Terri Pennow-ys y'n Sabot

Mat 12:1-8; Mark 2:23-28

1Hag y hwarva, yth esa ev ow kerdhes der an ysegi y'n sabot,6:1 y'n sabot: War-lergh re a'n dornskrifow y'n nessa sabot wosa an kynsa. ha'y dhyskyblon a derri an pennow-ys ha'ga dybri, orth aga rutya yn aga diwleuv. 2Mes re a'n Fariseow a leveris, ‘Prag y hwrewgh an pyth nag yw lafyl y'n sabot?’ 3Ha Yesu a worthybis dhedha ow leverel, ‘A ny redsowgh hemma bythkweth, pandr'a wrug Davydh hag ev ow perthi nown, ev ha'n re esa ganso, 4fatell eth yn chi Duw ha kemmeres torthow an ragworrans ha'ga dybri, ha'ga ri dhe'n re esa ganso, nag yw lafyl dhe dhenvyth aga dybri marnas unnsel dhe'n oferysi?’ 5Hag yn-medh ev dhedha, ‘Mab an den yw Arloedh ynwedh a'n sabot.’

An Den Gwedhrys y Leuv

Mat 12:9-14; Mark 3:1-6

6Ena yn sabot arall ev eth y'n synaga ha dyski. Hag yth esa den ena, gwedhrys y leuv dhyghow. 7Ha'n skribys ha'n Fariseow a aspia gluw orto, mar mynna yaghhe y'n sabot, rag may hallens kavoes kuhudhans er y bynn. 8Mes ev, owth aswonn aga frederow, a leveris dhe'n gour gwedhrys y leuv, ‘Sav, ha deus y'n kres.’ Hag ev a sevis yn-bann, ha sevel ena. 9Ha Yesu a leveris dhedha, ‘My a wovynn orthowgh, pyneyl yw lafyl y'n sabot, gul da po gul drog, sawya enev po distrui?’ 10Hag ow mires a-dro orta i oll, ev a leveris dhodho, ‘Ystynn dha leuv.’ Ev a'n gwrug, ha'y leuv a veu restorys.6:10 a veu restorys: War-lergh re a'n dornskrifow a veu restorys, yagh avel hy ben. 11Mes i a veu lenwys a gonnar, ha dalleth omgusulya an eyl gans y gila pandr'a wrellens orth Yesu.

Dewis an Dewdhek

Mat 10:1-4; Mark 3:13-19

12Hag y'n dydhyow na, ev eth yn-kerdh dhe'n menydh dhe bysi, hag ev a spenas an nos yn pysadow dhe Dhuw. 13Ha devedhys an jydh, ev a elwis y dhyskyblon dhodho, ha dewis dewdhek dhiworta, hag ynwedh ev a's henwis abesteli, 14Simon, neb a henwis ynwedh Peder, hag Androw y vroder, ha Jamys ha Yowann ha Felip ha Bertyl 15ha Matthew ha Tommas, ha Jamys mab Alfeus ha Simon gelwys Zelotes 16ha Yudas mab Jamys ha Yudas Skaryoth neb a dheuth ha bos traytour.

Routhow Meur yn Galile

Mat 4:23-25

17Hag ev a dheuth yn-nans gansa, ha sevel yn tyller kompes, gans routh veur a'y dhyskyblon, ha niver meur a'n bobel dhiworth Yudi oll ha Yerusalem ha morrep Tyr ha Sidon, 18neb a dheuth dh'y glewes ha bos yaghhes a'ga klevesow; ha'n re troblys gans spyrysyon avlan o sawys, 19ha'n routh oll a hwila y dochya, rag nerth a dho yn-mes anodho, hag ev a yaghhi pubonan.

Bennathow ha Goyow

Mat 5:1-12

20Hag ev a dhrehevis y dhewlagas trohag y dhyskyblon ha leverel,

‘Gwynn agas bys an re yw boghosek,

rag dhywgh hwi yw gwlaskor Duw.

21Gwynn agas bys neb a berth nown lemmyn,

rag hwi a vydh lenwys.

Gwynn agas bys neb a oel,

rag hwi a hwerth.

22‘Gwynn agas bys pan wra tus agas kasa, ha pan wrons agas keas mes ha despitya ha tewlel agas hanow yn-mes avel drogoberoryon, a-barth Mab an den; 23lowenhewgh y'n jydh na, ha lemmewgh gans heudhder, rag otta, meur yw agas gober yn nev; rag y'n keth vaner y hwre aga thasow dhe'n brofoesi.

24Mes go-hwi an re rych,

rag hwi re dhegemmeras agas konfort.

25Go-hwi, yw lenwys lemmyn,

rag hwi a berth nown.

Go-hwi a hwerth lemmyn,

rag hwi a gyn hag oela.

26‘Go-hwi pan gews tus oll da a-dro dhywgh, rag y'n keth vaner y hwre aga thasow dhe'n fals profoesi.

Kerensa dhe Eskerens

Mat 5:38-48, 7:12

27‘Mes my a lever dhy'hwi neb a glew, kerewgh agas eskerens, gwrewgh da dhe'n re a'gas kas, 28bennigewgh an re a'gas millik, pysewgh rag an re a'gas despit. 29Dhe neb a'th wysk war an eyl bogh ro dhodho hy ben ynwedh, ha neb a denn yn-mes dha vantell, na skon a ri dhodho dha bows ynwedh. 30Ro dhe bubonan a wovynn orthis, ha dhiworth neb a gemmer dha bythow na hwila aga bos daskorrys. 31Ha herwydh an pyth a vynnowgh tus dhe wul orthowgh hwi, gwrewgh hwi ynwedh6:31hwi ynwedhWar-lergh re a'n dornskrifow nyns usi omma an geryow ma. y'n keth vaner orta i.

32‘Ha mar kerowgh an re usi orth agas kara hwi, pyth yw an les dhywgh? Rag an beghadoryon ynwedh a gar an re a wra aga hara i. 33Ha mar kwrewgh da orth an re a wra da orthowgh hwi, pyth yw an les dhywgh? An beghadoryon ynwedh a wra an keth tra. 34Ha mar prestewgh dhe'n re may hwaytyowgh bos attylys gansa, pyth yw an les dhywgh? Peghadoryon ynwedh a brest may tegemmerrons an keth attal. 35Mes hwi kerewgh agas eskerens ha gul da ha ri kendon heb gwaytyas attal vytholl, ha meur vydh agas gober, ha hwi a vydh mebyon an Ughella; rag kuv yw ev orth an re nag yw grasek ha'n re dhrog. 36Bedhewgh truedhek, kepar dell yw agas Tas ynwedh truedhek.

Breusi Tus Erell

Mat 7:1-5

37‘Na vreusewgh, ha ny vydhowgh breusys; na dhampnyewgh, ha ny vydhowgh dampnys; gevewgh hag y fydh gevys dhywgh. 38Rewgh, hag y fydh res dhywgh. Musur da, gweskys yn-nans, shakys war-barth, gorlenwys, a worrons yn agas askra; rag gans an musur may fusurowgh y fydh musurys arta dhywgh.’

39Hag ev a leveris parabolenn dhedha: ‘A yll den dall hembronk den dall? A ny goedh aga dew yn kleudh? 40Nyns eus dyskybel a-ugh an dyskador; mes peub yw leun-dhyskys a vydh kepar ha'y dhyskador. 41Prag y firydh orth an motta yn lagas dha vroder, mes ny verkydh an geber usi y'th lagas dha honan? 42Po fatell yllydh leverel dhe'th vroder, “Broder, gas vy dhe gemmeres an motta yn-mes a'th lagas”, mes ty dha honan ny welydh an geber usi y'th lagas jy? Ty falswas! Kyns oll, kemmer an geber yn-mes a'th lagas jy, hag ena ty a wel diblans dhe gemmeres yn-mes an motta usi yn lagas dha vroder.

Gwydhenn ha'y Frut

Mat 7:17-20, 12:34-35

43‘Rag gwydhenn dha ny dheg drog frut, na hwath ny dheg gwydhenn bodredhek frut da. 44Rag pub gwydhenn yw aswonnys dre hy frut hy honan; rag ny guntellons figys dhiworth spern, na ny derrons grappys dhiworth spedhasenn. 45An densa a dhre dader yn-mes a dresor da y golonn, ha'n drogoberer a dhre drog yn-mes a'n drog,6:45 yn-mes a'n drog: War-lergh re a'n dornskrifow yn-mes a dhroktresor y golonn. rag y anow a gews yn-mes a lanwes an golonn.

An Dhew Sel

Mat 7:24-27

46‘Prag y'm gelwewgh “Arloedh, Arloedh” ha ny wrewgh an pyth a lavarav? 47Pubonan neb a dheu dhymmo vy hag a glew ow geryow, my a dhiskwa dhywgh py par den yw ev. 48Ev yw haval dhe dhen ow trehevel chi, neb a balas yn town ha gorra selyow war an garrek; ha pan dheuth liv, an avon a weskis erbynn an chi na, ha ny yllis y gryghylli, rag y vos selys war an garrek.6:48 rag y vos selys war an garrek: War-lergh re a'n dornskrifow rag y vos drehevys yn ta. 49Mes neb a glew ha ny wra travyth yw haval dhe dhen a dhrehevis chi war dhor heb sel, ha'n avon a weskis er y bynn, ha distowgh ev a goedhas, ha meur veu terroes an chi na.’