Revrons orth Dybri an Offrynnow Sans

1Ha'n Arloedh a gewsis orth Moyses, ow leverel: 2Lever dhe Aron ha'y vebyon may tyghtyons gans revrons offrynnow sans mebyon Ysrael, ha na dhefollons ow hanow sans y'n taklow a sakrons dhymmo vy. An Arloedh ov vy. 3Lavar dhedha, Piwpynag oll a'gas has, der agas henedhow, a dheffo nes dhe'n taklow sans a wra mebyon Ysrael aga sakra dhe'n Arloedh, ha warnodho y avlander, an den na a vydh treghys dhe-ves a'm golok. An Arloedh ov vy. 4Piwpynag a has Aron a vo klavorek, po mayth eus dhodho sygerans ny wra dybri a'n taklow sans erna vo glan. Ha piwpynag a docchyo neppyth re dheuth ha bos avlan dre gorf marow, po gour re gavas dyllans has, 5po piwpynag a docchyo tra owth hesya a wrello dhodho bos avlan, po den a wrello dhodho bos avlan, pypynag a vo an avlander usi dhodho: 6neb a docchyo tra a'n par ma a vydh avlan bys y'n gorthugher, ha ny wra dybri a'n taklow sans marnas ev a wolgh y gig gans dowr. 7Pan vo an howl sedhys, ev a vydh glan, ha wosa henna ev a dheber a'n taklow sans rag i yw y voes. 8Ny wra dybri an pyth a verow y honan, po yw skwardys gans bestes gwyls. Ny dheber hemma, owth omdhefola dredho. An Arloedh ov vy. 9Ytho, i a syns ow charj, na borthons pegh warnodho ha merwel dredho drefenn i dh'y dhefola. An Arloedh ov vy, neb a wra aga sanshe.

10Ny dheber estren22:10, 12, 13 estren: Henn yw gour nag yw diyskynnyas Aron. vyth tra sans. Ny dheber tra sans naneyl godriger a'n oferyas, na gwas arvethys. 11Mes mar pren an oferyas neb den gans y vona ev, hemma a'n deber, hag ev neb yw dineythys yn y ji, i a dheber a'y voes. 12Myrgh oferyas, mars yw hi demmedhys dhe estren, ny yll hi dybri a offrynn an taklow sans. 13Mes myrgh oferyas, mars yw gwedhwes po didhemmedhys, ha heb flogh, ha dehwelys dhe ji hy thas kepar hag yn hy yowynkneth, hi a yll dybri boes hy thas, mes ny'n deber estren vyth. 14Ha den mar teber tra sans heb y wodhvos, ev a geworr an pympes rann a'y dalvosogeth dhodho, ha ri an dra sans dhe'n oferyas. 15Ny wrons defola taklow sans mebyon Ysrael a offrynnons dhe'n Arloedh, 16na'ga gasa dhe berthi kammweyth kammwrians pan dhebrons aga thaklow sans, rag an Arloedh ov vy, neb a wra aga sanshe.

Sakrifisow Ankemmeradow

17An Arloedh a gewsis orth Moyses, ow leverel: 18Kows orth Aron ha'y vebyon hag orth oll mebyon Ysrael, ha leverel dhedha, Piwpynag a ji Ysrael po a'n alyons yn Ysrael a vynno offrynna aga offrynn rag oll aga ambosow ha rag oll aga offrynnow bolonjedhek, a vynnons dhe offrynna dhe'n Arloedh avel offrynn leskys, 19gorreydh heb namm vydh an offrynn bolonjedhek, a'n chatel, a'n deves, po a'n gever. 20Pypynag a'n jeffo namm, ny wrewgh hwi y offrynna, rag ny vydh kemmeradow ragowgh. 21Ha piwpynag a offrynno sakrifis offrynnow kres dhe'n Arloedh dhe gollenwel ambos po offrynn bolonjedhek, a'n chatel po a'n flokk, bedhes perfydh may fo kemmeradow. Ny vydh namm ynno. 22Ny wrewgh offrynna dhe'n Arloedh travyth a vo dall po gans askorn terrys po mans po gans gwennogenn po gans bryghi podredhek po gans troskennow, na gul offrynn anedha dre dan war an alter. 23Ty a yll offrynna ojyon po oen gans esel re hir po re vyghan rag offrynn bolonjedhek, mes ny vydh kemmeradow rag ambos. 24Ny wrewgh hwi offrynna travyth may fo y dhiwgell brewys, na skwattys, na tennys yn-mes, na treghys; ny wrewgh hwi hemma yn agas tir hwi. 25Dhiworth dorn alyon ny wrewgh hwi offrynna boes dha Dhuw a'n keth bestes ma, rag bos fowtow ha nammow ynna. Ny vydhons kemmeradow ragowgh.

26An Arloedh a gewsis orth Moyses ow leverel: 27Pan yw ojyon po oen po gaver dineythys, y fydh seyth dydh yn-dann y vamm, hag a-dhia'n ethves dydh ev a vydh kemmeradow rag offrynn dre dan dhe'n Arloedh. 28Na wrewgh ladha bugh po davas ha'y mab, aga dew y'n keth jydh. 29Ha pan offrynnowgh sakrifis grasyans dhe'n Arloedh, offrynnowgh ev yn fordh may fo kemmeradow. 30Ev a vydh dybrys an keth jydh; ny wrewgh gasa rann vyth anodho bys y'n myttin. An Arloedh ov vy.

31Ytho, hwi a syns ow gorhemmynnow ha'ga gul. An Arloedh ov vy. 32Ny wrewgh hwi defola ow hanow sans, mes my a vydh sanshes yn mysk mebyon Ysrael. An Arloedh ov vy, neb a wra agas sanshe, 33neb a'gas dros yn-mes a bow Ejyp, dhe vos agas Duw. An Arloedh ov vy.