Temptyans Yesu

Mat 4:1-11; Mark 1:12-13

1Ha Yesu, leun a'n Spyrys Sans, a dhehwelis dhiworth an Yordan hag yth esa hembrenkys a-dro gans an Spyrys y'n gwylvos 2dew-ugens dydh, temptys gans an jowl. Ha ny dhybris travyth y'n dydhyow na, ha wosa i dhe worfenna, nown a'n jeva. 3Ha'n jowl a leveris dhodho, ‘Mars osta Mab Duw, argh dhe'n men ma bos bara.’ 4Ha Yesu a worthybis dhodho, ‘Skrifys yw, “Mab-den ny wra bewa unnsel orth bara.” ’4:4 orth bara: War-lergh re a'n dornskrifow orth bara, mes orth pub ger a Dhuw.

5Ena ev a'n hembronkas yn-bann ha diskwedhes dhodho oll gwlaskordhow an bys yn unn pols, 6ha'n jowl a leveris dhodho, ‘My a re dhis oll an galloes ma ha'ga splannder, rag y feu kemmynnys dhymm, ha my a'n re dhe biwpynag a vynnav; 7ytho mar kwre'ta plegya a-dheragov, oll an re ma a vydh dhis.’ 8Ha Yesu a worthybis ow leverel dhodho, ‘Skrifys yw, Ty a wra gordhya an Arloedh dha Dhuw hag ev yn unnsel ty a wra servya.’

9Ena ev a'n hembronkas dhe Yerusalem ha'y worra war bynakyl an tempel ha leverel dhodho, ‘Mars osta Mab Duw, omdowl dha honan alemma dhe'n leur; 10rag skrifys yw, “Ev a worhemmynn dh'y eledh y'th kever may hwrellens i dha witha”, 11hag arta, “Yn aga diwleuv i a'th teg, ma na dheghessi dha droes erbynn men.” ’ 12Ha Yesu a worthybis ha leverel dhodho, ‘Leverys yw, “Ny goedh dhis temptya an Arloedh dha Dhuw.” ’ 13Ha wosa gorfenna pub temptasyon an jowl a omdennas dhiworto, ow kortos termyn gwiw.

Dalleth an Menystri yn Galile

Mat 4:12-17; Mark 1:14-15

14Ena Yesu a dhehwelis yn nerth an Spyrys dhe Alile, ha son anodho eth yn-mes der oll an rannvro a-derdro. 15Hag ev a dhyski yn aga synagys, enorys gans pub den oll.

Yesu Skonys yn Nazareth

Mat 13:53-58; Mark 6:1-6

16Ena ev a dheuth dhe Nazareth, may fia megys, hag ev eth y'n synaga war-lergh y usadow yn dydh sabot, ha sevel dhe lenna. 17Hag y feu res dhodho lyver an profoes Ysay, ha wosa dirolya an lyver ev a gavas an tyller mayth o skrifys,

18‘Yma Spyrys an Arloedh warnav vy,

rag ev re'm untyas dhe dhri nowodhow da dhe'n voghosogyon;

ev re'm dannvonas4:18 ev re'm dannvonas dhe bregoth livreson: War-lergh re a'n dornskrifow ev re'm dannvonas dhe yaghhe an re trogh aga holonn, dhe bregoth livreson. dhe bregoth livreson dhe'n gethyon,

ha restorita gweles dhe'n dhellyon,

dhe dhannvon dhe-ves yn rydh an re arweskys,

19dhe bregoth blydhen gemmeradow an Arloedh.’

20Ena ev a rolyas an lyver, ha'y dhaskorr dhe'n servont, hag esedha; hag yth esa dewlagas peub y'n synaga stag warnodho. 21Hag ev a dhallathas leverel dhedha, ‘Hedhyw an skryptor ma yw kollenwys yn agas diwskovarn.’ 22Hag yth esens i oll ow tustunia a-dro dhodho, ha marth a's tevo a'n geryow a ras a dheuth a'y anow, hag yn-medhons, ‘A nyns yw hemma mab Yosep?’ 23Hag ev a leveris dhedha, ‘Sur, hwi a lever dhymm an lavar ma, “Medhek, omyaghha dha honan! Gwra omma y'th vro dha honan an taklow gwrys yn Kapernaum, dell glewsyn.” ’ 24Mes ev a leveris, ‘Yn hwir y lavarav dhywgh, nyns eus profoes vydh kemmeradow yn y vro y honan. 25Mes dhe wir my a lever dhywgh, yth esa lies gwedhwes yn dydhyow Elias yn Ysrael, pan veu an nev kes teyr blydhen ha hwegh mis, may feu divoetter meur war oll an tir. 26Mes ny veu dhe nagonan anedha i may feu Elias dannvenys dhodho, mes dhe Sarepta yn Sidon, dhe venyn o gwedhwes. 27Hag yth esa lies klavorek yn Ysrael yn termyn Elisha an profoes, mes ny veu nagonan anedha gwrys yagh marnas Naaman an Syriek.’ 28Hag oll an dus y'n synaga a veu lenwys a sorr, ow klewes an taklow ma, 29hag i a sevis yn-bann ha'y jasya yn-mes a'n sita, ha'y worra bys yn tal an vre may feu aga sita drehevys, rag ma'n deghessens yn-nans; 30mes ev, ow tremena der aga mysk, eth yn-kerdh.

An Den hag Ynno Spyrys Avlan

Mark 1:21-28

31Ena ev a dhiyskynnas dhe Kapernaum, sita yn Galile, hag yth esa orth aga dyski y'n sabot;4:31 y'n sabot: Po y'n sabotys. 32ha marth a's teva a'y dhyskas, rag bos y gows gans awtorita. 33Hag yth esa y'n synaga den ha dhodho spyrys a dhyowl avlan, hag ev a grias gans lev ughel, 34‘Ha! Pandr'a vynnydh tejy genen ni, Yesu a Nazareth? Osta devedhys rag agan diswul ni? My a'th aswonn, piw os, an Sans a Dhuw.’ 35Mes Yesu a'n keredhis ow leverel, ‘Taw, ha deus yn-mes anodho!’ Ha wosa an jowl dh'y dewlel dhe'n dor yn aga mysk, ev eth yn-mes anodho, heb y bystiga vytholl. 36Ha marth a's tevo i oll, hag yn-medhons an eyl dh'y gila, ‘Pyth yw an ger ma? Rag gans awtorita ha galloes ev a ergh dhe'n spyrysyon avlan, hag i a dheu yn-mes.’ 37Hag yth esa son anodho ow lesa dres pub tyller y'n pow a-dro.

38Ena ev a sevis ha gasa an synaga, ha dos yn chi Simon. Hweger Simon o grevys gans fevyr meur, hag i a wovynnas orto a-dro dhedhi. 39Ytho, ev a sevis a-ughti ha keski an fevyr hag ev a's gasas; ha hware hi a sevis ha'ga servya.

40Lemmyn pan veu an howl ow sedhi, oll myns a'n jeva tus klav gans divers klevesow a's dros dhodho; hag ev a worras y dhiwleuv war bubonan anedha ha'ga yaghhe. 41Ha dywolow ynwedh a dho yn-mes a lies, ow kria ha leverel, ‘Ty yw Mab Duw.’4:41 Ty yw Mab Duw: War-lergh re a'n dornskrifow Ty yw an Krist, Mab Duw. Mes ev a's keredhis, ha ny asas dhedha kewsel, rag yth aswonnsons ev dhe vos an Krist.

42Pan veu dydh devedhys ev eth dhe-ves hag omdenna dhe dyller ynyal; ha'n routhow a'n hwila hag a dheuth dhodho, ha'y lesta ma na dhibartha dhiworta. 43Mes ev a leveris dhedha, ‘Res yw dhymm pregoth gwlaskor Duw dhe'n sitys erell, drefenn rakhenna y feuv dannvenys.’ 44Hag yth esa ow pregoth yn synagys Yudi.4:44 Yudi: War-lergh re a'n dornskrifow Galile.