1Ha lemmyn, an gorhemmynn ma yw ragowgh hwi, A oferysi. 2Mar ny woslewowgh, ha mar ny worrowgh agas kolonn dhe ri glori dhe'm hanow, yn-medh Arloedh an luyow, my a dhannvon molleth warnowgh hwi, ha my a volleth agas bennathow. Yn hwir, my a's mollethis seulabrys, rag na'n gorrsowgh yn agas kolonn. 3Awotta my a wra keredhi an has a'gas govis; my a wra lesa kawgh war agas fasow, kawgh agas dy'goelyow, ha hwi a vydh kemmerys dhe-ves ganso.

4Hwi a wra godhvos y tannvenis dhywgh an gorhemmynn ma, rag may pessyo ow hevambos gans Levi, yn-medh Arloedh an luyow. 5Ow hevambos a veu ganso, bewnans ha kres, ha my a's ros dhodho; hag own, hag ev a borthas own ahanav hag ev a sevis yn agha a'm hanow. 6Lagha a wirder esa yn y anow, ha kammhynseth ny veu kevys war y dhiwweus. Ev a gerdhas genev yn kres hag ewnhynseth, ha treylya lies dhiworth pegh. 7Rag y koedh dhe dhiwweus an oferyas gwitha skians, hag y tal dhe dus hwilas dyskans a'y anow, drefenn y vos kannas Arloedh an luyow. 8Ha hwi a dreylyas a-dhiworth an fordh ha gul dhe lies trebuchya y'n lagha; hwi a dhefolas an kevambos gans Levi, yn-medh Arloedh an luyow. 9Ytho my a'gas kawsyas dhe vos dispresys hag iselhes a-rag oll an bobel, a-ban na withsowgh ow fordhow mes hwi a dhiskwa faverans y'n lagha.

An Kevambos Disakrys gans Yuda

10A ny'gan beus, ni oll, unn Tas? A ny'gan gwrug unn Duw? Prag y hwren ni toella an eyl y gila, ow tisakra kevambos agan tasow? 11Yuda re beu dislen, ha neppyth kasadow re beu gwrys yn Ysrael ha Yerusalem: rag Yuda re dhisakras an sentri a wra an Arloedh y gara, ha re dhemmedhis an vyrgh a dhuw astranj. 12An Arloedh re droggho dhe-ves a-dhiworth tyldow Yakob an gour a wra hemma, an test ha'n pledyas,2:12 an test ha'n pledyas: Styr an Ebrow yw ankler; martesen an den difun ha'n den a worthyp. hag ev neb a dhre offrynn dhe Arloedh an luyow.

13An nessa dra ma hwi a wra: hwi a worher alter an Arloedh gans dagrow, gans oelva ha galar, a-ban na vir orth an offrynn namoy, na'n kemmer gans plesour dhiworth agas diwleuv. 14Hwi a lever, ‘Prag?’ Rag an Arloedh yw test yntra jy ha gwreg dha yowynkneth, a-ban derrsys fydh gensi, kynth yw hi dha gowethyades, an wreg a'th kevambos demmedhyans. 15A ny's gwrug an unn Duw, kig ha spyrys? Ha pandr'a vynn an unn Duw marnas agh duwek? Rakhenna gwithewgh war agas spyrys, ha na vydh dislen orth gwreg dha yowynkneth.2:15 Amendys. Styr an Ebrow yw ankler. 16My a gas torrva demmedhyans, yn-medh an Arloedh, Duw Ysrael, ha gour neb a gudh y dhillas gans freudh, yn-medh Arloedh an luyow. Ytho omwithewgh yn agas spyrys, ha na derrewgh fydh.

17Hwi re skwithas an Arloedh gans agas geryow. Hwi a lever, ‘Fatell y'n skwithsyn?’ Pan leverewgh ‘Peub neb a wra drog yw da yn golok an Arloedh, hag ev yw pes da anedha’, po ‘Ple'ma an Duw a wirvreus?’