An Vlydhen Sabotek

1Ha'n Arloedh a gewsis orth Moyses yn menydh Sinay, ow leverel, 2Kows orth mebyon Ysrael ha leverel dhedha: Pan dhyffowgh hwi a a-ji dhe'n tir a rov dhywgh, an tir a with sabot dhe'n Arloedh. 3Hwegh blydhen ty a has dha wel ha hwegh blydhen ty a skether dha winlann ha kuntell an frut anedhi. 4Mes an seythves blydhen a vydh sabot solem dhe'n tir rag an Arloedh. Ny hesydh dha wel na skethra dha winlann. 5Ny vysydh an pyth a dyv y honan a'th trevas, na kuntell grappys dha winlann na veu skethrys; blydhen a sabot solem yw rag an tir. 6Ha sabot an tir a vydh boes ragowgh, ragos jy, ha rag dha gethwas ha rag dha gethes ha rag dha was arvethys ha rag an godriger usi trigys genes; 7rag dha jatel ha'n bestes gwyls war dha dir, oll an askorr anodho a vydh boes.

Blydhen an Yubile

8Ha ty a reken ragos seyth sabot a vlydhynyow, seythgweyth seyth blydhen; ha termyn seyth sabot a vlydhynyow a vydh ragos naw blydhen ha dew-ugens. 9Ena ty a wra dhe'n hirgorn seni yn degves dydh an seythves mis; yn dydh an dehwelyans hwi a wra dhe'n hirgorn seni der oll agas tir. 10Ha hwi a sansha an degves blydhen ha dew-ugens ha deklarya rydhses der oll an tir dhe oll y drigoryon. Y fydh yubile dhywgh, ha hwi a dhehwel pub den oll dh'y berghennogeth ev ha pub den oll dh'y deylu. 11An degves blydhen ha dew-ugens a vydh yubile dhywgh. Ny wrewgh hwi hasa, na mysi an pyth a dyv y honan ena, na kuntell an grappys dhiworth dha winbrenn na veu skethrys. 12Rag yubile yw; sans vydh dhywgh. Hwi a dheber y askorr dhiworth an gwel.25:12 Hwi a dheber y askorr dhiworth an gwel: An styr yw, Ny yllydh dybri marnas askorr an tir hag a dyv y'n gwelyow heb gonedha.

13Yn blydhen ma an yubile, pub den ahanowgh a dhehwel dh'y berghennogeth. 14Mar kwerthydh neppyth dhe'th kentrevek, po prena dhiworth dha gentrevek, ny wrewgh hwi gwaska an eyl y gila. 15Ty a bren dhiworth dha gentrevek orth an myns a'n blydhynyow wosa an yubile; hag ev a'n gwerth dhis orth an myns a'n blydhynyow a frut yw gesys. 16Pan eus meur a vlydhynyow, ty a ughelha an pris, ha pan eus boghes blydhynyow ty a iselha an pris, rag ev a'n gwerth dhis orth an myns a vlydhynyow an trevasow. 17Ytho, ny wrewgh hwi gwaska an eyl y gila, mes ty a berth own a'th Duw, rag an Arloedh agas Duw ov vy.

18Ytho, hwi a wra ow ordenansow ha gwitha ow breusow ha'ga gul, ha hwi a drig y'n pow yn sawder. 19Ha'n tir a re y frut ha hwi a dheber dha walgh ha triga ynno yn sawder. 20Ha mar leverowgh, Pandr'a wren ni dybri y'n seythves blydhen, mar ny wren ny hasa na kuntell agan trevas? 21ena my a ergh ow bennath dhe dhos dhywgh y'n hweghves blydhen, ha hi a re dhywgh frut rag teyr blydhen. 22Pan hesowgh has y'n ethves blydhen, hwi a dheber frut koth; bys y'n nawves blydhen, pan dheu hy threvas, hwi a dheber an frut koth. 23Ny vydh an tir gwerthys bys vykken, rag my a bew an tir; rag hwi yw alyons ha godrigoryon genev. 24Hag yn oll an tir a'gas perghennogeth, hwi a re daspren rag an tir.

25Mars yw dha vroder devedhys ha bos boghosek hag ev a werth y berghennogeth, ena res yw y neshevin dhe dhos ha dasprena an pyth re werthas y vroder. 26Ha mar ny'n jeves nagonan dh'y dhasprena, mes a-wosa ev y honan a sewen hag yma yn y leuv pygans lowr dh'y dhasprena, 27ena, reknes ev blydhynyow an gwerthas, hag attyli an dyffrans dhe'n gour a'n gwerthas, may hallo dehweles dh'y berghennogeth. 28Mes, mar ny'n jeves an pygans dh'y dhaskavoes, an pyth yw gwerthys a wra pesya yn leuv an prener bys yn blydhen an yubile, hag y'n yubile y fydh rydhhes, hag ev a dhehwel dh'y berghennogeth.

29Ha gour mar kwerth chi-annedh yn sita gans fosow, ev a yll y dhasprena a-ji dhe vlydhen leun wosa y vos gwerthys. Ev a yll y dhasprena a-ji dhe vlydhen leun. 30Ha mar nyns yw dasprenys a-ji dhe unn vlydhen leun, an chi a-ji dhe'n sita gans fosow a vydh surhes dhe neb a'n prenas bys vykken, dhodho ev ha dh'y henedh. Ny vydh livrys y'n yubile. 31Mes chiow yn godrevow heb fosow a-dro dhedha a vydh reknys avel gwelyow an pow. I a yll bos dasprenys hag i a vydh livrys y'n yubile. 32Byttegyns, sitys an Levysi, an chiow yn sitys aga ferghennogeth, an Levysi a yll aga dasprena pup-prys. 33Ha pypynag a vo dasprenys gans onan a'n Levysi – gwerthas chi perghennys ganso yn sita – ev a vydh livrys y'n yubile, rag chiow yn sitys an Levysi yw aga ferghennogeth yn mysk mebyon Ysrael. 34Mes an peurva a-dro dh'aga sitys ny yll bos gwerthys, rag yth yw aga ferghennogeth bys vykken.

35Ha mars yw dha vroder devedhys ha bos boghosek ha heb pygans yn dha herwydh, ty a wra y ventena; kepar hag alyon po godriger y fydh ev trigys genes. 36Na gemmer oker na gwayn dhiworto, mes perth own a'th Duw, may pessyo dha vroder bos trigys genes. 37Ny wre'ta ri dhodho dha vona rag oker na gwertha dhodho dha voes rag gwayn. 38An Arloedh agas Duw ov vy a'gas dros yn-mes a bow Ejyp dhe ri dhywgh pow Kanan ha dhe vos a'gas Duw.

39Ha'th vroder trigys genes, mar teu ha bos boghosek hag yw gwerthys dhis, ny wre'ta y gonstryna dhe servya kepar ha kethwas, 40mes kepar ha gwas arvethys ha godriger y fydh ev genes, hag ev a'th serv bys yn blydhen an yubile. 41Ena ev a omdenn dhiworthis, ev ha'y fleghes ganso, hag ev a dhehwel dh'y deylu ev; dhe berghennogeth y dasow y hwra ev dehweles. 42Rag an re ma yw ow gwesyon a dhres vy yn-mes a bow Ejyp. Ny vydhons gwerthys avel kethwesyon. 43Ny wre'ta y rewlya gans garowder, mes ty a berth own a'th Duw. 44Dha gethyon ha'th kethesow usi genes a vydh a'n kenedhlow trigys a-dro dhywgh. Anedha i ty a bren kethyon ha kethesow. 45Hwi a bren ynwedh fleghes an wodrigoryon trigys genowgh. Hwi a bren a'n re ma hag a'ga theyluyow usi genowgh, neb a veu genys yn agas tir. I a vydh agas perghennogeth. 46Ha hwi a's kemmer avel eretons rag agas fleghes war agas lergh, dhe erita avel perghennogeth bys vykken. Hwi a's gwith avel kethyon.25:46 Hwi a's gwith avel kethyon: Nyns usi an geryow ma y'n Septuagint na'n Vulgat. Mes ny wrewgh hwi rewlya gans garowder war agas breder, mebyon Ysrael, an eyl war y gila.

47Alyon po godriger genes mars eus yn y leuv pygans lowr, ha'th vroder trigys ganso mar teu ha bos boghosek hag omwertha dhe'n alyon po dhe'n godriger genes, po dhe esel teylu an alyon, 48wosa bos gwerthys ev a yll bos dasprenys. Onan a'y vreder a yll y dhasprena, 49po y ewnter po mab y ewnter a yll y dhasprena, po nebonan a'y neshevin a'y deylu a yll y dhasprena, po mars eus yn y leuv pygans lowr, ev a yll omdhasprena y honan. 50Hag ev a reken gans neb a'n prenas, a'n vlydhen may feu gwerthys dhodho bys yn blydhen an yubile, ha'y werthbris a vydh kesson gans niver an blydhynyow; y fydh orth kevradh gwas arvethys y'n termyn na. 51Ha mars eus lies blydhen gesys, war-lergh aga niver ev a dhaskorr avel pris y dhaspren neppyth a'n mona may feu prenys ganso. 52Ha mar nyns eus gesys marnas nebes blydhynyow kyns blydhen an yubile, ev a reken ganso; war-lergh niver y vlydhynyow ev a dhaskorr dhodho pris y dhaspren. 53Ev a vydh ganso kepar ha gwas arvethys blydhenyek. Ny wra y rewlya gans garowder yn dha wolok. 54Ha mar nyns yw dasprenys yndella, ev a vydh rydhhes yn blydhen an yubile, ev ha'y fleghes ganso. 55Rag gwesyon dhymmo vy yw mebyon Ysrael. Ow gwesyon yns i, a dhres vy yn-mes a bow Ejyp. An Arloedh agas Duw ov vy.