Raglavar

1Lies huni re omgemmeras araya derivadow yn kempenn a-dro dhe'n taklow kowlwrys yn agan mysk, 2kepar dell vons delivrys dhyn ni gans an re o testow ha menystrys a'n ger a'n dalleth; 3ytho, yth hevelis dhymmo vy ynwedh bos 'vas skrifa dhis yn kempenn, A Theofilus gorwiw, wosa hwithra pup-tra yn kompes a'n dalleth, 4mayth aswonni surneth an dyskas a veu res dhis.

Dineythyans Yowann Besydhyer Dargenys

5Yth esa yn dydhyow Herod myghtern Yudi, oferyas, Zakaria y hanow, a asrann Abia, hag y feu dhodho gwreg, onan a vyrghes Aron, ha'y hanow Elisabeth. 6Gwiryon ens i aga dew a-wel dhe Dhuw, ow kerdhes divlam yn oll gorhemmynnow hag ordenansow an Arloedh. 7Nyns esa dhedha flogh, rag bos Elisabeth anvap, ha'n dhew anedha o gyllys pell yn aga dydhyow.

8Y hwarva, pan esa ow menystra avel oferyas yn torn y asrann a-dherag Duw, 9war-lergh us an oferyaseth, ev dhe vos dewisys dre dewlel prenn dhe leski ynkys, ow mos yn sentri an Arloedh, 10hag yth esa oll routh an bobel ow pysi a-ves yn offrynn ynkys. 11El an Arloedh a omdhiskwedhas dhodho, ow sevel a'n barth dhyghow dhe alter an ynkys. 12Ha troblys veu Zakaria orth y weles, hag own a goedhas warnodho. 13An el a leveris dhodho, ‘Na borth own, Zakaria, rag klewys re beu dha bysadow, ha'th wreg Elisabeth a dhineyth mab dhis, ha ty a'n henow Yowann; 14ha lowena ha heudhder a vydh dhis, ha lies huni a lowenha yn y enesigeth. 15Rag ev a vydh meur a-dherag an Arloedh, ha gwin ha diwes ny wra ev dhe eva mann, ha lenwys vydh ev a'n Spyrys Sans, ha henna dhiworth brys y vamm, 16hag ev a dreyl lies huni a vebyon Ysrael dhe'n Arloedh aga Duw. 17Ha mos a wra ev a-dheragdho y'n spyrys ha'n nerth a Elias dhe dreylya kolonnow tasow dhe fleghes, ha tus dhiwostydh dhe furneth tus ewnhynsek, dhe dharbari dhe'n Arloedh pobel bareusys.’ 18Ha Zakaria a leveris dhe'n el, ‘Fatell wonn vy hemma? Rag gour koth ov vy, ha'm gwreg gyllys pell yn hy dydhyow.’ 19Ha'n el a worthybis dhodho, ‘Gabriel ov vy, neb a sev a-rag Duw, ha dannvenys veuv dhe gewsel orthis, ha dhe dhri dhis an nowodhow da a hemma. 20Hag otta, avlavar vydhydh, heb galloes kewsel bys y'n jydh may hwrer an taklow ma, drefenn na gryssys dhe'm geryow, a vydh kowlwrys yn aga thermyn.’

21Hag yth esa an dus ow kortos Zakaria, ha marth a's tevo, ev dhe dhelatya mar bell y'n tempel. 22Ha pan dheuth yn-mes, ny ylli kewsel orta, hag i a wodhva ev dhe weles gwelesigeth y'n tempel; hag ev a wrug sinys orta, ha pesya avlavar. 23Ena pan veu dydhyow y wonis dhe benn, ev a omdennas dh'y ji.

24Wosa an dydhyow na, y wreg Elisabeth a gonsevyas, ha hi a omgudha pymp mis, ow leverel, 25‘Yndella re'm dyghtyas an Arloedh y'n dydhyow may hwrug vri ahanav, dhe gemmeres dhe-ves ow mewl yn mysk tus.’

Dineythyans Yesu Dargenys

26Hag y'n hweghves mis an el Gabriel a veu dannvenys gans Duw dhe sita yn Galile henwys Nazareth, 27dhe wyrghes ambosys dhe wour henwys Yosep, a ji Davydh; ha Maria o hanow an wyrghes. 28Ha'n el a dheuth a-bervedh dhedhi ha leverel, ‘Hayl, leun a ras, an Arloedh genes. Bennigys os yn mysk benynes.’1:28 War-lergh re a'n dornskrifow nyns usi omma an geryow bennigys os yn mysk benynes. 29Mes troblys yn feur veu hi gans y lavar, ha hi a ombrederi py par salusyans a vedha hemma. 30Ha'n el a leveris dhedhi, ‘Na borth own, Maria, rag ty re gavas gras gans Duw. 31Hag otta, ty a gonsev y'th vrys ha dineythi mab, ha ty a'n henow Yesu. 32Meur vydh ev, hag ev a vydh gelwys Mab an Ughella; ha'n Arloedh Duw a re dhodho tron y das Davydh, 33ha reynya a wra war ji Yakob bynitha; ha dh'y vyghternsys ny vydh diwedh.’ 34Ha Maria a leveris dhe'n el, ‘Fatell vydh hemma, a-ban na aswonnav gour?’ 35Ha'n el a worthybis dhedhi, ‘An Spyrys Sans a dheu warnas, ha nerth an Ughella a'th worskeus; rakhenna an flogh a vydh genys1:35 genys: War-lergh niver byghan a dhornskrifow genys dhiworthis. a vydh gelwys Mab Duw. 36Hag otta, Elisabeth dha geniterow, hi ynwedh, re gonsevyas mab yn hy hothni, ha hemm yw an hweghves mis gensi, neb a veu gelwys anvap; 37rag gans Duw ny vydh travyth dres y alloes.’ 38Ha Maria a leveris, ‘Awotta maghteth an Arloedh; re bo dhymm war-lergh dha er.’ Ha'n el a omdennas dhiworti.

Maria A dhe Weles Elisabeth

39Y'n dydhyow na Maria a sevis ha mos yn unn fyski dhe'n vro venydhyek, dhe sita a Yuda, 40ha hi eth yn chi Zakaria ha salusi Elisabeth. 41Ha pan glewas Elisabeth salusyans Maria, an flogh a lammas yn hy brys; hag Elisabeth a veu lenwys a'n Spyrys Sans, 42ha hi a grias gans kri ughel, ‘Bennigys osta yn mysk benynes, ha bennigys yw frut dha vrys. 43Ha prag yth yw hemma grontys dhymm, mamm ow Arloedh dhe dhos dhymmo vy? 44Rag otta, pan dheuth lev dha salusyans dhe'm diwskovarn, an flogh a lammas y'm brys gans joy. 45Ha gwynn hy bys neb a grysis y fedha kollenwys an taklow a veu leverys dhedhi dhiworth an Arloedh.’

Kan Maria, Magnificat

46Ha Maria a leveris,

‘Ow enev a veurha an Arloedh,

47ha'm spyrys re lowenhas yn Duw ow Selwyas,

48rag ev re viras war uvelder1:48 uvelder: Po studh isel. y vaghteth.

Rag otta, alemma rag oll an henedhow a'm gelow gwynnvys;

49rag ev neb yw galloesek re wrug oberow meur ragov,

ha sans yw y hanow ev,

50hag yma y dregeredh a unn henedh dhe'n nessa

dhe'n re a berth own anodho.

51Ev re dhiskwedhas nerth der y vregh,

ev re skattras an re woethus yn preder aga holonn.

52Ev re worras tus alloesek1:52 tus alloesek: Po rewloryon. dhe'n leur dhiworth aga seow,

ha re dhrehevis an re uvel.

53Ev re lenwis an re nownek a bythow da,

ha'n dus rych ev re dhannvonas dhe-ves gwag.

54Ev re weresas Ysrael y was,

ow perthi kov a'y dregeredh,

55par dell ambosas dh'agan tasow,

Abraham ha'y has bys vykken.’

56Ha Maria a wortas gensi a-dro dhe dri mis, ha hi a dhehwelis dh'y chi hy honan.

Dineythyans Yowann Besydhyer

57Ha'n termyn a veu kowlwrys rag Elisabeth dhe dhineythi, ha hi a dhineythis mab. 58Ha'y hentrevogyon ha'y neskerens a glewas an Arloedh dhe dhiskwedhes tregeredh veur dhedhi, hag i a lowenhi gensi.

59Hag y'n ethves dydh i a dheuth dhe drodreghi an flogh hag i a'n henwis Zakaria war-lergh hanow y das. 60Mes y vamm a worthybis, ‘Na wrewgh, mes henwys vydh ev Yowann.’ 61Hag i a leveris dhedhi, ‘Nyns eus denvyth a'th neskerens henwys gans an hanow ma.’ 62Hag i a wre sinys dh'y das, pandr'a vynna y vos henwys. 63Hag ev a wovynnas legh-skrifa, ha skrifa, ‘Yowann yw y hanow ev.’ Hag i oll a's teva marth. 64Desempis igerys veu y anow, ha'y daves, hag ev a gewsi, ow kormel Duw. 65Own a dheuth war oll aga hentrevogyon; hag yth esa oll an taklow ma derivys a-les yn oll an vro venydhyek a Yudi, 66ha seul a's klewas a's gorras yn aga holonn, ow leverel, ‘Ytho, pandr'a vydh an flogh ma?’ Hag yth esa leuv an Arloedh ganso.

Profoesans Zakaria

67Ena y das Zakaria a veu lenwys a'n Spyrys Sans, hag ev a brofoesas, ow leverel,

68‘Benniges re bo an Arloedh, Duw Ysrael;

rag ev re dheuth dhe weles y bobel ha'ga dasprena,

69ha drehevel korn a selwyans ragon

yn chi Davydh y was;

70kepar dell gewsis seuladhydh dre anow y brofoesi sans,

71selwyans dhiworth agan eskerens, ha dhiworth dorn oll an re a'gan kas;

72dhe wul tregeredh dh'agan tasow,

ha dhe berthi kov a'y gevambos sans,

73an ti a dos orth Abraham agan tas:

ev dhe wrontya dhyn ni 74ma'n serfyn ev heb own,

livrys mes a dhorn agan eskerens1:74 mes a dhorn agan eskerens: War-lergh re a'n dornskrifow mes a dhorn eskerens. 75yn sansoleth hag ewnder

a-dheragdho oll dydhyow agan bewnans.

76Ha ty, flogh, a vydh gelwys profoes an Ughella,

rag ty a gerdh a-rag fas an Arloedh, dhe bareusi y fordhow,

77dhe ri skians a selwyans dh'y bobel

yn dehwelyans aga feghosow,

78dre druedh medhel agan Duw,

may teu dh'agan visitya an jydh-tardh a'n ughelder,

79dhe ri golow dhe'n re esedhys yn tewlder hag yn skeus ankow,

ha dhe hembronk agan treys yn fordhow kres.’

80Ha'n flogh a devi, hag omgrevhe yn spyrys; hag yth esa y'n difeythtiryow bys yn dydh y omdhiskwedhyans dhe Ysrael.