Benynes owth Holya Yesu

1Ha wosa henna, yth esa ow tremena dre sitys ha trevow ow pregoth ha derivas an nowodhow da a wlaskor Duw; ha'n dewdhek esa ganso, 2ha benynes, neb re bia yaghhes a debel spyrysyon ha klevesow: Maria henwys Magdalena, may teuth yn-mes anedhi seyth dyowl, 3ha Yoanna gwreg Kusa, rennyas Herod, ha Susanna, ha lies arall, neb a venystra dhedha8:3 dhedha: War-lergh re a'n dornskrifow dhodho. yn-mes a'ga fythow.

Parabolenn an Gonador

Mat 13:1-9; Mark 4:1-9

4Ha wosa routh veur dhe omguntell, ha tus dhiworth lies sita dhe dhos dhodho, ev a gewsis dre barabolenn: 5‘Gonador eth yn-mes dhe wonedha y has; ha pan hasas, rann a'n has a goedhas ryb an fordh hag a veu trettys yn-dann dreys, hag ydhyn an ayr a's devoryas. 6Ha rann arall a goedhas war veynek; ha pan devis, y feu desyghys rag fowt glybor. 7Ha rann arall a goedhas yn mysk spern, ha'n spern a devis war-barth gensi ha'y thaga. 8Ha rann arall a goedhas yn dor mas, ha pan devis, hi a dhug trevas, kansplek.’ Hag ow leverel hemma, ev a grias, ‘Neb a'n jeves diwskovarn rag klewes, ev klewes.’

Porpos an Parabolennow

Mat 13:10-17; Mark 4:10-12

9Ha'y dhyskyblon a wovynni orto pandr'a ve styr an barabolenn ma. 10Hag ev a leveris, ‘Dhy'hwi yw grontys aswonn kevrinyow gwlaskor Duw, mes dhe'n re erell dre barabolennow,

rag may firons heb gweles,

ha rag may klewons heb konvedhes.

Styr Parabolenn an Gonador

Mat 13:18-23; Mark 4:13-20

11‘Hemm yw an barabolenn: an has yw ger Duw. 12An re ryb an fordh yw neb a glew, ena an jowl a dheu ha kemmeres an ger dhiworth aga holonn rag own i dhe grysi ha bos selwys. 13An re war an veynek yw neb pan glewons a dhegemmer an ger gans lowena, ha nyns eus dhedha gwreydhenn; i a grys pols byghan, hag yn termyn temptasyon i a gildenn. 14An dra a goedhas y'n spern, yth yw an re a glewas, ha pan vons yn-rag tegys yns gans an fienasow ha'n rychys ha'n plesours a vewnans, ha ny dhegons frut adhves. 15Mes an dra y'n tir da, yth yns i an re a glew an ger gans kolonn len ha da ha'y witha, ha doen frut gans perthyans.

Lugarn yn-dann Lester

Mark 4:21-25

16‘Denvyth wosa enowi lugarn ny'n kudh yn-dann lester, po y worra yn-dann weli, mes ev a'n gorr war wolowbrenn, rag may hallo an dus a dheu a-ji gweles an golow. 17Rag nyns eus tra yn-dann gel na vydh diskudhys, na tra gevrinek na vydh godhvedhys ha dos dhe'n golow. 18Merkyewgh ytho fatell glewowgh: rag neb a bewvo, dhodho ev y fydh res; ha neb na bewvo mann, y fydh kemmerys a-dhiworto ynwedh an pyth a dybir ev dhe bewa.’

Mamm ha Breder Yesu

Mat 12:46-50; Mark 3:31-35

19Ena y teuth dhodho y vamm ha'y vreder, ha ny yllens dos nes dhodho drefenn an routh. 20Ha leverys veu dhodho, ‘Dha vamm ha'th vreder a worta a-ves ow mynnes dha weles.’ 21Mes ev a worthybis ha leverel dhedha, ‘Ow mamm ha'm breder yw an re a glew ger Duw ha'y wul.’

Yesu a Goselha Annawel

Mat 8:23-27; Mark 4:35-41

22Hag y hwarva unn jydh, yth yskynnas yn gorhel, ha'n dhyskyblon ganso, hag yn-medh ev dhedha, ‘Gwren tremena dhe'n tu arall a'n lynn’; hag i a woelyas dhe-ves. 23Hag i ow koelya, ev eth yn kosk. Hag annawel a goedhas war an lynn, hag yth esa aga gorhel ow pos lenwys, ha peryllys vons. 24Hag i a dheuth dhe wul dhodho difuna, ow leverel, ‘Mester, mester, kellys on!’ Ena ev a dhifunas ha keski an gwyns ha garowder an dowr; hedhi a wrussons hag yth esa kalmynsi. 25Ev a leveris dhedha, ‘Ple'ma agas fydh?’ Mes i a leveris an eyl dh'y gila, ‘Piw ytho yw hemma, ow korhemmynna ynwedh dhe'n gwynsow ha dhe'n dowr, ha gostydh yns dhodho?’

Yaghheans an Den a Gadara Tormentys gans Dywolow

Mat 8:28-34; Mark 5:1-20

26Hag i a woelyas bys yn bro an Gadarenys,8:26 Gadarenys: War-lergh re a'n dornskrifow Gerasenys. usi a-dal Galile. 27Ena pan eth yn-mes dhe'n tir, y tyerbynnas dhodho gour a'n sita, ha dhodho dywolow seuladhydh, ha ny wiska dillas,8:27 ha dhodho dywolow seuladhydh, ha ny wiska dillas: War-lergh re a'n dornskrifow ha dhodho dywolow; ha seuladhydh ny wisksa dillas. na triga yn chi, saw y'n bedhow. 28Pan welas Yesu, ev a armas, ha koedha a-ragdho, ha leverel gans lev ughel, ‘Pandr'a vynnydh tejy genev vy, Yesu, Mab Duw Ughella? My a'th pys, na wra ow thormentya.’ 29Rag ev a arghsa dhe'n spyrys avlan dos yn-mes a'n den. Rag lieskweyth an spyrys a'n dalghennsa, ha gwithys vedha, kelmys gans chaynys ha kargharow; mes ev a derri an kolmow, ha helghys vedha gans an jowl bys yn tylleryow difeyth. 30Ha Yesu a worthybis dhodho, ‘Pyth yw dha hanow?’ Ev a leveris, ‘Lyjyon’; rag lies dyowl re dhothya ynno. 31Hag i a'n pysis, na wrella erghi dhedha mos y'n islonk.

32Mes yth esa flokk meur a vogh ow peuri ena y'n menydh; hag i a'n pysi a asa dhedha mos ynna; hag ev a ros kummyas dhedha. 33Ena an dhywolow a dheuth yn-mes a'n den ha mos y'n mogh, ha'n flokk a boenyas yn-nans dres an lann serth bys y'n lynn, ha beudhi.

34Ha'n vugeledh, pan welsons an pyth a hwarvia, a fias dhe'n fo ha'y dherivas y'n sita hag y'n pow. 35Ena i eth yn-mes dhe weles an pyth a hwarvia, hag i a dheuth dhe Yesu, ha kavoes an den may teuth an dhywolow yn-mes anodho esedhys orth treys Yesu; dillasys ha yagh y vrys; hag own a's teva. 36Ha'n re neb a welsa fatell veu sawys an den dalghennys gans dyowl a'n derivas dhedha. 37Hag oll an routh a bow an Gadarenys8:37 Gadarenys: War-lergh re a'n dornskrifow Gerasenys. a wre y bysi a'ga gasa, rag dalghennys vons i gans own meur; ytho ev eth yn gorhel ha dehweles. 38Mes an gour may teuth anodho an dhywolow a'n pysi may fe ganso; mes ev a'n dannvonas dhe-ves, ow leverel, 39‘Dehwel dhe'th chi ha derivas pygemmys a wrug Duw ragos.’ Hag ev eth dhe-ves ha pregoth dres oll an sita pygemmys a wrug Yesu ragdho.

Myrgh an Rewler, ha'n Venyn a Dochyas Dillas Yesu

Mat 9:18-26; Mark 5:21-43

40Wosa Yesu dhe dhehweles, an routh a'n wolkommas; rag yth esa pubonan orth y wortos. 41Hag otta, y teuth gour henwys Yairus, neb o rewler a'n synaga, hag ev a goedhas orth treys Yesu, ha'y bysi a dhos yn y ji, 42rag yth esa dhodho unn vyrgh genys, a-dro dhe dhewdhek bloedh, ha hi yn eneworres.

Hag ev ow mos, yth esa an routh orth y waska. 43Hag unn venyn neb o klav nans o dewdhek blydhen gans liv goes, neb a spensa oll hy fygans war vedhogyon,8:43 War-lergh re a'n dornskrifow nyns usi omma an geryow neb a spensa oll hy fygans war vedhogyon. heb galloes bos yaghhes gans denvyth, 44a dheuth a-dryv dhodho ha tochya pilenn y vantell; hag a-dhesempis liv hy goes a hedhis. 45Ha Yesu a leveris, ‘Piw a'm tochyas?’ Pan wrug pubonan y nagha, Peder8:45 Peder: War-lergh re a'n dornskrifow Peder ha'n re esa ganso. a leveris, ‘Mester, an routhow a'th keas a-derdro orth dha waska, ha ty a wovynn, “Piw a'm tochyas”!’8:45 War-lergh re a'n dornskrifow nyns usi omma an geryow ha ty a wovynn, Piw a'm tochyas! 46Mes Yesu a leveris, ‘Nebonan re'm tochyas, rag my a woer galloes dhe vos gyllys ahanav.’ 47Ha'n venyn, pan welas hi dhe vos diskudhys, a dheuth yn unn grena ha wosa koedha a-dheragdho hi a dherivas a-rag oll an dus prag y hwrug hi y dochya, ha fatell via hi yaghhes a-dhesempis. 48Ev a leveris dhedhi, ‘Myrgh, dha fydh re'th sawyas; ke yn kres.’

49Hag ev hwath ow kewsel, y teuth nebonan dhiworth chi rewler an synaga, ow leverel, ‘Dha vyrgh re verwis; na wra ankombra an Mester namoy.’ 50Mes Yesu, pan glewas hemma, a worthybis dhodho, ‘Na borth own, unnweyth krys, ha hi a vydh sawys.’ 51Pan dheuth y'n chi, ny asas dhe dhenvyth mos a-ji ganso, saw Peder ha Yowann ha Jamys, ha tas ha mamm an flogh. 52I oll a oela ha kyni war hy lergh. Mes ev a leveris, ‘Na oelewgh, rag ny verwis hi, mes hi a gosk.’ 53Mes i a'n skornya, ow kodhvos hi dhe vos marow. 54Hag ev a dhannvonas peub yn-mes, ha'y synsi8:54 Hag ev a dhannvonas peub yn-mes, ha'y synsi: War-lergh re a'n dornskrifow Hag ev a's synsis. er hy leuv, ha gelwel, ‘A flogh, sav yn-bann.’ 55Ha'y spyrys a dhehwelis, ha hi a sevis a-dhistowgh, hag ev a erghis neppyth dhe vos res dhedhi dhe dhybri. 56Marth a's teva hy thas ha'y mamm; mes ev a worhemmynnis dhedha na dheriffens dhe dhenvyth an pyth a hwarva.