Parabolenn an Rennyas Dislel

1Hag ev a leveris ynwedh dh'y dhyskyblon, ‘Yth esa dhe dhen rych rennyas, neb a veu kuhudhys orto a skoellya y bythow. 2Hag ev a'n gelwis ha leverel dhodho, “Pyth yw hemma a glewav a-dro dhis? Ro akont a'th charj, rag ny yllydh bos rennyas namoy.” 3Ena an rennyas a leveris dhodho y honan, “Pandr'a wrav, ha'm mester ow kemmeres dhiworthiv ow soedh avel rennyas? Nyns eus genev an galloes dhe balas, meth a'm beus a veggya. 4My a woer pandr'a wrav pan viv gordhyllys a'm soedh, rag ma'm degemmerrons yn aga chiow.” 5Ytho ev a elwis dhodho kendonoryon y vester onan hag onan, ha leverel dhe'n kynsa, “A bygemmys osta yn kendon dhe'm mester?” 6Yn-medh ev, “Kans musur16:6 musur: Greka batos. a olew.” Hag ev a leveris dhodho, “Tann dha reken, esedh dison ha skrif hanter-kans.” 7Ena dhe arall y leveris, “A bygemmys osta yn kendon?” Yn-medh ev, “Kans musur16:7 musur: Greka koros. ys.” Yn-medh ev dhodho, “Tann dha reken ha skrif peswar-ugens.” 8Ha'n mester a gommendyas an rennyas dislel, rag ev dhe wul yn fur. Rag mebyon an bys ma yw moy doeth a-dro dh'aga hevoesogyon es dell yw mebyon an golow. 9Ha my a lever dhywgh, gwrewgh kowetha dhywgh agas honan a'n mammon a anwiryonedh, rag may fowgh wolkommys, pan fyll ev, bys yn annedhow heb diwedh.

10‘Neb yw lel yn tra pur vyghan yw lel ynwedh yn tra veur, ha neb yw dislel yn tra pur vyghan yw dislel ynwedh yn tra veur. 11Ytho mar ny vewgh lel y'n mammon anewn, piw a re gwir rychys yn agas charj? 12Ha mar nyns owgh hwi lel yn pythow den arall, piw a vynn ri dhywgh dha bythow dha honan? 13Ny yll servont servya dew vester; rag poken ev a gas an eyl ha kara y gila, po ev a omre dhe'n eyl ha dispresya y gila. Ny yllowgh servya Duw ha mammon.’

An Lagha ha Gwlaskor Duw

Mat 11:12-13

14Ha'n Fariseow, karoryon mona, a glewo oll an taklow ma ha skornya ganso. 15Hag ev a leveris dhedha, ‘Hwi yw an re a justifi aga honan a-wel tus, mes Duw a aswonn agas kolonn; rag an dra eksaltys yn mysk tus yw pyth kasadow a-wel Duw.

16‘Yth esa an lagha ha'n brofoesi bys Yowann: alena rag, gwlaskor Duw yw pregewthys, ha peub a omherdh ynni dre nerth. 17Esya yw, nev ha nor dhe dremena dhe-ves, es dell goettho dhe-ves unn banna a'n lagha.

18‘Piwpynag a worro y wreg dhe-ves ha demmedhi arall a wra avoutri, ha neb a dhemmedh benyn gorrys dhe-ves gans hy gour a wra avoutri.

An Den Rych ha Lazarus

19‘Yth esa den rych, neb a omwiska yn purpur ha sendal, ow kevewya yn splann pub dydh oll. 20Hag yth esa unn den boghosek, Lazarus y hanow, neb re bia gorrys orth y yet, podrek, 21hag ev hwansek dhe dhybri y walgh a'n brewyon a goedha16:21 a'n brewyon a goedha: War-lergh re a'n dornskrifow a'n taklow a goedha. a voes an den rych. Mes yth esa an keun ynwedh ow tos ha lapya y woliow. 22Ena an den boghosek a verwis hag a veu degys dhe-ves gans an eledh bys yn askra Abraham. An den rych ynwedh a verwis hag a veu ynkleudhys; 23hag yn ifarn,16:23 ifarn: Greka Hades. hag ev yn tormentys, ev a dhrehevis y dhewlagas, ha gweles Abraham y'n pellder, ha Lazarus yn y askra. 24Hag ev a elwis ha leverel, “A Das Abraham, kemmer truedh ahanav ha dannvon Lazarus rag may trogghyo bleyn y vys yn dowr ha yeynhe ow thaves, rag tormentys ov y'n flamm ma.” 25Mes Abraham a leveris, “Flogh, porth kov ty dhe dhegemmeres dha bythow da y'th vewnans, ha Lazarus y'n keth vaner an droktaklow; mes lemmyn konfortys yw ev, mes ty yw tormentys. 26Ha moy es hemma oll, yma settys islonk meur yntra ni ha hwi, rag na allo tremena a-dreus alemma dhywgh hwi neb a vynno, na treusi alena dhyn ni.” 27Mes ev a leveris, “Ytho my a'th pys, A das, y dhannvon dhe ji ow thas, 28rag yma dhymm pymp broder, dh'aga gwarnya, ma na dheffons i ynwedh bys y'n tyller ma a dorment.” 29Abraham a leveris, “Yma dhedha Moyses ha'n brofoesi; gwrens i goslowes orta i.” 30Ev a leveris, “Na, A das Abraham, mes mar teu dhedha nebonan dhiworth an re varow, y fydh edrek dhedha.” 31Ev a leveris dhodho, “Mar ny woslowons orth Moyses ha'n brofoesi, namoy ny grysons mar sev nebonan dhiworth an re varow.” ’