Dydh Meur an Arloedh

1Rag otta, an jydh yma ow tos, ow tewi avel forn. Oll an dus orgelus ha pub drogoberer a vydh sowl, ha'n jydh usi ow tos a wra aga howlleski, yn-medh Arloedh an luyow, na as dhedha naneyl gwreydhenn na skorrenn.4:1 4:1-6 yw niverys 3:19-24 y'n tekst ebrow. An Septuagint yw haval dhe'n tekst ebrow, marnas 4:4-6, yw 3:24, 22, 23. 2An howl a ewnder a wra drehevel gans yeghes yn y eskelli ragowgh hwi neb a berth own a'm hanow. Ha hwi a wra mos yn-mes ha terlemmel avel leughi peskys livrys a'n stall. 3Ena hwi a drett an debeles; i a vydh lusu yn-dann wodhnow agas treys y'n jydh may hwrav an taklow ma, yn-medh Arloedh an luyow.

4Perthewgh kov a lagha ow gwas Moyses, an ordenansow ha'n breusow a erghis vy dhodho war Horeb rag oll Ysrael.

5Awotta my a dhannvon dhywgh Elias an profoes kyns dos dydh an Arloedh, meur hag euthyk. 6Ev a dreyl kolonnow an tasow dhe'n fleghes, ha kolonnow an fleghes dh'aga thasow, rag own my dhe dhos ha gweskel an tir gans molleth.