Rewlys rag Oferysi

1Hag yn-medh an Arloedh dhe Moyses, Kows orth an oferysi, mebyon Aron, ha leverel dhedha: Na vedhes denvyth defolys rag den marow yn mysk y bobel, 2marnas rag y gerens yw ogas dhodho, y vamm, ha'y das, ha'y vab, ha'y vyrgh, ha'y vroder; 3ha rag y hwoer yw gwyrghes hag ogas dhodho, na's teves gour; ev a yll bos defolys rygdhi hi. 4Mes, avel gorti yn mysk y bobel, ny omdhefol, owth omdhisakra.21:4 Styr an wers yw disputys. Dell hevel, oferyas yw difennys a ynkleudhyas kares dre dhemmedhyans, y wreg yn aga mysk. 5Ny wrons blogh aga fennow, na treghi tenwennow aga barvow, na treghi aga hig. 6I a vydh sans dh'aga Duw, ha ny dhisakrons hanow aga Duw, rag i a offrynn offrynnow dre dan dhe'n Arloedh, bara aga Duw. Ytho, sans vydhons. 7Ny gemmerons yn demmedhyans gwreg a vo hora na defolys, ha ny gemmerons benyn didhemmedhys a'y gour, rag sans yw ev dh'y Dhuw. 8Ytho, ty a'n sansha, rag ev a offrynn bara dha Dhuw. Sans vydh dhiso, rag sans ov vy, an Arloedh neb a'gas sansha. 9Ha mar omdhisaker myrgh neb unn oferyas, ow farya avel hora, hi a dhisaker hy thas. Hi a vydh leskys dre dan.

10Ha neb yw an arghoferyas yn mysk y vreder, may feu dinewys war y benn oyl an untyans, hag yw sakrys dhe wiska an dillas, ny wra ev diskudha y benn na skwardya y dhillas. 11Ny wra ev dos nes dhe gorf marow vyth, nag omdhefola a-barth y das nag a-barth y vamm. 12Ny wra ev mos yn-mes a'n sentri na disakra sentri y Dhuw, rag yma sakrans oyl untyans y Dhuw warnodho. An Arloedh ov vy. 13Hag ev a gemmer gwreg ha hi gwyrghes. 14Ny wra kemmeres gwedhwes, na benyn dhidhemmedhys, na defolys, na hora, mes gwyrghes a'y bobel y honan, ev a's kemmer hi yn gwreg, 15ma na vo y has defolys yn mysk y bobel, rag my yw an Arloedh, neb a wra y sakra.

16An Arloedh a gewsis orth Moyses, ow leverel: 17Kows orth Aron, ow leverel: Denvyth a'th has, der oll aga henedhow, neb a'n jeves namm, ny yll dos nes dhe offrynna bara y Dhuw. 18Rag py gour pynag neb a'n jeffo namm, ny wra dos nes: gour dall po evredhek, po gans troen folsys, po gans esel drogformys, 19po gour shyndys y droes po shyndys y leuv, 20po bothek, po korr, po gans gwynnenn yn y lagas, po gans bryghi podredhek, po gans troskennow, po brewys y dhiwgell. 21Denvyth a has Aron an oferyas a'n jeves namm ny dheu nes dhe offrynna offrynnow an Arloedh gwrys dre dan. Yma namm dhodho; ytho ny dheu nes dhe offrynna bara y Dhuw; 22mes ev a yll dybri bara y Dhuw, an taklow moyha sans, ha'n taklow sans. 23Mes nyns a a-ji dhe'n vayl, na dos nes dhe'n alter, rag yma namm dhodho, ma na dhefollo ow sentris; rag an Arloedh ov vy, neb a wra aga sanshe. 24Ytho Moyses a leveris hemma dhe Aron, ha dh'y vebyon, ha dhe vebyon Ysrael oll.