Koedhewgh yn Edrek po Kewgh dhe Goll

1Y'n prys na yth esa tus ena a dherivas dhodho a-dro dhe dus Galile may kemmyskas Pilat aga goes gans aga sakrifisow. 2Hag ev a worthybis ha leverel dhedha, ‘A dybowgh tus Galile na dhe vos gweth peghadoryon es oll tus Galile erell, drefenn i dhe wodhav an taklow na? 3Nyns ens i mann, yn-medhav dhywgh, mes mar ny goedhowgh yn edrek hwi oll a dhe goll y'n keth vaner. 4Po an etek den na may koedhas warnedha an tour yn Siloam ha'ga ladha – a dybowgh i dhe vos kablus dres oll an dus erell trigys yn Yerusalem? 5Nyns ens i mann, yn-medhav dhywgh, mes mar ny goedhowgh yn edrek hwi oll a dhe goll y'n keth vaner.’

Parabolenn an Figbrenn

6Hag ev a dherivas dhedha an barabolenn ma: ‘Yth esa dhe nebonan figbrenn plynsys yn y winlann, hag ev eth dhe hwilas frut warnodho mes ny gavas. 7Hag ev a leveris dhe'n lowarther, “Otta, nans yw teyr blydhen y tov ow hwilas frut war an figbrenn ma ha ny gavav. Ytho gwra y dreghi dhe'n dor; prag y hwra ev an dor dhe vos skwithys?” 8Mes ev a worthybis ha leverel dhodho, “Arloedh, gas e an vlydhen ma ynwedh, ha my a bal a-dro dhodho ha gorra teyl; 9ha mar tokko frut y'n termyn a dheu, da; mes mar ny dheg, tregh e dhe'n dor.” ’

Yaghhe Evredhes y'n Sabot

10Yth esa ow tyski yn onan a'n synagys y'n sabot. 11Hag awotta benyn neb a's tevia spyrys a wannegredh etek blydhen, ha plegys yn dew o hi, ha ny ylli kammenn sevel a'y sav. 12Ha Yesu pan y's gwelas a elwis ha leverel dhedhi, ‘Benyn, livrys os a'th wannegredh.’ 13Hag ev a worras y dhiwleuv warnedhi; ha hware hi a sevis a'y sav ha gordhya Duw. 14Mes rewler an synaga, serrys rag Yesu dhe yaghhe yn dydh sabot, a worthybis, ha leverel dhe'n routh, ‘Yma hwegh dydh may tal oberi; dewgh ytho ynna ha bos yaghhes, a-der y'n sabot.’ 15An Arloedh a worthybis dhodho ha leverel, ‘Falswesyon, a ny wra pubonan ahanowgh y'n sabot digelmi y ojyon po y asen a'n presep ha'y hembronk dhe-ves rag gul dhodho eva? 16A ny dalvia dhe'n venyn ma, myrgh dhe Abraham, kelmys gans Satnas nans yw etek blydhen, bos livrys dhiworth an kolm ma yn dydh sabot?’ 17Hag ev ow leverel an taklow ma, oll y erbynnoryon a berthi meth, ha'n routh oll a lowenhi drefenn an oberow gloryus gwrys ganso.

Parabolenn Has Kedhow ha Goell

Mat 13:31-33; Mark 4:30-32

18Ena yn-medh ev, ‘Haval dhe bana dra yw gwlaskor Duw, ha dhe bana dra y hwrav vy hy heveli? 19Haval yw dhe hasenn kedhow a wrug nebonan hy hemmeres ha'y hasa yn y lowarth, ha hi a devis, ha dos ha bos gwydhenn veur,13:19 veur: War-lergh re a'n dornskrifow nyns usi omma an ger ma. hag yth esa ydhyn an ayr trigys yn hy skorrennow.’

20Hag arta y leveris, ‘Dhe bana dra y hwrav vy hevelebi gwlaskor Duw? 21Haval yw dhe woell a wrug benyn y gemmeres ha'y gemmyska yn tri musur13:21 musur: Greka saton. a vleus bys pan vo oll an toes sevys.’

An Porth Kul

Mat 7:13-14, 21-23

22Hag ev a dremena dre sitys ha trevow, ow tyski, hag ow lavurya troha Yerusalem. 23Nebonan a leveris dhodho, ‘Arloedh, yw boghes an re selwys?’ Hag ev a worthybis dhedha, 24‘Strivyewgh dhe vos a-bervedh der an porth kul, rag lies, yn-medhav dhywgh, a hwila mos a-ji ha ny yllons. 25Wosa mester an chi dhe sevel hag alhwedha an daras, ena hwi a sev an tu a-ves ow knoukya war an daras ow leverel, “Arloedh, igor dhyn”, hag ev a worthyp dhywgh ow leverel, “Ny'gas aswonnav, a-ble owgh.” 26Ena hwi a dhalleth leverel, “Ni a dhybris a-ragos hag eva, ha ty a dhyskas yn agan stretys.” 27Hag ev a lever dhywgh, “Ny'gas aswonnav, a-ble owgh; diberthewgh dhiworthiv, hwi dhrogoberoryon oll!” 28Hag ena y fydh oela ha skrinva dyns pan welowgh Abraham hag Ysak ha Yakob hag oll an brofoesi yn gwlaskor Duw, mes hwi tewlys yn-mes. 29Hag i a dheu a'n howldrevel ha'n howlsedhes hag a'n kledh hag a'n dyghow hag esedha orth moes yn gwlaskor Duw. 30Hag otta, yma re neb yw diwettha a vydh kynsa, hag yma re yw kynsa a vydh diwettha.’

Kynvann war Yerusalem

Mat 23:37-39

31Y'n eur na, re a'n Fariseow a dheuth, ow leverel dhodho, ‘Ke dhe-ves, ha voyd alemma, rag Herod a vynn dha ladha.’ 32Hag ev a leveris dhedha, ‘Kewgh dhe leverel dhe'n lowarn na, “Otta, my a dewl dywolow mes ha yaghhe tus hedhyw hag a-vorow, hag y'n tressa dydh my a gowlwra ow ober. 33Byttegyns res yw dhymm pesya y'n hyns hedhyw hag a-vorow ha'n jydh a siw; rag ny yll bos, profoes dhe verwel marnas yn Yerusalem.” 34Yerusalem, Yerusalem, neb a ladh an brofoesi ha labydha an re yw dannvenys dhis, peskweyth y yeunis vy kuntell dha fleghes war-barth kepar dell guntell yar hy yerigow yn-dann hy eskelli, ha ny vynnsowgh! 35Otta, agas chi yw gesys dhywgh, forsakys.13:35 War-lergh re a'n dornskrifow nyns usi omma an ger forsakys. Ha my a lever dhywgh, ny'm gwelowgh vy bys pan leverowgh, “Benniges yw neb a dheu yn hanow an Arloedh.”’