Dyskas a-dro dhe Bysadow

Mat 6:9-15, 7:7-11

1Hag y hwarva ev dhe vos ow pysi yn neb tyller, ha pan hedhis, onan a'y dhyskyblon a leveris dhodho, ‘Arloedh, dysk dhyn pysi, kepar dell dhyskas Yowann y dhyskyblon ev.’ 2Hag ev a leveris dhedha, ‘Pan wrewgh pysi, leverewgh,

A Das, sanshes re bo dha hanow;

re dheffo dha wlaskor;

3ro dhyn ni hedhyw agan bara pub-dydhyek;

4ha gav dhyn agan peghosow,

rag ni ynwedh a av dhe beub yw kendoner dhyn ni;

ha na wra agan dri yn temptasyon.’11:4 yn temptasyon: War-lergh re a'n dornskrifow yn temptasyon, mes delirv ni dhiworth an tebel el.

5Hag ev a leveris dhedha, ‘Piw ahanowgh a'n jevydh koweth ha mos dhodho yn hanter-nos ha leverel dhodho, “Koweth, prest dhymm teyr thorth-vara; 6rag ow howeth re dheuth dhymm a vyaj ha nyns eus genev travyth dhe settya a-ragdho.” 7Hag ow korthybi a'n tu a-bervedh yn-medh ev, “Na wra ow throbla; an daras yw deges, hag yma ow fleghes genev y'n gweli; ny allav sevel dhe ri dhis.” 8My a lever dhywgh, kyn na vynn sevel ha ri dhodho drefenn y vos y goweth, drefenn y donteth ev a sev ha ri dhodho pup-tra a'n jevydh edhomm anodho.

9‘Ha my a lever dhywgh, govynnewgh hag y fydh res dhywgh, hwilewgh ha hwi a gyv, knoukyewgh hag y fydh igerys dhywgh; 10rag peub hag a wovynn a dhegemmer, ha neb a hwila a gyv, ha dhe neb a gnouk y fydh igerys. 11Py den ahanowgh, orto mar kovynn y vab pysk, a re dhodho sarf yn le an pysk?11:11 War-lergh re a'n dornskrifow Py den ahanowgh, orto mar kovynn y vab bara, a re dhodho men? po mar kovynn pysk, a re dhodho sarf yn le an pysk? 12Po mar kovynn oy, a re dhodho skorpyon? 13Hwi ytho, ow pos drog, mar kodhowgh ri rohow da dh'agas fleghes, pygemmys moy y re an Tas a nev an Spyrys Sans dhe seul a wovynn orto!’

Yesu ha Belzebul

Mat 12:22-30; Mark 3:20-27

14Hag yth esa ev ow tewlel yn-mes dyowl neb o avlavar; ha pan dheuth an jowl yn-mes, an den avlavar a gewsis, ha marth a's teva an routhow. 15Mes re anedha a leveris, ‘Dre Belzebul pryns an dhywolow y tewl ev an dhywolow mes.’ 16Re erell a'n previ ha govynn orto tokyn dhiworth nev. 17Mes ev, ow kodhvos aga frederow, a leveris dhedha, ‘Pub ruvaneth rynnys er hy fynn hy honan yw difeythys; ha chi a goedh erbynn chi.11:17 ha chi a goedh erbynn chi: Po ha chi rynnys erbynn y honan a goedh. 18Mars yw Satnas ynwedh rynnys er y bynn y honan, fatell yll y ruvaneth sevel? Rag hwi a lever my dhe dewlel dywolow mes dre Belzebul. 19Ha mar towlav vy an dhywolow yn-mes dre Belzebul, dre biw y's tewl agas mebyon hwi? Rakhenna i a vydh agas breusysi. 20Mes mars yw dre vys Duw y towlav dywolow mes, ytho gwlaskor Duw yw devedhys warnowgh. 21Pan with den krev arvek y balys y honan, yma y bythow yn kres; 22mes pan dheffo warnodho den kreffa agesso, ev a gemmer dhiworto y leun-arvwisk may trestyas ynni, ha ranna y breydh. 23Neb na vo genev, er ow fynn yma; ha neb na guntell genev, skoellya a wra.

Dehweles an Spyrys Avlan

Mat 12:43-45

24‘Pan dheu spyrys avlan yn-mes a dhen, ev a dremen dre dylleryow sygh ow hwilas powesva ha ny's kyv. Ena yn-medh ev, “My a dhehwel dhe'm chi may teuth vy yn-mes anodho.” 25Ha pan yw devedhys, ev a'n kyv skubys ha tekhes. 26Ena yth a ha dri seyth spyrys arall gweth agesso y honan, hag i ow mones a-bervedh a drig ena; ha diwedh an den na yw gweth ages y dhalleth.’

Gwir Wynnvys

27Y hwarva, hag ev ow leverel hemma, unn venyn y'n routh dhe dhrehevel hy lev ha leverel dhodho, ‘Gwynnvys an dorr a'th tug ha'n dhiwvronn a'th vagas!’ 28Mes ev a leveris, ‘Kyns, gwynnvys an re a glew ger Duw ha'y witha.’

Hwilas Tokyn

Mat 12:38-42; Mark 8:12

29Ha'n routhow owth ynkressya, ev a dhallathas kewsel, ‘An henedh ma yw drog henedh; ev a hwila tokyn, ha ny vydh tokyn res dhodho marnas tokyn Yona. 30Rag kepar dell veu Yona tokyn dhe dus Nineve, yndella y fydh Mab an den dhe'n henedh ma. 31Myghternes an dhyghowbarth a sev y'n vreus gans gwer an henedh ma ha'ga dampnya; rag hi a dheuth dhiworth pennow an nor dhe glewes furneth Solomon, hag ottomma neppyth moy es Solomon. 32Gwer Nineve a sev y'n vreus gans an henedh ma ha'y dhampnya; rag i a goedhas yn edrek drefenn pregoth Yona, hag ottomma neppyth moy es Yona.

Golow an Korf

Mat 5:15, 6:22-23

33‘Ny wra denvyth, wosa enowi lugarn, y worra yn tyller kudh po yn-dann vushel, mes war wolowbrenn, may hwrello an dus a dheu a-ji gweles an golow. 34Dha lagas yw lugarn an korf. Pan vo dha lagas yagh, dha gorf oll ynwedh yw golowys; mes pan vo anyagh, dha gorf ynwedh yw tewlhes. 35Gwayt ytho na vo an golow usi ynnos devedhys ha bos tewlder. 36Ytho mars yw oll dha gorf leun a wolow, heb bos rann anodho yn tewlder, y fydh leun a wolow kepar ha pan wra lugarn dha wolowi gans y splannder.’

Kuhudhans an Fariseow ha'n Laghysi

Mat 23:1-36; Mark 12:38-40; Luk 20:45-47

37Hag ev hwath ow kewsel, unn Farise a'n gelwis dhe dhybri ganso; hag ev eth hag esedha orth an voes. 38Ha'n Farise pan y'n gwelas, marth a'n jeva na omwolghsa kynsa, kyns dybri. 39Mes yn-medh an Arloedh dhodho, ‘Lemmyn hwi Fariseow a wolgh an tu a-ves a'n hanaf ha'n skudell, mes war-ji yth owgh leun a ladrans ha droktra. 40Hwi fellyon, a ny wrug gwrier an tu a-ves gul an tu a-ji ynwedh? 41Mes rewgh alusen a'n pyth usi war-ji, hag otta pup-tra a vydh glan dhywgh.

42‘Mes go-hwi Fariseow! Rag hwi a degev menta ha ruta ha losow oll, heb gul vri a wirvreus ha kerensa Duw; y tal dhywgh gul an re ma, heb dispresya an re na. 43Go-hwi Fariseow, rag hwi a gar an penn-esedhow y'n synagys ha salusyansow y'n marghasow. 44Go-hwi, rag yth owgh hwi kepar ha bedhow nag yns merkys, ha'n dus a gerdh warnedha heb godhvos.’

45Onan a'n laghysi a worthybis ha leverel dhodho, ‘Mester, pan leverydh henna ty a'gan keredh ni maga ta.’ 46Yn-medh ev, ‘Ha go-hwi ynwedh, hwi laghysi, rag hwi a vegh tus gans beghyow re boes dhe dhoen, ha hwi agas honan ny dochyowgh an beghyow gans onan vyth a'th vysies. 47Go-hwi, rag hwi a dhrehav meyn-kov an brofoesi, mes agas tasow a's ladhas. 48Ytho hwi yw testow, owth assentya dhe wriansow agas tasow; rag i a wrug aga ladha ha hwi a dhrehav aga meyn-kov. 49Rakhenna ynwedh furneth Duw a leveris, “My a dhannvon dhedha profoesi hag abesteli, hag i a ladh ha helghya re anedha”, 50rag may fo govynnys dhiworth an henedh ma goes skoellys oll an brofoesi a-dhia dhalleth an bys, 51a-dhia woes Abel bys goes Zakaria neb a veu ledhys ynter an alter ha'n sentri; yn hwir y lavarav dhywgh, govynnys vydh a-dhiworth an henedh ma. 52Go-hwi, laghysi, rag hwi re gemmeras dhe-ves an alhwedh a wodhvos; ny wrussowgh hwi entra, ha'n re a vynna entra hwi re lettyas.’

53Hag ev ow mos alena, an skribys ha'n Fariseow a dhallathas y arvedh yn fen ha'y apposya a-dro dhe lies tra, 54orth y gontrewaytya, rag kachya neppyth a'y anow.