An Offrynn Kres

1Ha mars yw y offrynn sakrifis a'n offrynn kres, mara'n dre a'n chatel, mars yw gorow po benow, ev a dhre best heb namm dherag an Arloedh. 2Hag ev a worr y leuv war benn y offrynn ha'y ladha orth daras tylda an kuntelles, ha mebyon Aron, an oferysi, a wra skoellya an goes war an alter a-derdro. 3Hag yn-mes a sakrifis an offrynn kres ev a dhre offrynn dre dan dhe'n Arloedh; an blonek a worher an pottys hag oll an blonek usi war an pottys. 4Ha'n dhiwloneth ha'n blonek usi warnedha ogas dhe'n dhiwglun, ha stagell an avi gans an dhiwloneth, ev a's kemmer dhe-ves. 5Ha mebyon Aron a's lesk war an alter war an sakrifis leskys usi war an prenn usi war an tan. Offrynn dre dan yw, sawer plegadow dhe'n Arloedh.

6Ha'y offrynn rag sakrifis offrynn kres dhe'n Arloedh, mars yw yn-mes a'n flokk, gorow po benow, ev a dhre best heb namm. 7Mar tre oen rag y offrynn, ena ev a'n dre dherag an Arloedh, 8hag ev a worr y leuv war benn y offrynn ha'y ladha dherag daras tylda an kuntelles, ha mebyon Aron a wra skoellya y woes war an alter a-derdro. 9Hag yn-mes a sakrifis an offrynn kres ev a dhre offrynn gwrys dre dan dhe'n Arloedh; y vlonek, an lost blonegek kowal kemmerys dhe-ves ogas dhe askorn an keyn, ha'n blonek a worher an pottys hag oll an blonek usi war an pottys. 10Ha'n dhiwloneth ha'n blonek usi warnedha ogas dhe'n dhiwglun, ha stagell an avi gans an dhiwloneth, ev a's kemmer dhe-ves. 11Ha'n oferyas a's lesk war an alter avel boes, offrynn dre dan dhe'n Arloedh.

12Ha mars yw y offrynn gaver, ev a's dre dherag an Arloedh, 13hag ev a worr y leuv war hy fenn ha'y ladha dherag tylda an kuntelles, ha mebyon Aron a skoell an goes war an alter a-derdro. 14Hag yn-mes a'n offrynn ma ev a dhre offrynn gwrys dre dan dhe'n Arloedh, an blonek a worher an pottys hag oll an blonek usi war an pottys. 15Ha'n dhiwloneth ha'n blonek usi warnedha ogas dhe'n dhiwglun, ha stagell an avi gans an dhiwloneth, ev a's kemmer dhe-ves. 16Ha'n oferyas a's lesk war an alter avel boes, offrynn dre dan avel sawer plegadow. Oll an blonek a vydh rag an Arloedh. 17Y fydh ordenans bys vykken der agas henedhow, der oll agas trigvaow, ma na dhypprowgh naneyl blonek vytholl na goes vytholl.