Dineythyans Yesu

Mat 1:18-25

1Hag y hwarva y'n dydhyow na, y feu ordenans dyllys dhiworth Sesar Awgustus, oll an bys dhe vos kovskrifys. 2An kovskrif ma, an kynsa, a hwarva pan veu Kwirinius governour Syria. 3Hag yth esa pub huni ow mos dhe vos niverys, peub dh'y sita y honan. 4Ha Yosep ynwedh eth yn-bann dhiworth Galile, yn-mes a'n sita Nazareth, dhe Yudi, dhe sita Davydh, Bethlehem y hanow, rag ev dhe vos a ji hag a linyeth Davydh, 5dhe vos kovskrifys war-barth gans Maria, ambosys dhodho yn demmedhyans, ha hi gans flogh. 6Pan esens ena, kowlwrys veu an dydhyow rag hi dhe dhineythi, 7ha hi a dhineythis hy mab kynsa-genys, ha'y vaylya yn lystennow, ha'y worra a'y wrowedh yn presep, rag nag esa le ragdha y'n ostel.

An Vugeledh ha'n Eledh

8Hag yth esa bugeledh y'n pow na, trigys y'n goenyow, ow koelyas dre nos dhe witha aga flokk. 9Hag otta, el an Arloedh a sevis a-dheragdha, ha golewder an Arloedh a splannas a-dro dhedha, hag own bras a's teva. 10Ha'n el a leveris dhedha, ‘Na berthewgh own, rag otta, my a dhre dhywgh nowodhow da a lowena veur hag a vydh rag oll an bobel, 11bos genys ragowgh hedhyw yn sita Davydh Selwyas, neb yw Krist an Arloedh. 12Ha hemm yw an tokyn dhywgh: hwi a gyv baban maylys yn lystennow hag a'y wrowedh yn presep.’ 13Ha distowgh yth esa gans an el routh veur a'n lu nevek ow kormel Duw, hag ow leverel,

14‘Gordhyans y'n ughelder dhe Dhuw

hag y'n bys kres dhe dus y volonjedh da.’2:14 hag y'n bys kres dhe dus y volonjedh da: War-lergh re a'n dornskrifow hag y'n bys kres, bolonjedh da dhe dus.

15Ena, wosa an eledh dhe dhiberth dhiworta bys yn nev, yth esa an vugeledh ow leverel an eyl dh'y gila, ‘Deun ni lemmyn dhe Bethlehem ha gweles an dra ma yw hwarvedhys, a wrug an Arloedh y dhiskwedhes dhyn.’ 16Hag i a dheuth yn unn fyski ha kavoes Maria ha Yosep, ha'n baban a'y wrowedh y'n presep. 17Ha pan y'n gwelsons, i a dherivas an dra a veu leverys dhedha a-dro dhe'n flogh ma. 18Ha myns a'n klewas a's teva marth a'n taklow derivys dhedha gans an vugeledh. 19Mes yth esa Maria ow kwitha oll an taklow ma, owth ombrederi yn hy holonn. 20Ha'n vugeledh a dhehwelis, ow kordhya hag ow kormel Duw, a bup-tra a glewsens ha gweles, kepar dell veu leverys dhedha.

21Ha pan esa eth dydh kowlwrys rag y drodreghi, ev a veu henwys Yesu, an hanow res gans an el kyns ev dhe vos konsevys y'n brys.

Yesu Presentys y'n Tempel

22Ha pan veu kowlwrys dydhyow aga2:22 aga: War-lergh unn dornskrif hy. glanheans herwydh lagha Moyses, i a'n dros yn-bann dhe Yerusalem rag y brofya dhe'n Arloedh, 23(dell yw skrifys yn lagha an Arloedh, ‘Pub gorow a iger an brys a vydh gelwys sans dhe'n Arloedh’), 24ha dhe offrynna sakrifis war-lergh an pyth yw leverys yn lagha an Arloedh, ‘Kopel a durennow po diw golommenn yowynk.’

25Hag otta, yth esa den yn Yerusalem, Simeon y hanow, ha'n den ma o ewnhynsek ha len, ow kortos konfort Ysrael, hag yth esa an Spyrys Sans warnodho. 26Ha re bia diskwedhys dhodho gans an Spyrys Sans na vedha ow kweles ankow kyns ev dhe weles an Krist a'n Arloedh. 27Hag ev a dheuth der an Spyrys y'n tempel; ha'n gerens pan dhrosons an flogh Yesu a-ji rag gul ragdho war-lergh usadow an lagha, 28ev a'n kemmeras yn y dhiwvregh, ha benniga Duw ha leverel,

29‘Lemmyn, ty a as dha was dhe omdenna, A Arloedh,

herwydh dha er yn kres;

30rag ow dewlagas re welas dha selwyans,

31a bareussys a-dherag an poblow oll,

32golow rag diskwedhyans dhe'n Jentilys,

ha glori dhe'th pobel Ysrael.’

33Ha'y das ha'y vamm a's tevo marth a'n lavarow o kewsys yn y gever. 34Ha Simeon a's bennigas ha leverel dhe Varia y vamm, ‘Otta, an flogh ma yw settys rag koedha ha sevel lies yn Ysrael, ha rag tokyn a vydh skonys 35– ha kledha a wan dha enev jy ynwedh – may fo diskwedhys prederow lies kolonn.’

36Hag yth esa profoeses, Anna, myrgh Fanuel, a loeth Asher. Hi o gyllys pell yn dydhyow pals, ha re vewsa gans gour seyth blydhen a-dhia hy gwyrghsys, 37ha hi gwedhwes bys peswar bloedh ha peswar-ugens, neb na dhiberthi dhiworth an tempel, ow servya Duw gans penys ha pysadow dydh ha nos. 38Ha hi a dheuth nes y'n pols na ha grassa dhe Dhuw, ha kewsel anodho dhe beub a worta daspren Yerusalem.2:38 Yerusalem: War-lergh re a'n dornskrifow yn Yerusalem, po Ysrael

An Dehwelyans dhe Nazareth

39Ha wosa kowlwul pup-tra herwydh lagha an Arloedh, i a dhehwelis dhe Alile, dh'aga sita aga honan Nazareth. 40Ha'n flogh a devi brassa ha kreffa, lenwys a furneth, hag yth esa gras Duw warnodho.

An Flogh Yesu y'n Tempel

41Ha'y gerens e dhe Yerusalem pub blydhen dhe woel an pask. 42Ha pan veu ev dewdhek bloedh, i eth yn-bann war-lergh usadow an goel; 43ha wosa kowlwul an dydhyow, hag i ow tehweles, an flogh Yesu a wortas yn Yerusalem, ha ny wodhya Yosep na'y vamm.2:43 ha ny wodhya Yosep na'y vammWar-lergh re a'n dornskrifow ha ny wodhya y gerens. 44Ow tybi y vos y'n kowethyans, wosa mos pellder unn jydh i a'n hwila yn mysk an neskerens ha'n gothmans, 45ha rag na'n kavsons, i a dhehwelis dhe Yerusalem, orth y hwilas. 46Ena wosa tri dydh, i a'n kavas y'n tempel, esedhys yn mysk an dhyskadoryon, ow koslowes orta hag ow kovynn orta; 47hag yth esa marth gans peub a'n klewo, a'y gonvedhes ha'y worthybow. 48Ha pan y'n gwelsons sowdhenys vons i, ha'y vamm a leveris dhodho, ‘Flogh, prag y'gan dyghtsys yndella? Otta, dha das ha my re beu orth dha hwilas yn ahwer.’ 49Hag ev a leveris dhedha, ‘Prag y'm hwilewgh? A ny wodhvewgh bos res my dhe vos yn chi ow Thas?’ 50Mes ny gonvedhsons an pyth a leveris dhedha. 51Hag ev eth yn-nans gansa ha dos dhe Nazareth, hag ev o gostydh dhedha. Ha'y vamm a witha oll an lavarow ma yn hy holonn.

52Ha Yesu a devi yn furneth ha blydhynyow,2:52 blydhynyow: Po braster. hag yn gras gans Duw ha tus.