys kyns hwi dhe dhos, nag omdhefola dredha. An Arloedh agas Duw ov vy.