Lavarow a-dro dhe Beghes, Fydh ha Dever

Mat 18:6-7, 21-22; Mark 9:42

1Ev a leveris dh'y dhyskyblon, ‘Ny yll bos na dheffo sklanderyow, mes go-ev an den may tons dredho. 2Gwell via ragdho men-melin dhe vos gorrys a-dro dh'y gonna hag ev dhe vos tewlys y'n mor, kyns ev dhe wul onan a'n re vyghan ma dhe drebuchya. 3Bedhewgh war! Mar pegh dha vroder, gwra y geredhi; ha mar koedh yn edrek, gav dhodho. 4Ha mar pegh ev seythgweyth yn unn jydh er dha bynn ha treylya dhis seythgweyth ow leverel “Edrek a'm beus”, res yw ty dhe ava dhodho.’

5Ha'n abesteli a leveris dhe'n Arloedh, ‘Gwra kressya agan fydh.’ 6An Arloedh a leveris, ‘Mara'gas be fydh avel has kedhow, hwi a lavarsewgh dhe'n sykaminwydhenn ma, “Bydh ty diwreydhys ha plynsys y'n mor”, ha gostydh dhis y fia.

7‘Piw ahanowgh, ha dhodho kethwas owth aras po ow pugelya, pan dheu ev a-ji dhiworth an gwel a lever dhodho, “Deus omma hware, hag esedh orth an voes”? 8A ny lever dhodho, “Pareus neppyth dhymm rag kinyow, omwisk, ha'm serv erna worfenniv dybri hag eva; ha wosa henna gwra ty dybri hag eva”? 9A wra ev grassa dhe'n kethwas na a wul an pyth a veu erghys dhodho?17:9 dhodho? War-lergh re a'n dornskrifow dhodho? Ny'n sopposyav. 10Yndella hwi ynwedh, pan wrussowgh pup-tra a veu erghys dhywgh, leverewgh, “Kethwesyon anwiw on ni, ny wrussyn namoy es agan dever.” ’

Glanhe Deg Klavorek

11Hag ev ow mos troha Yerusalem, ev a dremenas der an pow yntra Samaria ha Galile. 12Ha pan entras yn unn dre, deg gour klavorek a dheuth er y bynn, ow sevel a-bell, 13hag i a dhrehevis aga lev ow leverel, ‘Yesu, Mester, kemmer truedh ahanan!’ 14Ha pan y's gwelas ev a leveris dhedha, ‘Kewgh, omdhiskwedhewgh agas honan dhe'n oferysi.’ Hag i ow mos yn-kerdh, glanhes vons. 15Mes onan anedha, ow kweles ev dhe vos sawys, a dhehwelis, ow ri glori dhe Dhuw, ughel y lev; 16hag ev a goedhas war y fas orth treys Yesu ha grassa dhodho. Samaritan o ev. 17Ha Yesu a worthybis ow leverel, ‘A ny veu deg glanhes? Ple'ma'n naw arall? 18A ny veu kevys marnas an alyon ma ow tehweles dhe ri glori dhe Dhuw?’ 19Hag yn-medh ev dhodho, ‘Sav yn-bann, ha ke; dha fydh re'th sawyas.’

Devedhyans an Wlaskor

Mat 24:23-28, 37-41

20Pan veu govynnys orto gans an Fariseow p'eur teffa gwlaskor Duw, ev a worthybis dhedha ow leverel, ‘Ny dheu gwlaskor Duw yn fordh a yllir y hwithra; 21ha ny leverons, “Ottomma hi”, po “Ottena hi.” Rag otta, yma gwlaskor Duw yn agas mysk17:21 yn agas mysk: Po a-bervedh ynnowgh. .’

22Ena yn-medh ev dh'y dhyskyblon, ‘An dydhyow a dheu pan yeunowgh gweles onan a dhydhyow Mab an den, mes ny'n gwelowgh. 23Hag i a lever dhywgh, “Ottena ev”, po “Ottomma ev”; na gewgh yn-kerdh, na poenya war aga lergh. 24Rag kepar dell wra an lughesenn lughesi, ow kolowi a'n eyl tu yn-dann nev bys dh'y gila, yn kettella y fydh Mab an den yn y jydh ev. 25Mes kyns oll res yw ev dhe wodhav lies tra ha bos neghys gans an henedh ma. 26Ha kepar dell veu yn dydhyow Noy, yn kettella y fydh ynwedh yn dydhyow Mab an den; 27yth esens ow tybri hag eva, demmedhi ha ri yn demmedhyans, bys y'n jydh mayth eth Noy a-bervedh y'n gorhel, ha'n liv a dheuth ha'ga distrui yn kettep penn. 28Y'n keth vaner, kepar dell veu yn dydhyow Lot, yth esens ow tybri, eva, prena, gwertha, plansa, drehevel; 29y'n jydh mayth eth Lot yn-mes a Sodom, tan ha loskven a goedhas avel glaw dhiworth nev ha'ga distrui yn kettep penn. 30Yn kettella y fydh y'n jydh may fydh diskudhys Mab an den. 31Y'n jydh na, neb eus war an to ha'y bythow y'n chi, na wres ev mos yn-nans rag aga hemmeres; ha neb eus y'n gwel keffrys, na dreylyes war-dhelergh. 32Perthewgh kov a wreg Lot. 33Piwpynag a hwillo gwitha y vewnans a'n kyll, mes piwpynag a'n kollo a wra y witha. 34My a lever dhywgh, an nos na y fydh dewdhen yn unn gweli: an eyl a vydh kemmerys, y gila a vydh gesys. 35Y fydh diw venyn ow melyas bleus war-barth: an eyl a vydh kemmerys, hy ben a vydh gesys. 36Dew dhen a vydh y'n gwel: an eyl a vydh kemmerys, y gila a vydh gesys.’17:36 Nyns usi gwers 36 yn re a'n dornskrifow. 37Hag i a worthybis dhodho ow leverel, ‘Ple, Arloedh?’ Ev a leveris dhedha, ‘Le may fo an korf, ena ynwedh yth omguntell an eryon.’