Parabolenn an Wedhwes ha'n Justis

1Ev a dherivas parabolenn dhedha, bos res dhedha pysi pup-prys, heb bos digolonnek, 2ow leverel, ‘Yth esa justis yn unn sita neb na'n jeva naneyl own a Dhuw, na revrons orth denvyth. 3Yth esa gwedhwes y'n sita na neb a wre dos dhodho ha leverel, “Ro dhymm gwirvreus erbynn ow erbynner.” 4Ev a skonyas pol'ta, mes wortiwedh yn-medh ev ynno y honan, “Hwath kyn na'm beus own a Dhuw na revrons orth denvyth, 5rag bos an wedhwes ma orth ow ankombra, my a re dhedhi gwirvreus, ma na dheffo hi wortiwedh ha'm arvedh.” ’18:5 ha'm arvedh: Po ha boksusi ow fas. 6Yn-medh an Arloedh, ‘Goslowewgh dhe'n pyth a lever an justis kammhynsek. 7A ny wra Duw gwirvreus rag y dus dhewisys a gri warnodho dydh ha nos; a vydh ev lent ow kweres dhedha? 8Lavarav dhywgh, ev dhe wul gwirvreus ragdha hware. Mes pan dheu Mab an den, a gyv ev fydh war an nor?’

Parabolenn an Farise ha'n Toller

9Hag ev a gewsis an barabolenn ma dhe dus neb a drestya ynna i aga honan, i dhe vos gwiryon, ha dispresya tus erell: 10‘Dew dhen a yskynnas dhe'n tempel rag pysi, an eyl Farise ha'y gila toller. 11An Farise a sevis ha pysi yndella orto y honan: “Duw, my a woer gras dhis nag ov vy avel tus erell, ladron, tus gammhynsek, avoutroryon, nag ynwedh avel an toller ma. 12My a wra penys heb dybri diwweyth y'n seythun, my a re dega a bup-tra a dhendilav.” 13Mes an toller a sevis a-bell ha ny vynni na hwath drehevel y dhewlagas dhe nev, mes ev a weskis y vronn ha leverel, “Duw, kemmer truedh ahanav, peghador.” 14My a lever dhywgh, an den ma a dhehwelis tre justifiys, a-der an den arall; rag peub a omughelha a vydh dres isel, mes neb a omiselha a vydh ughelhes.’

Yesu a Vennik an Fleghesigow

Mat 19:13-15; Mark 10:13-16

15Hag i a dhri dhodho ynwedh fleghesigow may hwrella aga thochya; mes pan welas an dhyskyblon henna i a geredhis an dus. 16Mes Yesu a elwis an fleghesigow dhodho ha leverel, ‘Gesewgh an fleghesigow dhe dhos dhymm ha na wrewgh aga lettya, rag dhe re a'n par ma yw gwlaskor Duw. 17Yn hwir y lavarav dhywgh, piwpynag na dhegemmerro gwlaskor Duw avel fleghik, ev ny enter dhedhi mann.’

An Rewler Rych

Mat 19:16-30; Mark 10:17-31

18Unn rewler a wovynnas orto, ‘Mester mas, pandr'a wrav rag erita bewnans heb diwedh?’ 19Yesu a worthybis dhodho, ‘Prag y'm gelwydh mas? Nyns eus nagonan mas saw unnsel Duw. 20Ty a woer an gorhemmynnow: “Na wra avoutri, Na ladh, Na lader, Na dhog kamm dustuni, Enor dha das ha'th vamm.” ’ 21Yn-medh ev, ‘My re withas oll an re ma a-dhia'm yowynkneth.’ 22Pan glewas Yesu henna, yn-medh ev dhodho, ‘Hwath unn dra a fyll dhis: gwerth pup-tra eus dhis ha'y ranna dhe'n voghosogyon, ha ty a' fydh tresor y'n nevow, ha deus, hol vy.’ 23Mes pan glewas hemma ev a dheuth ha bos pur drist, rag fest rych o ev. 24Yesu a viras orth an den neb o devedhys ha bos trist, ha leverel, ‘Ass yw kales dhe neb a's teves rychys entra dhe wlaskor Duw! 25Rag esya yw kowrvargh dhe dremena dre graw naswydh es dell yw dhe dhen rych entra dhe wlaskor Duw.’

26Yn-medh an re a'n glewas, ‘Piw ytho a yll bos selwys?’ 27Yn-medh ev, ‘Taklow na yll tus aga gul, Duw a yll aga gul.’

28Yn-medh Peder, ‘Otta, ni re asas pup-tra ha'th holya.’ 29Yn-medh ev dhedha, ‘Yn hwir y lavarav dhywgh, nyns eus denvyth neb re asas chi po gwreg po breder po kerens po fleghes a-barth gwlaskor Duw 30neb na dhegemmer arta lieskweyth moy y'n termyn ma ha bewnans heb diwedh y'n oes a dheu.’

An Tressa Gweyth Yesu a Dhargan y Vernans ha'y Dhasserghyans

Mat 20:17-19; Mark 10:32-34

31Ena ev a gemmeras an dewdhek a'n eyl tu ha leverel dhedha, ‘Otta, ni a yn-bann dhe Yerusalem, ha pup-tra skrifys gans an brofoesi a-dro dhe Vab an den a vydh kowlwrys. 32Rag ev a vydh daskorrys dhe'n Jentilys, hag a vydh skornys ha despitys ha trewa a wrons warnodho; 33ha wosa y skorjya i a'n ladh; ha'n tressa dydh ev a dhassergh.’ 34Mes ny gonvedhsons travyth a hemma, ha'n lavar ma a veu kudhys ragdha, ha ny wodhyens styr an pyth a leveris.

Yaghhe Beggyer Dall ogas dhe Yeriko

Mat 20:29-34; Mark 10:46-52

35Hag y hwarva, pan esa ow tos nes dhe Yeriko, yth esa unn den dall esedhys ryb an fordh ow peggya; 36ev a glewas routh ow tremena hag a wovynni pandr'a ve hemma. 37I a leveris dhodho, ‘Yma Yesu a Nazareth ow tremena dreson.’ 38Hag ev a armas, ‘Yesu, Mab Davydh, kemmer truedh ahanav!’ 39An dus neb a gerdhi a-rag a'n koskas may tawa, mes ev a armas dhe voy, ‘Mab Davydh, kemmer truedh ahanav!’ 40Ena Yesu a sevis hag erghi may fe dres dhodho; ha pan dheuth nes, ev a wovynnas orto, 41‘Pandr'a vynnydh orthiv dhe wul?’ Ev a leveris, ‘Arloedh, may hwelliv arta.’ 42Ha Yesu a leveris dhodho, ‘Gwel ty arta: dha fydh re'th sawyas.’ 43Ha dison ev a allas gweles, hag a'n holyas, ow ri glori dhe Dhuw. Ha pan welsons hemma, an bobel oll a wormolas Duw.