Pregoth Yowann Besydhyer

Mat 3:1-12; Mark 1:1-8; Yow 1:19-28

1Y'n pymthegves blydhen a reyn Tiberius Sesar, pan veu Pontius Pilat governour Yudi, ha Herod tetrargh Galile, ha'y vroder Felip tetrargh Iturea ha rannvro Traghonitis, ha Lysanias tetrargh Abilene, 2pan veu Annas ha Kayfas arghoferysi, ger Duw a dheuth dhe Yowann mab Zakaria y'n gwylvos. 3Hag ev a dheuth yn oll an pow a-dro dhe'n Yordan, ow pregoth besydh edrek yn dehwelyans peghosow, 4kepar dell yw skrifys yn lyver geryow Ysay an profoes,

‘Lev onan ow kria y'n gwylvos,

“Pareusewgh fordh an Arloedh,

gwrewgh kompes y hynsyow ev.

5Pub nans a vydh lenwys

ha pub menydh ha bre a vydh iselhes,

an tylleryow kamm a vydh ewnhes

ha'n tylleryow garow a vydh leven;

6hag oll kig a wel selwyans Duw.” ’

7Ytho ev a leveri dhe'n routhow a dheuth mes dhe vos besydhys ganso, ‘Askorr nadres! Piw a'gas gwarnyas dhe fia dhiworth an sorr a dheu? 8Ytho, degewgh frut gwiw rag edrek ha na dhallethewgh leverel, “Ni a'gan beus Abraham dh'agan tas.” Rag my a lever dhywgh, Duw dhe alloes drehevel fleghes dhe Abraham dhiworth an meyn ma. 9Ha lemmyn ynwedh yma an voel gorrys orth gwreydhenn an gwydh; ytho pub gwydhenn na dheg frut da yw treghys dhe'n dor ha tewlys yn tan.’

10Ha'n routhow a wovynni orto, ‘Ytho pandr'a goedh dhyn ni dhe wul?’ 11Ev a worthybis ow leverel dhedha, ‘Neb a'n jeffo dew bows, kevrennes gans neb na'n jeves nagonan, ha neb a'n jeffo boes, gwres y'n keth vaner.’ 12Ynwedh tolloryon a dheuth dhe vos besydhys ha leverel dhodho, ‘Mester, pandr'a wren?’ 13Hag ev a leveris dhedha, ‘Na guntellewgh moy es dell yw ordenys dhywgh.’ 14Ha soudoryon ynwedh a wovynni orto ow leverel, ‘Ha ni, pandr'a wren ni?’ Hag ev a leveris dhedha, ‘Na ledrewgh dre wodros dhiworth denvyth, ha na guhudhewgh yn fals, ha bedhewgh kontentys gans agas arveth.’

15Rag bos dhe'n dus gwaytyans meur, hag i oll owth omwovynn yn aga holonn a-dro dhe Yowann, mar pe ev an Krist, 16Yowann a worthybis, ow leverel dhedha i oll, ‘My dhe wir a'gas besydh gans dowr; mes nebonan yw kreffa agesov vy a dheu, ma nag ov vy gwiw dhe dhigelmi kroen y eskisyow. Ev a'gas besydh y'n Spyrys Sans ha tan. 17Yma y wynsell yn y dhorn, hag ev a burj y leur-drushya, ha kuntell an ys yn y skiber, mes an kulyn ev a lesk gans tan na yllir y dhifeudhi.’

18Ynwedh gans lies ynnians arall ev a bregowtha dhe'n bobel. 19Mes Herod an tetrargh, keredhys ganso a-dro dhe Herodias, gwreg y vroder Felip, ha rag oll an drogoberow a wrug Herod, 20a geworras hemma ynwedh dhe bup-tra arall, hag a geas Yowann yn prison.

Besydh Yesu

Mat 3:13-17; Mark 1:9-11

21Ytho wosa oll an bobel dhe vos besydhys, ha wosa Yesu ynwedh dhe vos besydhys, hag ev ow pysi, an nev a veu igerys, 22ha'n Spyrys Sans a dheuth yn-nans warnodho yn furv gorfek, kepar ha kolomm, ha lev a dheuth a nev, ‘Ty yw ow Mab karadow; ynnos yma ow delit.’

Aghskrif Yesu

Mat 1:1-17

23Ha Yesu o neb deg bloedh warn ugens pan dhallathas y venystrans, hag ev mab (dell o tybys) dhe Yosep, mab Heli, 24mab Matthat, mab Levi, mab Melki, mab Yannay, mab Yosep, 25mab Mattathias, mab Amos, mab Nahum, mab Esli, mab Naggay, 26mab Maath, mab Mattathias, mab Semein, mab Yosegh, mab Yoda, 27mab Yoanan, mab Rhesa, mab Zerubbabel, mab Shealtiel, mab Neri, 28mab Melki, mab Addi, mab Kosam, mab Elmadam, mab Er, 29mab Yoshua, mab Eliezer, mab Yorim, mab Matthat, mab Levi, 30mab Simeon, mab Yuda, mab Yosep, mab Yonam, mab Elyakim, 31mab Melea, mab Menna, mab Mattatha, mab Nathan, mab Davydh, 32mab Yesse, mab Obed, mab Boaz, mab Salmon,3:32 Salmon: War-lergh re a'n dornskrifow Sala. mab Nahshon, 33mab Amminadab, mab Admin, mab Arni,3:33 mab Amminadab, mab Admin, mab Arni: War-lergh re an dornskrifow, mab Amminadab mab Arni; po mab Amminadab mab Aram mab Yoram; po mab Amminadab mab Aram mab Admi mab Arni; po Adam mab Admin mab Arni. mab Hesron, mab Peres, mab Yuda, 34mab Yakob, mab Ysak, mab Abraham, mab Teragh, mab Nahor, 35mab Serug, mab Rew,3:35 Rew: Po Ragaw. mab Peleg, mab Eber, mab Shela, 36mab Kaynan, mab Arfaksad, mab Shem, mab Noy, mab Lamek, 37mab Methusela, mab Enok, mab Yared, mab Mahalalel, mab Kaynan, 38mab Enosh, mab Seth, mab Adam, mab Duw.