Kessydhyans rag Peghosow

1An Arloedh a gewsis orth Moyses, ow leverel: 2Ty a lever ynwedh dhe vebyon Ysrael, Piwpynag a vebyon Ysrael po a'n alyons usi trigys yn Ysrael a rollo re a'y fleghes dhe Molek, a vydh gorrys yn sur dhe'n mernans. Pobel an tir a wra y labydha gans meyn. 3Ha my a vynn settya ow fas erbynn an gour na ha'y dreghi dhe-ves a'y bobel, rag ev re ros a'y has dhe Molek dhe dhefola ow sentri ha disakra ow hanow sans. 4Ha mar mynn pobel an tir kudha aga lagasow rag an gour na yn neb fordh, hag ev ow ri y has dhe Molek, ha ny'n ladhons, 5my a vynn settya ow fas erbynn an gour na hag erbynn y deylu, ha'ga threghi dhe-ves dhiworth aga fobel, ev, hag oll an re usi ow mos ganso dhe horya gans Molek.

6Ha'n den a dreyl dhe nygromons ha dhe goelyogyon, ow mos dhe horya gansa, my a vynn settya ow fas erbynn an den na ha'y dreghi dhe-ves dhiworth y bobel. 7Ytho omsanshewgh, ha bedhewgh sans, rag an Arloedh agas Duw ov vy 8Ha hwi a syns ow ordenansow ha'ga gul. An Arloedh ov vy, neb a'gas sansha. 9Rag piwpynag a vollettho y das po y vamm a vydh gorrys dhe'n mernans yn sur. Ev re vollethis y das ha'y vamm. Y woes a vydh warnodho.

10Ha'n gour a wra avoutri gans gwreg gour arall, neb a wra avoutri gans gwreg y gentrevek, a vydh gorrys dhe'n mernans yn sur, ha'n avoutrer ha'n avoutres. 11Ha'n gour a wrowedh gans gwreg y das re dhiskudhas noethedh y das, aga dew a vydh gorrys dhe'n mernans yn sur; aga goes a vydh warnedha i. 12Ha mar krowedh gour gans y wohydh, aga dew a vydh gorrys dhe'n mernans yn sur. Podrogeth re wrussons. Aga goes a vydh warnedha. 13Mar krowedh gour gans gorreydh dell wrowedh gans benynreydh, aga dew re wrug tra gasadow. I a vydh gorrys dhe'n mernans yn sur. Aga goes a vydh warnedha. 14Gour mar kemmer gwreg ha'y mamm ynwedh, tra vethus yw. I a vydh leskys gans tan, hag ev hag i, ma na vo avlander yn agas mysk. 15Ha mar krowedh gour gans best yn reydhel, yn sur ev a vydh gorrys dhe'n mernans; ha hwi a ladh an best. 16Mar teu benyn ogas dhe vest dhe wrowedha ganso, ty a ladh an venyn ha'n best ynwedh. I a vydh gorrys dhe'n mernans. Aga goes a vydh warnedha i.

17Mar kemmer gour y hwoer, myrgh y das, po myrgh y vamm, ha gweles hy noethedh, ha mar kwel hi y noethedh ev, meth yw, hag i a vydh treghys dhe-ves a wel mebyon aga fobel. Ev re dhiskudhas noethedh y hwoer. Ev a dheg y gammweyth. 18Mar krowedh gour gans benyn yn termyn hy amseryow, ha diskudha hy noethedh, ev re dhiskudhas hy fenten, ha hi re dhiskudhas fenten hy goes, ha'ga dhew a vydh treghys dhe-ves dhiworth aga fobel. 19Ha ny wre'ta diskudha noethedh hwoer dha vamm, na hwoer dha das, rag ev a dhiskudh y gares ogas. I a dheg aga hammweyth. 20Ha mar krowedh gour gans gwreg y ewnter, ev re dhiskudhas noethedh y ewnter. I a dheg aga fegh. I a verow anvap. 21Mar kemmer gour gwreg y vroder, tra avlan yw. Ev re dhiskudhas noethedh y vroder. I a vydh anvap.

22Ytho, hwi a syns oll ow ordenansow hag oll ow breusow, ha'ga gul, ma na wrello an tir, ma'gas drov dhe driga ynno, agas hwyja yn-mes. 23Ha ny wrewgh hwi kerdhes war-lergh ordenansow an genedhel a dowlav yn-mes dheragowgh, rag i re wrug oll an taklow ma, ha my a's kasas. 24Mes my re leveris dhywgh, Hwi a erit aga thir, ha my a'n rov dhywgh dhe berghenna, tir a dhinwa leth ha mel. An Arloedh agas Duw ov vy, re'gas dibarthas dhiworth an kenedhlow. 25Ytho hwi a dhissern yntra bestes glan hag avlan, hag ynter ydhyn glan hag avlan; ny wrewgh omdhefola gans best, nag edhen na travyth owth hesya war an dor re wrug vy y dhiberth ragowgh avel avlan 26Ha bedhewgh sans dhymmo vy; rag my, an Arloedh, yw sans, ha my re'gas dibarthas dhiworth an kenedhlow, dhe vos dhymmo vy.

27Gour po benyn neb a wra nygromons po neb a vo koelyek a vydh gorrys dhe'n mernans yn sur. I a vydh labydhys gans meyn. Aga goes a vydh warnedha.