1Ha'n Arloedh a gewsis orth Moyses, ow leverel:6:1 6:1 bys 6:7 yw niverys 5:20 bys 5:26; ha 6:8 bys 6:30 yw niverys 6:1 bys 6:23 y'n tekst ebrow hag y'n Septuagint. 2Mar pegh den ha gul neppyth dislel erbynn an Arloedh, ow leverel gow dh'y hynsa a-dro dhe neppyth gesys dhodho dhe witha, po gorrys yn y jarj avel mewgh, po neppyth ledrys dre nerth, po mar arwaskas y hynsa, 3po mar kavas neppyth o kellys ha leverel gow yn y gever ha ti yn fals a-dro dhe onan a'n taklow gwrys gans den, ha pegha yndellma: 4ena, drefenn ev dhe begha ha bos kablus, res vydh dhodho restorya an pyth a ladras dre nerth po an pyth a gavas der arwask po an pyth a veu res dhodho dhe witha po an pyth kellys a gavas, 5po pup-tra oll a dos yn fals a-dro dhodho; ev a'n restor yn tien ha keworra dhodho pympes rann moy, ha ri dhe neb a'n pew yn dydh y offrynn kammweyth. 6Hag ev a dhre y offrynn kammweyth dhe'n Arloedh, hordh heb namm a'n flokk, talvesys genes, rag offrynn kammweyth, dhe'n oferyas. 7Ha'n oferyas a wra dehwelyans ragdho dherag an Arloedh hag y fydh gevys dhodho pypynag a wrug ow kammwul.

An Offrynn Leskys Pub-dydhyek

8Ha'n Arloedh a gewsis orth Moyses, ow leverel: 9Gwra erghi dhe Aron ha'y vebyon ow leverel: Hemm yw lagha an offrynn leskys. An offrynn leskys a vydh war an oeles, war an alter, dres an nos bys y'n myttin, ha tan an alter a bes ow leski ynni.6:9 ynni: Henn yw y'n oeles usi war an alter. 10Ha'n oferyas a wisk y dhillas a lien ha'y lavrek a lien war y gig ha kemmeres yn-bann lusu an offrynn leskys a veu konsumys gans tan war an alter, hag ev a's gorr ryb an alter. 11Ena ev a dhiwisk y dhillas ha gwiska dillas arall ha doen an lusu yn-mes a'n kamp bys yn tyller glan. 12Ha'n tan war an alter a bes ow leski warnodho; ny vydh difeudhys. An oferyas a lesk prenn warnodho pub myttin hag araya an offrynn leskys warnodho, hag ev a lesk warnodho blonek an offrynnow kres. 13Ha'n tan a bes ow leski pub eur oll war an alter; ny vydh difeudhys.

An Offrynn Greun Pub-dydhyek

14Hemm yw lagha an offrynn greun. Mebyon Aron a'n offrynn dherag an Arloedh dherag an alter. 15Hag ev a gemmer dornas anodho, a vleus fin an offrynn greun ha'y oyl hag oll y frankynkys usi war an offrynn greun, ha'y leski war an alter, y rann govadh, sawer plegadow dhe'n Arloedh. 16Hag Aron ha'y vebyon a dheber an remenant avel bara heb goell yn tyller sans. Yn klos tylda an kuntelles y hwrons y dhybri. 17Ny vydh pebys gans goell. My re'n ros dhedha avel aga rann a'm offrynnow dre dan. An moyha sans yw, kepar ha'n offrynn pegh ha'n offrynn kammweyth. 18Pub gorreydh yn mysk fleghes Aron a dheber anodho. Ordenans vydh bys vykken der agas henedhow dhiworth offrynnow dre dan dhe'n Arloedh. Piwpynag a's tocchyo a vydh sans.

19Ha'n Arloedh a gewsis orth Moyses, ow leverel: 20Hemm yw an offrynn a offrynn Aron ha'y vebyon dhe'n Arloedh y'n jydh mayth yw untys: unn degves rann a efa a vleus fin avel offrynn greun pub-dydhyek, hanter anodho y'n myttin ha hanter anodho y'n nos. 21Y fydh gwrys gans oyl war ven-pobas; ty a'n dre kemmyskys yn ta; ty a'n offrynn yn temmyn brewys kepar hag offrynn greun, sawer plegadow dhe'n Arloedh. 22Ha'n oferyas a'y vebyon a vo untys yn le y das a wra y offrynna. Ordenans bys vykken yw dhe'n Arloedh; y fydh kowlleskys. 23Pub offrynn greun a'n oferyas a vydh kowlleskys. Ny vydh dybrys.

An Offrynn Pegh

24Ha'n Arloedh a gewsis orth Moyses ow leverel: 25Kows orth Aron ha'y vebyon ow leverel: Hemm yw lagha an offrynn pegh. Y'n tyller mayth yw ledhys an offrynn leskys, y fydh an offrynn pegh ledhys dherag an Arloedh. An moyha sans yw. 26An oferyas neb a'n offrynn rag pegh, a'n deber. Y fydh dybrys yn tyller sans, yn klos tylda an kuntelles. 27Piwpynag a docchyo y gig a vydh sans, ha mars eus goes skoellys war neb dillasenn, ty a's golgh yn tyller sans. 28Mes an lester a bri mayth yw bryjys ynno a vydh terrys; ha mars yw bryjys yn lester a vrons, y fydh skourys ha godroghys yn dowr. 29Pub gorreydh yn mysk an oferysi a'n deber. An moyha sans yw. 30Ha ny vydh dybrys offrynn pegh vyth mayth yw dres an goes anodho a-ji dhe dylda an kuntelles dhe wul dehwelyans y'n tyller sans. Leskys vydh y'n tan.