Laghys Divers

1An Arloedh a gewsis orth Moyses, ow leverel: 2Kows orth kuntelles kowal mebyon Ysrael, ha leverel dhedha, Bedhewgh sans, rag sans ov vy, an Arloedh agas Duw. 3Pubonan ahanowgh a wra revrons dh'y das ha'y vamm ha synsi ow sabotys. An Arloedh agas Duw ov vy. 4Na dreylyewgh dhe idolys, na gul imajys teudh. An Arloedh agas Duw ov vy.

5Pan sakrifiowgh sakrifis offrynnow kres dhe'n Arloedh, hwi a'n offrynn may kyffowgh favour. 6Y fydh dybrys an keth jydh ma'n offrynnowgh, po ternos; ha mars eus remenant anodho gesys an tressa dydh, y fydh leskys y'n tan. 7Ha mars yw dybrys an tressa dydh, avlan yw; nyns yw kemmeradow. 8Neb a'n deppro a dheg y gammweyth, rag ev re dhefolas an pyth yw sans dhe'n Arloedh, ha'n den na a vydh treghys dhe-ves dhiworth y bobel.

9Pan vysowgh trevas agas tir, ny vysydh yn tien sornow dha wel, na ny wre'ta kuntell gesigow dha drevas. 10Ny wre'ta destryppya dha winlann, na kuntell an grappys yw koedhys. Ty a's gas rag an voghosogyon ha'n alyons. An Arloedh agas Duw ov vy.

11Ny wrewgh hwi ladra na toella na frowsya an eyl y gila. 12Ha ny wrewgh hwi ti yn fals re'm hanow vy, na defola hanow dha Dhuw. An Arloedh ov vy.

13Ny wre'ta arwaska dha gentrevek na'y robbya. Ny wra gober gwas arvethys gortos genes jy oll an nos bys y'n myttin. 14Ny wre'ta mollethi an den bodhar na gorra ken a drebuchya dherag an den dall, mes ty a berth own a'th Duw. An Arloedh ov vy.

15Ny wrewgh kammhynseth y'n vreus. Ny wre'ta favera an boghosek, na gul revrons dhe'n den galloesek, mes ty a vreus dha gentrevek gans ewnder. 16Ny wre'ta mos a-dro ow leverel sklander yn mysk dha bobel, na sevel erbynn goes dha gentrevek. An Arloedh ov vy.

17Ny berthydh kas y'th kolonn erbynn dha vroder. Ty a rebuk dha gentrevek yn sur, ma na dhykki pegh a'y wovis. 18Ny wre'ta diella, na berthi envi erbynn fleghes dha bobel, mes ty a gar dha gentrevek kepar ha ty dha honan. An Arloedh ov vy.

19Hwi a syns ow ordenansow. Ny wre'ta gasa dha vestes dhe gopla gans bestes a gen eghenn. Ny wre'ta hasa dha wel gans has a dhiw eghenn; ha ny dheu warnas dillas a bann gwiys a dhiw eghenn a neus.

20Mar krowedh gour gans benyn yw kethes, hag y fydh dyllans has, ha hi ambosys dhe gen gour, heb bos dasprenys na rydhhes, astiveryans a vydh res. Ny vydhons gorrys dhe'n mernans rag nyns o hi rydh. 21Hag ev a dhre y offrynn kammweyth dhe'n Arloedh, dhe dharas tylda an kuntelles, hordh rag offrynn kammweyth. 22Ha'n oferyas a wra dehwelyans ragdho gans hordh an offrynn kammweyth dherag an Arloedh rag y begh re wrug, ha'n pegh re wrug a vydh gevys dhodho.

23Ha pan dhyffowgh a-ji dhe'n wlas ha plansa gwydh a bub eghenn rag boes, hwi a reken an frut avel antrodreghys. Ev a bes avel antrodreghys teyr blydhen ragowgh. Ny vydh dybrys. 24Mes y'n peswora blydhen oll an frut anodho a vydh sans dhe wormel an Arloedh. 25Ha'n pympes blydhen hwi a dheber an frut anodho, may rollo dhywgh an drevas ynkressys anodho. An Arloedh agas Duw ov vy.

26Ny wrewgh hwi dybri travyth gans goes. Ny wrewgh hwi dewinieth na koela orth koelyek. 27Ny wrewgh hwi treghi blew tenwennow agas pennow ha ny dreghydh tenwennow dha varv. 28Ny wrewgh hwi treghi agas kig rag an re varow, na pryntya korfliwyow warnowgh. An Arloedh ov vy.

29Na wre'ta defola dha vyrgh ow kul dhedhi bos hora, na goettho an wlas yn fornikasyon ha na dheffo ha bos leun a bodrogeth. 30Hwi a syns ow sabotys, ha diskwedhes revrons dhe'm sentri. An Arloedh ov vy.

31Na dreylyewgh dhe nygromons, ha na hwilewgh koelyogyon, dhe vos defolys gansa. An Arloedh ov vy.

32Ty a sev dherag an blew loes, hag enora an den koth, ha kavoes own a'th Duw. An Arloedh ov vy.

33Ha mars eus alyon trigys genes yn agas tir, ny wrewgh y arwaska. 34An alyon trigys genowgh a vydh dhywgh kepar ha genesik yntredhowgh. Ty a'n kar kepar ha ty dha honan, rag hwi o alyons yn pow Ejyp. An Arloedh agas Duw ov vy.

35Ny wrewgh hwi kammhynseth y'n vreus, nag yn musuryow hys, nag yn poes, nag yn dalgh. 36Y fydh dhywgh mantol ewn, poesow ewn, efa ewn ha hin ewn. An Arloedh ov vy, a'gas dros yn-mes a bow Ejyp. 37Ytho, hwi a syns oll ow ordenansow, hag oll ow breusow, ha'ga gul. An Arloedh ov vy.