Dannvon an Dewdhek

Mat 10:5-15; Mark 6:7-13

1Ena ev a elwis an dewdhek war-barth, hag a ros dhedha galloes hag awtorita war oll an dhywolow, ha dhe yaghhe klevesow, 2hag ev a's dannvonas yn-mes dhe bregoth gwlaskor Duw, ha dhe yaghhe an glevyon, 3hag ev a leveris dhedha, ‘Na gemmerewgh travyth rag an fordh, na lorgh, na skryp, na bara, na mona na diw bows dhe bubonan. 4Ha py chi pynag a dhyffowgh ynno, trigewgh ena bys pan omdennewgh alena. 5Ha seul na wra agas wolkomma, pan yllowgh yn-mes a'n sita na, shakyewgh an doust a-dhann agas treys yn dustuni er aga fynn.’ 6Ytho i eth dhe-ves ha tremena der an trevow, ow pregoth an aweyl hag ow yaghhe yn pub tyller.

Fienasow Herod

Mat 14:1-12; Mark 6:14-29

7Lemmyn Herod an tetrargh a glewas a bup-tra a hwarva, ha penndegys o, rag re a leveri Yowann re bia drehevys a'n re varow, 8ha re erell, Elias dhe omdhiskwedhes, ha re erell, onan a'n brofoesi a-henys dhe dhasserghi. 9Hag yn-medh Herod, ‘Yowann a dhibennis; mes piw yw hemma, neb a glewav taklow a'n par ma yn y gever?’ Hag ev a hwila y weles.

Maga an Pymp Mil

Mat 14:13-21; Mark 6:30-44; Yow 6:1-14

10Ha'n abesteli, wosa i dhe dhehweles, a dherivas dhodho pup-tra re wrussens. Hag ev a's kemmeras hag omdenna yn priva dhe sita henwys Bethsaida.9:10 dhe sita henwys Bethsaida: War-lergh re a'n dornskrifow dhe dyller ynyal ryb sita henwys Bethsaida. 11Mes an routhow, pan glewsons, a'n siwyas; hag ev orth aga wolkomma a gewsis orta a wlaskor Duw, hag ev a yaghhas seul a'n jeva edhomm a yaghheans.

12An jydh a dhallathas dos dhe benn, ha'n dewdhek a dheuth ha leverel dhodho, ‘Dannvon an routh dhe-ves, rag mayth ellens y'n trevow ha'n pow a-dro ha kavoes ostyans ha neppyth dhe dhybri, rag yth eson ni omma yn tyller difeyth.’ 13Mes ev a leveris dhedha, ‘Rewgh hwi dhedha dhe dhybri.’ Yn-medhons i, ‘Nyns eus dhyn moy es pymp torth ha dew bysk, marnas ni a dhe brena boes rag oll an dus ma.’ 14Rag yth ens i neb pymp mil wour. Yn-medh ev dh'y dhyskyblon, ‘Gwrewgh dhedha esedha yn bagasow a neb hanter kans pubonan.’ 15Hag yndella y hwrussons, ha gul pubonan dhe esedha. 16Hag ow kemmeres an pymp torth ha'n dhew bysk, ev a viras yn-bann dhe nev ha'ga benniga, ha'ga therri, hag ev a's ros dh'y dhyskyblon rag aga settya a-rag an routh. 17Ha pubonan a dhybris hag a veu lenwys; hag a'n brewyon gesys dhedha, dewdhek kanstellas a veu kuntellys.

Peder a Avow Yesu dhe Vos an Krist

Mat 16:13-19; Mark 8:27-29

18Hag y hwarva, pan esa ev ow pysi y honan, y teuth y dhyskyblon war-barth ganso, hag ev a wovynni orta, ow leverel, ‘Piw y lever an routhow ow bos evy?’ 19I a worthybis ow leverel, ‘Yowann Besydhyer, re erell Elias, mes re erell, “Onan a'n brofoesi a-henys re dhassorghas.” ’ 20Ev a leveris dhedha, ‘Mes hwi, piw y leverowgh my dhe vos?’ Peder a worthybis ha leverel, ‘An Krist a Dhuw.’

Yesu a Dhargan y Vernans ha'y Dhasserghyans

Mat 16:20-28; Mark 8:30–9:1

21Mes ev a's erghis straght na lavarrons hemma dhe dhenvyth, 22ow leverel bos res dhe Mab an den godhav lies tra ha bos neghys gans an henavogyon ha'n bennoferysi ha'n skribys ha bos ledhys ha bos drehevys y'n tressa dydh.

23Hag yn-medh ev dhedha i oll, ‘Mar mynn nebonan dos war ow lergh, gwres omdhenagha, ha kemmeres yn-bann y grows pub dydh, ha'm holya vy. 24Rag piwpynag a vynno gwitha y vewnans a'n kyll; mes piwpynag a gollo y vewnans a-barth dhymmo vy, ev a'n gwith. 25Rag pana les a vydh dhe dhen, pan wrello gwaynya oll an bys, hag ev y honan ow pos diswrys po kellys? 26Piwpynag ytho a'n jeffo meth ahanav vy ha'm lavarow, Mab an den a'n jevydh meth anodho pan dheffo yn y wolewder ev ha golewder an Tas ha'n eledh sans. 27Mes yn hwir y lavarav dhywgh, yma rann a'n re ow sevel omma na dastyons ankow erna wellons gwlaskor Duw.’

Treusfigurans Krist

Mat 17:1-8; Mark 9:2-8

28Hag y hwarva a-dro dhe eth dydh wosa an geryow ma, ev a gemmeras Peder ha Yowann ha Jamys ganso ha mos yn-bann y'n menydh rag pysi. 29Hag ev ow pysi, semlans y fas a janjyas ha'y dhillas a veu kann, ow terlentri. 30Hag otta, dew wour a gewsi ganso; yth ens i Moyses hag Elias, 31neb a omdhiskwedhas yn golewder, ha kewsel a'y dhibarth9:31 dhibarth: Po eksodus. a vedha orth hy hollenwel yn Yerusalem. 32Mes Peder ha'n re ganso o poes gans kosk; ha pan ens i difun i a welas y wolewder ha'n dhew wour ow sevel ganso. 33Ha pan esens ow tiberth dhiworto Peder a leveris dhe Yesu, ‘Mester, da yw ni dhe vos omma; gwren drehevel teyr skovva, onan ragos jy hag onan rag Moyses hag onan rag Elias’, heb godhvos pandra esa ow leverel. 34Hag ev ow leverel hemma kommolenn a dheuth ha tewlel skeus warnedha; hag i a borthas own pan ethons y'n gommolenn. 35Ha lev a dheuth yn-mes a'n gommolenn ow leverel, ‘Hemm yw ow Mab dewisys,9:35 dewisys: War-lergh re a'n dornskrifow karadow. klewewgh ev.’ 36Ha wosa an lev dhe gewsel, Yesu a veu kevys y honan. Ha tewel a wrussons ha ny dherivsons orth denvyth y'n dydhyow na an taklow a welsens.

Yaghheans Maw Troblys gans Spyrys Avlan

Mat 17:14-18; Mark 9:14-27

37Ha ternos, pan dheuthons yn-nans a'n menydh, routh veur a'n dyerbynnas. 38Hag otta gour a'n routh a grias ha leverel, ‘Mester, my a'th pys, mir orth ow mab, rag ow unn flogh yw ev, 39hag otta, spyrys a'n kemmer ha desempis ev a skrij; hag ev a'n tewl gans shorys, owth ewyni, ha skant ny'n gas, orth y vrewi. 40Ha my a bysis dha dhyskyblon a'y dewlel yn-mes, ha ny allsons.’ 41Ha Yesu a worthybis ha leverel, ‘A henedh diskryjyk ha kammhynsek, pes termyn y fydhav genowgh ha'gas perthi? Doro dha vab omma.’ 42Hag ev hwath ow tos, an jowl a'n torras ha'y dewlel dhe'n dor yn shora; ha Yesu a goskas an spyrys avlan ha yaghhe an maw ha'y dhaskorr dh'y das. 43Ha marth a's tevo peub a veuredh Duw.

Yesu a Dhargan y Vernans Arta

Mat 17:22-23; Mark 9:30-32

Hag i hwath gans marth a bup-tra a wre, ev a leveris dh'y dhyskyblon, 44‘Gorrewgh an geryow ma yn agas diwskovarn; rag Mab an den a vydh delivrys yn diwleuv tus.’ 45Mes ny gonvedhens an lavar ma, ha kudhys o dhiworta, ma na wodhyens gweles y styr; hag own a's tevo a wovynn orto a-dro dhe'n lavar ma.

Piw yw an Moyha?

Mat 18:1-5; Mark 9:33-37

46Ena dadhel a sordyas yntredha, piw anedha a via an moyha. 47Mes Yesu, ow kodhvos9:47 ow kodhvos: War-lergh re a'n dornskrifow ow kweles. preder aga holonn, a gemmeras flogh ha'y worra rybdho 48ha leverel dhedha, ‘Neb a dhegemmerro an flogh ma yn ow hanow vy a'm degemmer vy; ha neb a'm degemmerro vy, a'n degemmer ev neb a'm dannvonas; rag neb yw an byghanna yntredhowgh, meur yw ev.’

Neb na Vo er agan Pynn, Ragon Ni yth Yw

Mark 9:38-40

49Ha Yowann a worthybis ha leverel, ‘Mester, ni a welas nebonan ow tewlel yn-mes dywolow y'th hanow jy, ha ni a'n lettyas, rag ny wra ev holya genen ni.’ 50Ha Yesu a leveris dhodho, ‘Na wra y lettya; rag neb na vo er agas pynn, ragowgh hwi yth yw.’

Tre yn Samaria a Skon Wolkomma Yesu

51Y hwarva, ha'n termyn ow tos pan vedha kemmerys yn-bann, ev a settyas y fas dhe vos dhe Yerusalem. 52Hag ev a dhannvonas kannasow a-dheragdho; hag yth ethons hag entra yn tre a'n Samaritanys, rag pareusi ragdho; 53ha ny wrens y wolkomma, rag y fas dhe vos settys troha Yerusalem. 54Ha pan y'n gwelas y dhyskyblon Jamys ha Yowann, yn-medhons, ‘Arloedh, a vynnydh ni dhe erghi may teffo tan yn-nans dhiworth an nevow ha'ga distrui?’9:54 distrui: War-lergh re a'n dornskrifow distrui kepar dell wrug Elias. 55Mes ev a dreylyas ha'ga heredhi.9:55 War-lergh re a'n dornskrifow 55 Mes ev a dreylyas ha'ga heredhi ha leverel, ‘Ny wodhowgh a by par spyrys yth owgh. 56 Rag ny dheuth Mab an den rag distrui enevow tus, marnas selwel.’ Hag i eth yn-rag dhe dre arall. 56Hag i eth yn-rag dhe dre arall.

Holyoryon Yesu

Mat 8:19-22

57Hag i ow mos war an fordh, nebonan a leveris dhodho, ‘My a'th hol pyle pynag yth ylli.’ 58Hag yn-medh Yesu dhodho, ‘Dhe'n lewern yma tell, ha neythow dhe ydhyn an ayr, mes dhe Vab an den nyns eus tyller vyth may hworro y benn.’ 59Hag ev a leveris dhe nebonan arall, ‘Gwra ow holya.’ Mes ev a leveris, ‘Arloedh, gas vy kyns oll dhe vos dhe ynkleudhyas ow thas.’ 60Mes ev a leveris dhodho, ‘Gas dhe'n re varow ynkleudhyas aga thus varow aga honan; mes ty, ke dhe bregoth gwlaskor Duw.’ 61Hag yn-medh den arall, ‘My a vynn dha holya, Arloedh, mes kyns oll gas vy dhe leverel farwell dhe'n dus y'm chi.’ 62Hag yn-medh Yesu dhodho, ‘Nyns yw gwiw dhe servya gwlaskor Duw an den neb a worro y leuv war an arader, ha mires war-dhelergh.’