Kannasedh an Dewdhek ha Tri-ugens

1Wosa hemma, an Arloedh a apoyntyas dewdhek ha tri-ugens10:1 dewdhek ha tri-ugens: War-lergh re a'n dornskrifow deg ha tri-ugens. arall ha'ga dannvon dew ha dew a-dheragdho dhe bub sita ha tyller may fynna ev mos. 2Yn-medh ev dhedha, ‘An drevas yw meur, mes an oberwesyon yw boghes; ytho pysewgh Arloedh an drevas may tannvonno gonisysi bys yn y drevas. 3Ewgh; awotta, my a'gas dannvon yn-mes avel eyn yn mysk bleydhi. 4Na degewgh pors, na skryp, nag eskisyow, ha na salusewgh denvyth war an fordh. 5Hag yn py chi pynag yth ellowgh, leverewgh kyns oll, “Kres dhe'n chi ma.” 6Ha mars eus mab a gres ena, agas kres a bowes warnodho; mes mar nyns eus, ev a dhehwel dhywgh. 7Gortewgh y'n keth chi na ow tybri hag owth eva pypynag a rollons, rag gwiw dhe'n oberwas yw y arveth. Na wrewgh sommys a unn chi dhe ji arall. 8Ha dhe by sita pynag yth ellowgh, hag i a'gas wolkomm, dybrewgh an pyth yw gorrys a-ragowgh; 9ha yaghhewgh an glevyon ynno ha leverel dhedha, “Gwlaskor Duw re dheuth nes dhywgh.” 10Mes dhe by sita pynag yth ellowgh ha ny'gas wolkommons, ewgh mes yn hy stretys ha leverel, 11“Hwath an doust a'gas sita hag a len orthyn, ni a'n shak dhe-ves er agas pynn; saw godhvydhewgh hemma, gwlaskor Duw re dheuth nes dhywgh.” 12My a lever dhywgh, perthi a vydh esya rag Sodom y'n jydh na es dell vydh rag an sita na.

Go-i an Sitys na Goedhas yn Edrek

Mat 11:20-24

13‘Go-jy Korasin! Go-jy Bethsaida! Rag mar pe gwrys yn Tyr ha Sidon an oberow galloesek a veu gwrys yn agas mysk, seuladhydh i a goedhsa yn edrek, esedhys yn yskar ha lusu. 14Mes moy perthadow vydh rag Tyr ha Sidon y'n vreus es dell vydh ragowgh hwi. 15Ha ty, Kapernaum,

a vydhydh ughelhes bys yn nev?

Ty a vydh iselhes bys yn ifarn!

16‘Neb a'gas klew a'm klew vy, ha neb a'gas skon a'm skon vy; ha neb a'm skon vy a'n skon ev neb a'm dannvonas vy.’

Dehweles an Dewdhek ha Tri-ugens

17Ha'n dewdhek ha tri-ugens10:17 dewdhek ha tri-ugens: War-lergh re a'n dornskrifow deg ha tri-ugens. a dhehwelis gans lowena, ow leverel, ‘Arloedh, ynwedh an dhywolow yw gorrys yn-dannon y'th hanow jy!’ 18Hag ev a leveris dhedha, ‘My a weli Satnas avel lughesenn ow koedha dhiworth nev. 19Awotta, my re ros dhywgh awtorita dhe drettya war serf ha skorpyons, ha war oll galloes an eskar, ha ny wra travyth agas pystiga mann. 20Byttegyns na lowenhewgh yn henna, an spyrysyon dhe vos gorrys yn-dannowgh, mes lowenhewgh rag agas henwyn dhe vos skrifys y'n nevow.’

Heudhder Yesu

Mat 11:25-27, 13:16-17

21Y'n eur na, ev a veu pur heudhik y'n Spyrys Sans10:21 y'n Spyrys Sans: War-lergh re a'n dornskrifow y'n spyrys. ha leverel, ‘My a'th wormel, A Das, Arloedh nev ha nor, drefenn ty dhe gudha an taklow ma dhiworth an re fur ha skiansek, ha'ga diskudha dhe fleghesigow; ya, A Das, rag yndella re beu dha vodh. 22Pup-tra10:22 Pup-tra re beu: War-lergh re a'n dornskrifow Hag ow treylya trohag y dhyskyblon ev a leveris, Pup-tra re beu. re beu kemmynnys dhymm gans ow Thas, ha denvyth ny aswonn piw yw an Mab marnas an Tas, ha piw yw an Tas marnas an Mab, hag ev neb may fynn an Mab y dhiskwedhes dhodho.’

23Hag ev a dreylyas troha'n dhyskyblon ha leverel yn priva, ‘Gwynnvys an dhewlagas a wel an taklow a welowgh hwi; 24rag my a lever dhywgh, profoesi ha myghternedh bals a veu hwansek dhe weles an taklow a welowgh hwi ha ny welsons, ha klewes an taklow a glewowgh hwi ha ny glewsons.’

An Samaritan Da

25Hag awotta, neb laghyas a sevis yn-bann ha'y brevi ow leverel, ‘Mester, pandr'a wrav rag erita bewnans heb diwedh?’ 26Ev a leveris dhodho, ‘Pyth yw skrifys y'n lagha? Fatell y'n redydh?’ 27Hag ev a worthybis ha leverel, ‘Ty gwra kara an Arloedh dha Dhuw gans oll dha golonn ha gans oll dha enev ha gans oll dha nerth ha gans oll dha vrys; ha'th kentrevek avelos ty dha honan.’ 28Hag ev a leveris dhodho, ‘Ewn y hworthybsys; hemma gwra, ha ty a vew.’

29Mes ev, ow mynnes justifia y honan, a leveris dhe Yesu, ‘Ha piw yw ow hentrevek?’ 30Yesu a worthybis ow leverel, ‘Yth esa nebonan ow mos yn-nans dhiworth Yerusalem dhe Yeriko hag ev a goedhas yn mysk ladron, hag i a'n destryppyas ha'y weskel, ha mos dhe-ves, orth y asa hanter marow. 31Ha dre geslamm yth esa neb oferyas ow mos yn-nans y'n fordh na, ha pan y'n gwelas, ev a dremenas a'n eyl tenewen. 32Hag y'n keth vaner neb Levyas a dheuth dhe'n tyller, ha pan y'n gwelas, ev a dremenas a'n eyl tenewen. 33Mes unn Samaritan, ow vyajya, a dheuth nes dhodho ha'y weles, ha kemmeres truedh anodho, 34ha mos dhodho ha lystenna y woliow, ow tiveri warnedha oyl ha gwin. Ena ev a'n settyas war y asen y honan, ha'y worra dhe hostleri ha'y witha. 35Ha ternos ev a gemmeras yn-mes diw dhinerenn10:35 dhinerenn: Greka denarion. ha'ga ri dhe'n ost ha leverel, “Gwra y witha, ha pypynag moy a vynni dhe spena my a attal dhis pan dhehwelav.” 36Piw ytho a'n tri, dell dybydh, o kentrevek dhe neb a goedhas yn mysk an ladron?’ 37Hag ev a leveris, ‘Neb a gemmeras truedh anodho.’ Ha Yesu a leveris dhodho, ‘Ke, ha ty gwra y'n keth vaner.’

Yesu A dhe Martha ha Maria

38Hag i ow mos yn-rag, ev eth yn unn dre; hag unn venyn henwys Martha a'n wolkommas yn hy chi. 39Hag yth esa dhedhi hwoer henwys Maria, ha hi ynwedh o esedhys orth treys an Arloedh ow koslowes orth y eryow. 40Mes Martha o troblys drefenn an gonis pals; ytho hi a dheuth dhodho ha leverel, ‘Arloedh, a ny vern dhis ow hwoer dhe'm gasa ow honan ow servya? Lavar dhedhi ytho ma'm gweresso.’ 41Mes an Arloedh10:41 Mes an Arloedh: War-lergh re a'n dornskrifow Mes Yesu. a worthybis ha leverel dhedhi, ‘Martha, Martha, prederus osta ha troblys a-dro dhe lies tra; 42mes yma edhomm a unn dra: ha Maria re dhewisas an rann dha, na vydh kemmerys dhiworti.’