An Ethves Dydh wosa an Urdhyansow

1Ha'n ethves dydh, Moyses a elwis Aron ha'y vebyon ha henavogyon Ysrael. 2Hag ev a leveris dhe Aron, ‘Kemmer leugh yowynk rag offrynn pegh ha hordh rag offrynn leskys, heb namm aga dew, ha'ga offrynna dherag an Arloedh. 3Ha ty a gews orth mebyon Ysrael, ow leverel, “Kemmer bogh rag offrynn pegh, ha leugh hag oen, unn bloedh aga oes ha heb namm, rag offrynn leskys. 4Hag ynwedh ojyon ha hordh rag offrynnow kres dhe sakrifia dherag an Arloedh, hag offrynn greun kemmyskys gans oyl, rag hedhyw an Arloedh a omdhiskwedh dhywgh.” ’ 5Hag i a dhros an pyth a erghis Moyses dherag tylda an kuntelles hag oll an kuntelles a dheuth nes ha sevel dherag an Arloedh. 6Hag yn-medh Moyses, ‘Hemm yw an pyth a erghis an Arloedh may hwrellewgh, ha glori an Arloedh a vydh owth omdhiskwedhes dhywgh.’ 7Hag yn-medh Moyses dhe Aron, ‘Ke bys y'n alter hag offrynn dha offrynn pegh, ha'th offrynn leskys ha gul dehwelyans a-barth dhis dha honan hag a-barth an bobel, ha gwra offrynn an bobel, ha gul dehwelyans ragdha, dell erghis an Arloedh.’

8Ytho Aron a dheuth nes dhe'n alter ha ladha leugh an offrynn pegh o ragdho ev y honan. 9Ha mebyon Aron a dhros an goes dhodho hag ev a droghyas y vys y'n goes ha'y worra war gern an alter ha dinewi an goes war woeles an alter. 10Mes ev a loskas an blonek ha'n dhiwloneth ha stagell avi an offrynn pegh war an alter, dell erghis an Arloedh dhe Moyses. 11Hag ev a loskas an kig ha'n kneus yn-mes a'n kamp.

12Hag ev a ladhas an offrynn leskys; ha mebyon Aron a dhros dhodho an goes, hag ev a'n skoellyas war an alter a-dro. 13Hag i a dhros dhodho an offrynn leskys ha'n temmyn anodho ha'n penn, hag ev a's loskas war an alter. 14Hag ev a wolghas an pottys ha'n garrow ha'ga leski war an offrynn leskys war an alter.

15Hag ev a dhros offrynn an bobel, ha kemmeres bogh offrynn pegh an bobel ha'y ladha ha'y offrynna rag pegh, kepar ha'n kynsa. 16Hag ev a dhros an offrynn leskys ha'y offrynna war-lergh an rewl. 17Hag ev a dhros an offrynn greun, ha kemmeres dornas anodho, ha'y leski war an alter, ryb offrynn leskys an myttin.

18Hag ev a ladhas ynwedh an ojyon ha'n hordh rag sakrifis offrynnow kres, o a-barth an bobel; ha mebyon Aron a dhros dhodho an goes, hag ev a'n skoellyas war an alter a-dro, 19ha blonek an ojyon ha'n hordh, – an lost blonegek, ha'n pyth a worher an pottys, ha'n dhiwloneth ha stagell an avi. 20I a worras an blonek war an bronnow, hag ev a loskas an blonek war an alter. 21Hag Aron a wevyas an bronnow ha'n vordhos dhyghow rag offrynn gwevys dherag an Arloedh, dell erghis Moyses.

Dyskwedhyans Glori an Arloedh

22Hag Aron a dhrehevis y leuv troha'n bobel ha'ga benniga, ha diyskynna dhiworth offrynna an offrynn pegh ha'n offrynn leskys ha'n offrynnow kres. 23Ha Moyses hag Aron eth a-berth yn tylda an kuntelles ha dos yn-mes ha benniga an bobel, ha glori an Arloedh a omdhiskwedhas dhe oll an bobel. 24Ha tan a dheuth yn-mes dhiworth an Arloedh ha kowlleski an offrynn leskys ha'n blonek war an alter. Pan y'n gwelas oll an bobel, i a armas yn lowen ha koedha war aga fasow.