Gwarnyans erbynn Falsuri

1Y'n keth termyn, pan veu lies mil a'n routh kuntellys war-barth, may stankyens an eyl y gila, ev a dhallathas leverel dh'y dhyskyblon yn kynsa, ‘Omwithewgh a woell an Fariseow, yw falsuri. 2Rag nyns eus travyth kudhys na vydh diskudhys, po kel na vydh aswonnys. 3Rakhenna, pypynag a leversowgh y'n tewlder a vydh klewys y'n golow, ha pypynag a hwystersowgh y'n chambouryow a vydh pregewthys war an tohow.

Piw yw Res Perthi Own Anodho

Mat 10:28-31

4‘My a lever dhywgh, ow howetha, na berthewgh own a'n re a ladh an korf ha wosa henna ny yllons gul travyth moy. 5My a'n diskwa dhywgh, piw a berthowgh own anodho: perthewgh own a neb a yll, wosa ladha, tewlel yn ifarn.12:5 ifarn: Greka Gehenna. Ya, yn-medhav dhywgh, perthewgh own anodho ev. 6A ny werthir pymp golvan a dhew ferdhynn?12:6 ferdhynn: Greka assarion. Ha nyns yw nagonan anedha ankevys a-rag Duw. 7Mes ynwedh blewennow agas penn yw oll niverys. Na berthewgh own; hwi a dal moy ages lies golvan.

Aswonn Krist a-dherag Tus

Mat 10:32-33, 10:19-20

8‘Ha my a lever dhywgh, piwpynag a wrello ow aswonn a-rag tus, Mab an den ynwedh a wra y aswonn a-rag eledh Duw. 9Mes neb a'm denagh a-rag tus a vydh deneghys a-rag eledh Duw. 10Seul a lavarro ger erbynn Mab an den, y fydh gevys dhodho; mes neb a gabel erbynn an Spyrys Sans, ny vydh gevys dhodho. 11Ha pan y'gas drons a-rag synagys ha rewloryon ha tus awtorita, na vedhewgh prederus fatell bledyowgh agas ken, na pandr'a leverowgh; 12rag an Spyrys Sans a dhysk dhywgh y'n eur na pandr'a goedh dhywgh y leverel.’

Parabolenn an Foll Rych

13Nebonan y'n routh a leveris dhodho, ‘A Vester, lavar dhe'm broder may ranno genev vy an kemmynnro.’ 14Hag ev a worthybis dhodho, ‘A dhen, piw a'm settyas avel breusydh po mayner warnowgh?’ 15Hag yn-medh ev dhedha, ‘Bedhewgh war, hag omwithewgh a bithneth oll, rag kyn fo palster dhe dhen, ny dheu y vewnans a'y bythow.’ 16Hag ev a gewsis parabolenn dhedha, ow leverel, ‘An tir dhe unn den rych a dhug trevas dha. 17Hag ev a omwovynni, “Pandr'a wrav, rag ny'm beus le rag kuntell ow threvas war-barth?” 18Hag yn-medh ev, “Hemma a wrav; my a denn dhe'n dor ow skiberyow ha drehevel brassa, ha kuntell ena oll an greun ha'm pythow, 19ha my a lever dhe'm enev, Ty enev, yma dhis pythow lower gorrys yn gwith rag lies blydhen; gwra powes, dybri, eva, ha bos lowen.” 20Mes Duw a leveris dhodho, “Ty foll, haneth y'n nos dha enev a vydh rekwirys dhiworthis; ha'n pythow a bareussys, piw dhodho y fydhons?” 21Yndella y fydh dhe neb a guntell tresor dhodho y honan, mes nyns yw rych a-rag Duw.’

Fienasow ha Preder

22Hag ev a leveris dh'y dhyskyblon, ‘Rakhenna yn-medhav dhywgh, na wrewgh mos yn prederow a-dro dh'agas bewnans pandr'a dhebrowgh, na byth moy, a-dro dh'agas korf pandr'a wiskowgh. 23Rag bewnans yw moy ages boes, ha'n korf yw moy ages dillas. 24Mirewgh orth an brini bras: rag ny wonedhons has na ny vysons; nyns eus dhedha na gwithva na skiber, mes Duw a's mag. Pygemmys moy a bris owgh hwi ages an ydhyn! 25Ha piw ahanowgh, hag ev ow prederi, a yll keworra pols vyth dhe dhydhyow y vewnans?12:25 a yll keworra pols vyth dhe dhydhyow y vewnans: Po a yll keworra kevelin dh'y ughelder. 26Ytho mar ny yllowgh gul an taklow byghanna, prag y prederowgh a-dro dhe'n re erell? 27Mirewgh orth an lili, fatell devons; ny wrons lavurya na ny nedhons. Mes my a lever dhywgh, nag o Solomon yn oll y splannder gwiskys kepar hag onan a'n re ma. 28Ytho Duw, mar kweth yndella an gwels y'n gwel, yw bew hedhyw ha tewlys y'n forn a-vorow, pygemmys moy y hwra ev agas kwetha hwi, A hwi a voghes fydh? 29Ha hwi, na hwilewgh pandr'a dhebrowgh na pandr'a evowgh, ha na vedhewgh gyllys yn prederow. 30Rag oll kenedhlow an bys a hwila an taklow ma, ha'gas Tas a woer bos edhomm dhywgh anedha. 31Mes hwilewgh gwlaskor Duw, hag y fydh res dhywgh oll an taklow ma.

32‘Na berthewgh own, A flokk byghan, rag bodh agas Tas yw, ev dhe ri dhywgh an wlaskor. 33Gwerthewgh agas pythow ha rewgh alusen. Gwrewgh porsys dhywgh agas honan na vydhons koth, tresor y'n nevow na fyll nevra, le na dheu lader dhodho na ny wra goedhan y dhistrui. 34Rag le may ma agas tresor, ena ynwedh y fydh agas kolonn.

Kethwesyon Hewoel

Mat 24:45-51

35‘Bedhes agas diwglun grogysys, ha'gas lugern gans golow; 36ha hwi agas honan kepar ha tus ow kortos aga mester pan dhehwel dhiworth demmedhyans, mayth igorrons dhodho dison kettell dheffo ha knoukya. 37Gwynn aga bys an gethwesyon na, neb a wra an mester aga havoes difun pan dheu; yn hwir y lavarav dhywgh, ev a omwrogys, ha'ga desedha orth an voes, ha mos yn-rag dh'aga servya. 38Ha mar teffa y'n nessa po y'n tressa goel ha'ga havoes yndella, gwynn aga bys an gethwesyon na.

39‘Ha godhvydhewgh hemma, mar kodhve mester an chi py eur teffa an lader, ny wrussa gasa12:39 ny wrussa gasa: War-lergh re a'n dornskrifow ev a woelsa ha ny wrussa gasa. y ji dhe vos terrys. 40Ha hwi, bedhewgh parys, rag Mab an den a dheu yn eur ma na'n gwaytyowgh.’

41Peder a leveris, ‘Arloedh, a gewsydh an barabolenn ma ragon ni po rag pub den oll?’ 42Ha'n Arloedh a worthybis, ‘Piw ytho yw an rennyas lel ha doeth neb a re an mester dhodho charj a'y servysi dhe ri dhedha aga ewnrannow y'n seson ewn? 43Gwynnvys an kethwas na, neb a wra y vester y gavoes ow kul yndella pan dheu. 44Dhe wir y lavarav dhywgh, ev a re dhodho charj war oll y bythow. 45Mes mar lever an kethwas na yn y golonn, “Delatya a wra ow mester y dhevedhyans”, ha dalleth gweskel an wesyon ha'n maghtethyon, ow tybri hag eva hag omvedhwi, 46ena mester an kethwas na a dheu yn dydh ma na wayt hag yn eur ma na woer, ha'y gessydhya yn tynn,12:46 gessydhya yn tynn: Greka dreghi yntra dew. hag ordena dhodho le gans an dus dhislen. 47Ha'n kethwas na neb a wodhva bodh y vester mes ny ombareusis ha ny wrug herwydh y vodh a vydh gweskys gans strokosow pals. 48Mes ev neb na wodhva y vodh mes gul taklow ow tendil strokosow, a vydh boghes gweskys. Dhe neb may feu res meur, dhiworto y fydh hwilys meur, ha dhe neb may feu kemmynnys meur, hwath moy a vydh govynnys anodho.

Yesu, Acheson Rannans

Mat 10:34-36

49‘My re dheuth dhe worra tan y'n bys, hag ass ov vy hwansek ev dhe vos seulabrys gans tan! 50Yma besydh dhymm dhe vos besydhys ganso, hag ass ov vy stroethys bys pan vo kowlwrys! 51A dybowgh y hwrugavy dos rag ri kres y'n bys? Na wrug, yn-medhav dhywgh, mes rag rannans. 52Alemma rag y fydh pymp omrynnys yn unn chi, tri erbynn dew ha dew erbynn tri; 53tas a vydh rynnys erbynn mab ha mab erbynn tas, mamm erbynn myrgh ha myrgh erbynn mamm, hweger erbynn hy gohydh ha gohydh erbynn hweger.’

Dissernya an Termyn

Mat 16:2-3

54Hag ev a leveris ynwedh dhe'n routhow, ‘Pan welowgh kommolenn ow sevel y'n howlsedhes, hwi a lever dison kowas dhe dhegynsiwa, hag yndella y fydh; 55ha pan welowgh gwyns an dyghow dhe hwytha, hwi a lever y fydh toemmder, ha henna a hwer. 56Hwi falswesyon, hwi a woer dissernya enep an nor ha'n nev, ytho fatell na wodhowgh dissernya an termyn ma?

Breus hag Akord

Mat 5:25-26

57‘Prag na vreusowgh ragowgh hwi agas honan an pyth yw ewn? 58Pan edh a-rag an justis gans dha erbynner, striv bos akordys ganso war an fordh, poken ev a'th tre a-rag an breusydh, ha'n breusydh a wra dha dhelivra dhe'n gwithyas, ha'n gwithyas a wra dha dewlel yn prison. 59Yn-medhav dhywgh, ny wredh mos alena erna vo attylys an diwettha mita.’12:59 mita: Greka lepton.