Offrynn an Wedhwes

Mark 12:41-44

1Ow mires yn-bann ev a welas an dus rych esa ow tewlel aga rohow y'n arghow. 2Hag ev a welas unn wedhwes voghosek ow tewlel dew vita21:2 vita: Greka lepton. ynni. 3Yn-medh ev, ‘Yn hwir y lavarav dhywgh, an wedhwes voghosek ma a dewlis y'n argh moy agessa i oll; 4rag oll an re ma a dewlis yn offrynnow Duw21:4 yn offrynnow Duw: War-lergh re a'n dornskrifow y'n offrynnow. dhiworth aga lanwes, mes hi dhiworth hy edhomm a dewlis oll an pygans a's tevo.’

Yesu a Dhargan Diswrians an Tempel

Mat 24:1-2; Mark 13:1-2

5Pan esa tus ow kewsel a-dro dhe'n tempel, fatell veu afinys gans meyn drudh ha rohow sakrys, yn-medh ev, 6‘An taklow a welowgh – dydhyow a dheu pan na vydh gesys men war ven, na vydh tewlys dhe'n dor.’

Toknys ha Helghyans

Mat 24:3-14; Mark 13:3-13

7I a wovynnas orto, ‘Mester, p'eur fydh hemma ytho, ha pandr'a vydh an tokyn pan vydh an taklow ma ow tegynsiwa?’ 8Yn-medh ev, ‘Gwaytyewgh ma na vowgh toellys; rag lies a dheu y'm hanow vy ow leverel, “My yw”, hag “An termyn re nesas.” Na holyewgh war aga lergh. 9Pan glewowgh a vreselyow ha deray, na gemmerewgh own; rag res yw an taklow ma dhe hwarvos kyns oll. Mes ny vydh an diwedh a-dhesempis.’ 10Ena yn-medh ev dhedha, ‘Kenedhel a sev erbynn kenedhel ha gwlaskor erbynn gwlaskor, 11y fydh dorgrysyow meur, ha divoetter ha plagys yn lies le, hag y fydh hwarvosow euthyk ha toknys meur dhiworth nev.

12‘Mes kyns hemma oll dhe hwarvos, i a dewl aga diwla warnowgh ha'gas helghya; i a'gas daskorr dhe'n synagys ha dhe brisonyow, hembrenkys dhe-ves a-rag myghternedh ha governours a-barth ow hanow vy. 13Hemma a vydh chons dhywgh rag doen dustuni. 14Settyewgh ytho yn agas kolonn, na bareusowgh agas klem yn kynsa, 15rag my a re dhywgh ganow ha furneth ma na yll oll agas erbynnoryon sevel er agas pynn na'gas kontradia. 16Hwi a vydh traytys ynwedh gans kerens, ha breder, ha neskerens, ha kowetha, ha rann ahanowgh i a worr dhe'n mernans. 17Ha hwi a vydh kesys gans pub den oll rag ow hanow vy. 18Mes ny vydh blewenn a'gas penn distruys. 19Der agas perthyans hwi a wayn agas enev.

Diswrians Yerusalem Dargenys

Mat 24:15-21; Mark 13:14-19

20‘Mes pan welowgh Yerusalem settys a-dro gans luyow, ena hwi a woer hi dhe vos difeythys yn skon. 21Ena fies dhe'n menydhyow myns a vo yn Yudi; ha dienkes myns a vo ynni, ha na entres ynni myns a vo y'n pow, 22rag hemm yw dydhyow a gessydhyans, pan vydh kowlwrys pup-tra a veu skrifys. 23Go-i an re yw gans flogh y'n dorr, ha neb a re an vronn y'n dydhyow na! Rag anken meur a dheu war an nor, ha sorr war an bobel ma; 24i a goedh dre vin an kledha hag a vydh kemmerys yn keth dhe oll an kenedhlow, ha Yerusalem a vydh trettys yn-dann dreys an Jentilys, bys pan vo termynyow an Jentilys kowlwrys.

Devedhyans Mab an Den

Mat 24:29-31; Mark 13:24-27

25‘Hag y fydh toknys y'n howl ha'n loer ha'n ster, ha war an nor angoes dhe'n kenedhlow, fienasow drefenn tarenna an mor ha'n tonnow. 26Tus a glamder rag own, ha gwaytyans a'n taklow a hwyrvydh war an nor; rag nerthow an nevow a vydh kryghyllys. 27Hag ena i a wel Mab an den ow tos yn kommolenn gans nerth ha golewder meur. 28Mes pan dhalleth an taklow ma, sevewgh yn-bann ha drehevewgh agas penn, rag agas daspren yw ogas.’

Parabolenn an Figbrenn

Mat 24:32-35; Mark 13:28-31

29Hag ev a dherivas parabolenn dhedha: ‘Mirewgh orth an figbrenn, ha'n gwydh oll; 30kettell dhelyons, hwi agas honan a wel hag a woer hav dhe vos ogas lemmyn. 31Yndella hwi ynwedh; pan welowgh an taklow ma gwrys, hwi a woer gwlaskor Duw dhe vos ogas. 32Yn hwir y lavarav dhywgh, ny dremen an henedh ma dhe-ves, erna vo oll an taklow ma gwrys. 33Nev ha nor a dremen dhe-ves, mes ow geryow vy, ny dremenons dhe-ves.

Ynnians dhe Woelyas

34‘Bedhewgh war, ma na vo agas kolonn nevra beghys gans diwessa, na medhwynsi na fienasow bewnans, ha na wrello an jydh dos warnowgh yn tromm 35avel maglenn; rag ev a dheu war bubonan eus trigys war enep oll an nor. 36Bedhewgh hewoel pup-prys, ow pysi may fo dhywgh nerth dhe fia dhiworth pup-tra eus ow tegynsiwa, ha dhe sevel a-rag Mab an den.’

37Dydhweyth yth esa ev y'n tempel ow tyski, hag yn nos ev a wre mos yn-mes ha godriga y'n vre henwys an menydh Oliv. 38Hag oll an bobel a dho dhodho y'n tempel myttin a-varr, dhe woslowes orto.