An Urdhyansow

1Ha'n Arloedh a gewsis orth Moyses ow leverel, 2Kemmer Aron ha'y vebyon ganso ha'n dillas ha'n oyl untyans, ha lodhen rag an offrynn pegh, ha dew hordh ha kanstellas a vara heb goell; 3ha kuntell oll an kuntelles war-barth orth daras tylda an kuntelles. 4Ha Moyses a wrug dell erghis dhodho an Arloedh, ha'n kuntelles a dheuth war-barth dhe dharas tylda an kuntelles.

5Hag yn-medh Moyses dhe'n kuntelles, ‘Hemm yw an pyth a erghis an Arloedh may fe gwrys.’ 6Ha Moyses a dhros Aron ha'y vebyon ha'ga golghi gans dowr. 7Hag ev a'n gwiskas y'n bows ha kelmi an grogys a-dro dhodho ha'y wiska y'n vantell ha gorra an efod warnodho ha kelmi grogys an efod a-dro dhodho. 8Hag ev a worras an lurik warnodho ha gorra ynno an Urim ha'n Thummim. 9Hag ev a worras an tulyfant war y benn ha war an tulyfant war y dal ev a worras an vedalenn owrek, an gurun sans, dell erghis an Arloedh dhe Moyses.

10Ha Moyses a gemmeras oyl an untyans hag untya an tabernakel ha pup-tra esa ynno ha'ga sanshe. 11Hag ev a skoellyas rann anodho war an alter seythgweyth hag untya an alter hag oll an lestri anodho, ha'n wolghell ha'y sel, dh'aga sanshe. 12Hag ev a dhinewis rann a oyl an untyans war benn Aron ha'y untya dh'y sanshe. 13Ha Moyses a dhros mebyon Aron ha'ga gwiska yn powsyow, ha'ga grogysa gans grogysyow pann ha kelmi kappow warnedha, dell erghis an Arloedh dhe Moyses.

Offrynnow Urdhyans

14Hag ev a dhros an lodhen rag an offrynn pegh, hag Aron ha'y vebyon a worras aga diwleuv war benn lodhen an offrynn pegh. 15Hag ev a'n ladhas; ha Moyses a gemmeras an goes ha'y worra gans y vys war gern an alter a-dro ha purhe an alter ha dinewi an goes war woeles an alter, dhe wul dehwelyans warnodho. 16Hag ev a gemmeras an blonek esa war an pottys ha stagell an avi ha'n dhiwloneth ha'ga blonek ha Moyses a's loskas war an alter. 17Mes ev a gowlloskas an lodhen, y gneus ha'y gig ha'y gawgh, yn-mes a'n kamp, dell erghis an Arloedh dhe Moyses.

18Hag ev a dhros hordh an offrynn leskys, hag Aron ha'y vebyon a worras aga diwleuv war benn an hordh. 19Hag ev a'n ladhas, ha Moyses a skoellyas an goes war an alter a-dro. 20Hag ev a droghas an hordh yn temmyn ha Moyses a loskas an penn ha'n temmyn ha'n soev. 21Hag ev a wolghas an pottys ha'n garrow yn dowr, ha Moyses a loskas an hordh dien war an alter avel offrynn leskys, sawer plegadow, offrynn dre dan dhe'n Arloedh, dell erghis an Arloedh dhe Moyses.

22Hag ev a dhros an hordh arall, hordh an urdhyans, hag Aron ha'y vebyon a worras aga diwleuv war benn an hordh. 23Hag ev a'n ladhas, ha Moyses a gemmeras rann a'n goes ha'y worra war vin skovarn dhyghow Aron ha war veus y leuv dhyghow ha war veus y droes dyghow. 24Hag ev a dhros mebyon Aron, ha Moyses a worras rann a'n goes war vin aga skovarn dhyghow ha war veus aga leuv dhyghow ha war veus aga throes dyghow, ha Moyses a skoellyas an goes war an alter a-dro. 25Hag ev a gemmeras an blonek ha'n lost blonegek, hag oll an blonek war an pottys, ha stagell an avi ha'n dhiwloneth ha'ga blonek ha'n vordhos dhyghow. 26Hag yn-mes a'n ganstell a vara heb goell esa dherag an Arloedh, ev a gemmeras unn desenn rond a vara heb goell, hag unn desenn rond a vara gwrys gans oyl, hag unn desenn danow, ha'ga gorra war an blonek ha war an vordhos dhyghow. 27Hag ev a worras pup-tra war dhiwleuv Aron ha war dhiwleuv y vebyon, ha'ga gwevya dherag an Arloedh rag offrynn gwevys dherag an Arloedh. 28Ha Moyses a's kemmeras dhiworth aga diwleuv ha'ga leski war an alter war an offrynn leskys. Offrynn urdhyans veu, sawer plegadow, offrynn dre dan dhe'n Arloedh. 29Ha Moyses a gemmeras an vronn ha'y gwevya avel offrynn gwevys dherag an Arloedh. Rann Moyses ova a hordh an urdhyans, dell erghis an Arloedh dhe Moyses.

30Ha Moyses a gemmeras rann a oyl an untyans hag a'n goes esa war an alter ha'y skoellya war Aron ha war y dhillas, ha war y vebyon ha war dhillas y vebyon ganso; hag ev a sanshas Aron, ha'y dhillas, ha'y vebyon, ha dillas y vebyon ganso.

31Hag yn-medh Moyses dhe Aron ha'y vebyon, ‘Bryjyewgh an kig orth daras tylda an kuntelles ha'y dhybri ena gans an bara usi yn kanstell an offrynn urdhyans, dell erghis vy, ow leverel, “Aron ha'y vebyon a'n deber.” 32Ha'n pyth yw gesys a'n kig ha'n bara, hwi a lesk gans tan. 33Ha dres seyth dydh nyns ewgh hwi yn-mes a dharas tylda an kuntelles erna vo kowlwrys dydhyow agas urdhyans, rag dres seyth dydh ev a wra agas urdhya. 34Kepar dell wrug an jydh ma, yndella re erghis an Arloedh, dhe wul dehwelyans ragowgh. 35Ytho hwi a drig orth daras tylda an kuntelles dydh ha nos dres seyth dydh, hag gwitha charj an Arloedh ma na verwowgh, rag yndella yth yw erghys dhymm.’ 36Ytho Aron ha'y vebyon a wrug pup-tra a veu erghys dre leuv Moyses.