Goelyow Sans

1Ha'n Arloedh a gewsis orth Moyses, ow leverel: 2Kows orth mebyon Ysrael ha leverel dhedha: An re ma yw goelyow an Arloedh a wrewgh hwi deklarya dhe vos kuntellesow sans. An re ma yw ow goelyow vy. 3Yma hwegh dydh may fydh ober gwrys, ha'n seythves dydh yw sabot powes, kuntelles sans. Ny wrewgh hwi gul ober vyth. Sabot an Arloedh yw yn oll agas trigvaow.

Pask

4An re ma yw goelyow an Arloedh, kuntellesow sans a wrewgh hwi aga deklarya yn aga thermyn. 5Y'n kynsa mis, yn peswardhegves dydh an mis, y'n gorthugher, yma pask an Arloedh, 6hag y'n pymthegves dydh an keth mis yma goel an bara heb goell dhe'n Arloedh. Seyth dydh y koedh dhywgh dybri bara heb goell. 7An kynsa dydh, hwi a'gas bydh kuntelles sans. Ny wrewgh hwi ober arvethys. 8Mes hwi a offrynn offrynn dre dan dhe'n Arloedh seyth dydh. Y'n seythves dydh yma kuntelles sans. Ny wrewgh hwi ober arvethys.

9An Arloedh a gewsis orth Moyses, ow leverel: 10Kows orth mebyon Ysrael ha leverel dhedha: Pan dhyffowgh y'n tir a rov dhywgh ha mysi y drevas, hwi a dhre manal kynsa frut agas trevas dhe'n oferyas, 11hag ev a wev an vanal dherag an Arloedh, may fowgh kemmeradow. An oferyas a'n gwev an myttin wosa an sabot. 12Ha'n jydh may hwevyowgh an vanal, hwi a offrynn oen heb namm unn bloedh, rag offrynn leskys dhe'n Arloedh. 13Ha'n offrynn greun ganso a vydh diw dhegves rann a efa a vleus fin kemmyskys gans oyl, offrynn dre dan dhe'n Arloedh, sawer plegadow, ha'y offrynn diwes a vydh gwin, an peswora rann a hin. 14Ha ny wrewgh hwi dybri na bara nag ys rostys na pennow-ys glas bys y'n jydh may trowgh offrynn dh'agas Duw. Ordenans vydh bys vykken der agas henedhow, yn oll agas trigvaow.

Penkost

15Ha hwi a reken seyth sabot a-dhia'n myttin wosa an sabot, a-dhia'n jydh may tresowgh manal an offrynn gwevys, seyth seythun gowal; 16reknewgh hanter-kans dydh bys y'n myttin wosa an seythves sabot; ena hwi a dhre offrynn greun nowydh dhe'n Arloedh. 17Hwi a dhre yn-mes a'gas trigvaow diw dorth-vara rag offrynn gwevys, gwrys a dhiw dhegves rann a efa. I a vydh gwrys a vleus fin, pebys gans goell, avel kynsa frut dhe'n Arloedh. 18Ha gans an bara hwi a offrynn seyth oen heb namm unn bloedh, hag unn tarow yowynk, ha dew hordh. I a vydh offrynn leskys dhe'n Arloedh gans aga offrynn greun ha'ga offrynnow diwes, offrynn gwrys dre dan, sawer plegadow dhe'n Arloedh. 19Ena hwi a sakrifi unn bogh rag offrynn pegh ha dew oen unn bloedh rag sakrifis offrynnow kres. 20Ha'n oferyas a wra aga gwevya gans bara an kynsa frut rag offrynn gwevys dherag an Arloedh, gans an dhew oen. Sans vydhons dhe'n Arloedh rag an oferyas. 21Ha hwi a dheklar y'n keth jydh na, y fydh kuntelles sans ragowgh; ny wrewgh hwi ober arvethys. Ordenans yw bys vykken yn oll agas trigvaow, der agas henedhow.

22Ha pan vysowgh trevas agas tir, ny vysydh yn tien sornow dha wel, na ny wre'ta kuntell gesigow dha drevas. Ty a's gas rag an voghosogyon ha'n alyons. An Arloedh agas Duw ov vy.

Dy'goel an Hirgern

23An Arloedh a gewsis orth Moyses, ow leverel: 24Kows orth mebyon Ysrael, ow leverel: Y'n seythves mis, yn kynsa dydh an mis, y fydh dhywgh sabot solem, kovadh deklarys gans hwytha hirgern, kuntelles sans. 25Ny wrewgh hwi ober arvethys, mes hwi a dhre offrynn dre dan dhe'n Arloedh.

Dy'goel an Dehwelyans

26An Arloedh a gewsis orth Moyses, ow leverel: 27Y'n degves dydh a'n seythves mis, y fydh dydh dehwelyans; y fydh kuntelles sans ragowgh, ha hwi a omjasti hag offrynna offrynn dre dan dhe'n Arloedh. 28Ha ny wrewgh hwi ober vyth poran an jydh na, rag dydh dehwelyans yw dhe wul dehwelyans ragowgh dherag an Arloedh agas Duw. 29Piwpynag na omuvelhaho poran an jydh na a vydh treghys dhe-ves dhiworth y bobel. 30Ha piwpynag a wrello ober vyth poran an jydh na, my a'n distru dhiworth y bobel. 31Ny wrewgh hwi ober vyth. Ordenans bys vykken yw der agas henedhow, yn oll agas trigvaow. 32Y fydh sabot solem ragowgh ha hwi a omjasti. Yn nawves dydh an mis y'n gorthugher, a'n gorthugher bys y'n gorthugher hwi a with agas sabot.

Goel an Skovvaow

33An Arloedh a gewsis orth Moyses, ow leverel: 34Kows orth mebyon Ysrael, ow leverel: An pymthegves dydh a'n seythves mis a vydh goel an skovvaow dhe'n Arloedh. 35Y'n kynsa dydh y fydh kuntelles sans. Ny wrewgh hwi ober arvethys. 36Seyth dydh hwi a offrynn offrynnow dre dan dhe'n Arloedh. Y'n ethves dydh y fydh kuntelles sans ragowgh, ha hwi a offrynn offrynn dre dan dhe'n Arloedh. Kuntelles solem yw, ha ny wrewgh hwi ober arvethys.

37An re ma yw goelyow an Arloedh a wrewgh hwi aga deklarya dhe vos kuntellesow sans, dhe offrynna offrynn dre dan dhe'n Arloedh, offrynn leskys hag offrynn greun, sakrifis, hag offrynnow diwes, pup-tra y'n jydh ewn; 38war-barth gans sabotys an Arloedh, ha war-barth gans agas rohow, ha war-barth gans oll agas ambosow, ha war-barth gans oll agas offrynnow bolonjedhek dhe'n Arloedh.

39Y'n pymthegves dydh a'n seythves mis, pan wrussowgh hwi kuntelles frut an tir, hwi a syns goel an Arloedh seyth dydh; y'n kynsa dydh y fydh sabot solem, hag y'n ethves dydh y fydh sabot solem. 40Y'n kynsa dydh hwi a gemmer frut a wydh splann, delyow palmwydh, skorrennow a wydh delyek ha helyk a'n gover; ha hwi a lowenha seyth dydh dherag an Arloedh agas Duw. 41Ha hwi a'n syns avel goel dhe'n Arloedh seyth dydh y'n vlydhen. Ordenans bys vykken yw der agas henedhow; hwi a'n syns y'n seythves mis. 42Hwi a drig yn skovvaow seyth dydh. Oll an enesigyon yn Ysrael a drig yn skovvaow, 43may hwodhvo agas henedhow y hwrug vy dhe vebyon Ysrael triga yn skovvaow pan y's dros yn-mes a bow Ejyp. An Arloedh agas Duw ov vy.

44Yndella Moyses a dheklaryas dhe vebyon Ysrael goelyow an Arloedh.