1Mar pegh den, ow klewes molleth poblek,5:1 molleth poblek: Ebrow lev ti, henn yw galow poblek dhe dhustunioryon a neb drogober dhe dhoen dustuni. Mar skonir doen dustuni, pegh yw. hag ev dustunier neb a welas an mater po a glewas anodho, mar ny gews anodho, ev a dheg an blam a'y gammweyth. 2Po mar toch den neppyth avlan, korf best gwyls avlan, korf chatel avlan, po korfow pryves owth hesya a vo avlan, hwath mars yw an dra kelys dhiworto, ev yw avlan, ha kablus. 3Po mar toch den a vo avlan, pypynag a wrello an den dhe vos avlan, ha henn yw kelys dhiworto, pan y'n goer, kablus vydh. 4Po mar te nebonan, ow kewsel yn tibreder gans y dhiwweus, ev dhe wul drog po da, pypynag a lavarro den yn tibreder, hag a vo kelys dhiworto, pan wodhvo a-dro dhodho kablus vydh yn y gever. 5Pan vo kablus yn neb onan a'n taklow ma, ev a gonfess an dra may peghas. 6Hag ev a dhre y offrynn kammweyth dhe'n Arloedh rag an pegh re wrug, davas venow a'n flokk, oen po mynn a'n gever rag offrynn pegh ha'n oferyas a wra dehwelyans ragdho rag y begh.

7Ha mar nyns eus yn y leuv pygans lowr rag oen, ev a dhre, avel offrynn kammweyth rag an pegh a wrug, diw durenn po diw golomm yowynk dhe'n Arloedh, onan rag offrynn pegh ha'y ben rag offrynn leskys. 8Hag ev a's dre dhe'n oferyas, neb a offrynn yn kynsa an offrynn pegh; ha wrestya dhe-ves hy fenn dhiworth hy honna, heb y ranna yn tien. 9Hag ev a skoell rann a woes an offrynn pegh war denewen an alter, ha remenant an goes a vydh gweskys yn-mes war woeles an alter. Offrynn pegh yw. 10Hag ev a brof an nessa rag offrynn leskys herwydh an rewlys, ha'n oferyas a wra dehwelyans ragdho rag y begh re beghas, hag y fydh gevys dhodho.

11Mes mar nyns eus yn y leuv pygans lowr rag diw durenn po diw golomm yowynk, ev a dhre y offrynn rag an pegh a wrug, unn degves rann a efa a vleus fin rag offrynn pegh. Ny worr oyl warnodho, ha ny worr frankynkys warnodho, rag offrynn pegh yw. 12Ena, ev a'n dre dhe'n oferyas, ha'n oferyas a gemmer y dhornas anodho avel rann govadh, ha'y leski war an alter, war an offrynnow dre dan dhe'n Arloedh. Offrynn pegh yw. 13Ha'n oferyas a wra dehwelyans ragdho rag y begh a beghas yn onan a'n taklow ma, ha gevys vydh dhodho. Ha'n remenant a vydh rag an oferyas, kepar ha'n offrynn greun.

An Offrynn Kammweyth

14Ha'n Arloedh a gewsis orth Moyses, ow leverel: 15Mar kwra nebonan neppyth dislel ha pegha heb y wodhvos yn taklow sans an Arloedh, ev a dhre y offrynn kammweyth dhe'n Arloedh, hordh heb namm a'n flokk, talvesys genes a dhew shekel arghans, war-lergh shekel an sentri, avel offrynn kammweyth. 16Hag ev a wra amendya an kamm re wrug dhe'n taklow sans ha keworra pympes rann dhodho ha'y ri dhe'n oferyas; ha'n oferyas a wra dehwelyans ragdho gans hordh an offrynn kammweyth, hag y fydh gevys dhodho.

17Ha mar pegh den ha gul neppyth erbynn onan a worhemmynnow an Arloedh na dal bos gwrys, kyn fo heb y wodhvos, kablus vydh, hag ev a dheg an blam a'y gammweyth. 18Hag ev a dhre dhe'n oferyas hordh heb namm a'n flokk, talvesys genes a bris an offrynn kammweyth; ha'n oferyas a wra dehwelyans ragdho rag an pegh gwrys ganso heb y wodhvos, hag y fydh gevys dhodho. 19Offrynn kammweyth yw. Sur, kablus yw a-rag an Arloedh.