Yesu ha Zakkeus

1Hag ev a entras dhe Yeriko, ow tremena dredhi. 2Hag awotta gour, Zakkeus y hanow, neb o penn-toller, ha den rych; 3yth esa ow hwilas gweles piw o Yesu, mes ny ylli drefenn an routh, rag den byghan o ev. 4Ytho ev a boenyas yn-rag hag yskynna yn sykomorwydhenn rag y weles, rag ev dhe dremena an fordh na kyns nep-pell. 5Pan dheuth dhe'n tyller, Yesu a viras war-vann ha leverel dhodho, ‘Zakkeus, deus yn-nans uskis, rag hedhyw y tal dhymm godriga y'th chi.’ 6Ev a fistenas ha dos yn-nans, ha'y wolkomma gans lowena. 7An dus oll, pan welsons hemma, a grodhvola ow leverel, ‘Ev res eth dhe godriga gans gour yw peghador.’ 8Mes Zakkeus a sevis ha leverel dhe'n Arloedh, ‘Otta, hanter ow fythow, Arloedh, my a re dhe'n voghosogyon, ha mar kwrugavy kemmeres neppyth a nebonan dre frows, my a'n daskorr pedergweyth.’ 9Hag yn-medh Yesu dhodho, ‘Hedhyw selwyans re dheuva dhe'n chi ma, rag an den ma ynwedh yw mab dhe Abraham. 10Rag Mab an den a dheuth dhe hwilas ha dhe selwel an dra yw kellys.’

Parabolenn an Deg Peuns

Mat 25:14-30

11Hag i ow koslowes hemma, ev a dherivas parabolenn moy, rag ev dhe vos ogas dhe Yerusalem hag i a dybi gwlaskor Duw dhe omdhiskwedhes ena a-dhistowgh. 12Ytho yn-medh ev, ‘Unn ughelor eth dhe wlas bell, rag may tegemmerro an myghternsys dhodho y honan, hag ena dehweles. 13Ev a elwis deg a'y gethwesyon ha ri dhedha deg peuns19:13 peuns: Greka mna. ha leverel dhedha, “Kenwerthewgh gansa bys pan dhov.” 14Mes y sojets a wre y gasa hag i a dhannvonas kannasow war y lergh ow leverel, “Ny vynnyn an den ma dhe vos myghtern warnan.” 15Mes pan dhehwelis wosa degemmeres an myghternsys ev a erghis an gethwesyon na may rosa ev an mona dhedha, dhe vos gelwys dhodho, dhe dhyski pandr'a veu prow aga henwerth.19:15 dhe dhyski pandr'a veu prow aga henwerth: War-lergh re a'n dornskrifow dhe dhyski pandra re bia gwaynys gans peub. 16An kynsa a dheuth yn-rag ha leverel, “Arloedh, dha beuns re wrug prow a dheg peuns.” 17Yn-medh ev dhodho, “Yn ta re wruss'ta, ow hethwas da! Rag ty dhe vos lel y'n mater pur vyghan ma, kemmer awtorita a-ugh deg trev.” 18Ena an nessa a dheuth ha leverel, “Dha beuns, Arloedh, re wrug pymp peuns.” 19Yn-medh ev dhodho ynwedh, “Ha ty, bydh a-ugh pymp trev.” 20Ena an arall a dheuth ha leverel, “Arloedh, otta dha beuns; my a'n gwitha saw maylys yn lien, 21rag own a'm bo ahanas, ty dhe vos den kales, ow kemmeres yn-bann an pyth na wrussys y worra yn-nans, hag ow mysi an pyth na wrussys y hasa.” 22Yn-medh ev dhodho, “Dhiworth dha anow dha honan my a'th vreus, ty gethwas drog! Ty a wodhves ow bos den kales, ow kemmeres yn-bann an pyth na wrugavy y worra yn-nans, hag ow mysi an pyth na wrugavy y hasa. 23Prag na worrsys ow mona y'n arghantti? Ena, ha my devedhys, my a'n kavsa gans prow.” 24Ha dhe'n dus ow sevel ena yn-medh ev, “Kemmer dhiworto an peuns ha'y ri dhe neb a'n jeves deg.” 25Mes yn-medhons dhodho, “Arloedh, yma dhodho deg peuns seulabrys!” 26“My a lever dhywgh, dhe beub a bewvo, y fydh res, mes dhiworto ev neb na bewvo mann y fydh kemmerys ynwedh an pyth a bew. 27Mes ow eskerens na, neb na vynnsons my dhe vos myghtern warnedha: gwrewgh aga dri omma ha'ga ladha a-dheragov.” ’

Devedhyans Yesu dhe Yerusalem yn Trygh

Mat 21:1-11; Mark 11:1-11; Yow 12:12-19

28Wosa leverel hemma, ev eth yn-rag, ow mos yn-bann dhe Yerusalem.

29Ha pan dheuth nes dhe Bethfage ha Bethani, dhe'n vre henwys an menydh Oliv, ev a dhannvonas dew a'y dhyskyblon 30ow leverel, ‘Kewgh dhe'n dre a-dal dhywgh, hag ow mos ynni hwi a gyv ebel asen stegys, ma na wrug denvyth bythkweth esedha warnodho. Gwrewgh y dhigelmi ha'y dhri omma. 31Ha mar kovynn nebonan orthowgh “Prag y'n digelmowgh?” gorthybewgh yndella, “Yma dhe'n Arloedh edhomm anodho.” ’ 32An re a veu dannvenys eth yn-kerdh, ha'y havoes poran dell lavarsa dhedha. 33Hag i ow tigelmi an ebel, y berghennogyon a leveris dhedha, ‘Prag y tigelmowgh an ebel?’ 34I a worthybis, ‘Yma dhe'n Arloedh edhomm anodho.’ 35Ytho i a'n dros dhe Yesu, ow tewlel aga mantelli war an ebel, ha gorra Yesu warnodho. 36Hag ev ow mos yn-rag, yth esens ow lesa aga mantelli war an fordh; 37ha pan dheuth nes dhe'n fordh war-nans a'n menydh Oliv, oll routh y dhyskyblon a dhallathas gormel Duw yn lowen gans lev ughel, rag oll an oberow galloesek a welsens, 38ow leverel,

‘Benniges yw an Myghtern

a dheu yn hanow an Arloedh.

Kres yn nev

ha gordhyans y'n ughelder.’

39Ha re a'n Fariseow y'n routh a leveris dhodho, ‘Mester, keredh dha dhyskyblon.’ 40Ev a worthybis, ow leverel, ‘My a lever dhywgh, mar tewons an re ma, an meyn a wra leva!’

41Ha pan dheuth nes, ow kweles an sita, ev a oelas warnedhi, 42ow leverel, ‘Mar kodhves, ty ynwedh, y'n jydh ma19:42 y'n jydh ma: War-lergh re a'n dornskrifow ynwedh yn dha jydh jy. an taklow a led dhe gres!19:42 dhe gres: War-lergh re a'n dornskrifow dhe'th kres. – mes lemmyn kudhys yns a'th tewlagas. 43Rag an dydhyow a dheu warnas, pan dhrehav dha eskerens tommenn er dha bynn hag i a omsett a-dro dhis ha'th stroetha a bub tu; 44i a'th terr dhe'n dor, ha'th fleghes ynnos, ha ny asons men war ven ynnos, rag ny aswonnsys termyn dha visitasyon.’

Glanhe an Tempel

Mat 21:12-17; Mark 11:15-19; Yow 2:13-22

45Hag ow mos y'n tempel, ev a dhallathas tewlel yn-mes an re esa ow kwertha;19:45 an re esa ow kwertha: War-lergh re a'n dornskrifow an re a wertha ynno ha'n re a varghasa. 46ow leverel dhedha, ‘Skrifys yw, “Ow chi a vydh chi a bysadow”,

mes hwi re'n gwrug fow a ladron.’

47Ha pub dydh yth esa ow tyski y'n tempel. Mes an bennoferysi ha'n skribys ha pennow an bobel a hwila y dhistrui, 48mes ny gavsons fordh dhe wul travyth, rag pub den oll a gregi war y eryow, ow koslowes.