Devedhyans Yesu dhe Yerusalem yn Trygh

Mat 21:1-11; Luk 19:28-40; Yow 12:12-19

1Ha pan dheuthons ogas dhe Yerusalem, bys yn Bethfage ha Bethani, dhe'n menydh Oliv, ev a dhannvonas dew a'y dhyskyblon 2ha leverel dhedha, ‘Ewgh y'n kastell usi a-ragowgh, hag ow mos ynno, a-dhesempis hwi a gyv ebel yn kelmys, warnodho bythkweth na wrug denvyth esedha; gwrewgh y dhigelmi, ha'y gyrghes. 3Ha mar lever dhywgh neb den, “Prag y hwrewgh hwi hemma?” leverewgh, “Yma dhe'n Arloedh edhomm anodho, ha hware ev a'n dastannvon omma.” ’11:3 War-lergh re a'n dornskrifow Yma dhe'n Arloedh edhomm anodho, ha hware ev a'n dastannvon omma. 4Hag i eth yn-kerdh ha kavoes ebel yn kelmys ogas dhe dharas a-ves y'n stret; hag i a'n digolmas. 5Ha re a'n dus esa ow sevel ena a leveris dhedha, ‘Pandr'a wrewgh hwi, ha hwi ow tigelmi an ebel?’ 6Hag i a gewsis orta kepar dell lavarsa Yesu, hag i a asas dhedha mos. 7Hag i a dhros an ebel dhe Yesu, hag a dewlis aga mantelli warnodho; hag ev a esedhas warnodho. 8Ha lies a lesas aga mantelli war an fordh; hag erell a lesas skorrennow delyek a dorrsens y'n gwelyow.11:8 hag erell a lesas skorrennow delyek a dorrsens y'n gwelyow: War-lergh re a'n dornskrifow hag erell ow terri skorrennow delyek a'n gwelyow, a's lesas y'n fordh. 9Ha'n re esa ow mos a-rag, ha'n re esa ow siwya, a armas,

‘Hosanna!

Benniges yw neb a dheu yn hanow an Arloedh!

10Benniges yw gwlaskor agan tas Davydh, usi ow tos.

Hosanna y'n ughelder!’

11Hag ev a dheuth dhe Yerusalem, dhe'n tempel; ha wosa ev dhe vires a-derdro war bup-tra, ha'n eur lemmyn diwedhes, ev eth yn-mes dhe Bethani gans an dewdhek.

Molleth an Figbrenn

Mat 21:18-19

12Ha ternos, pan esens ow tos a Bethani, yth esa nown dhodho. 13Hag ow kweles figbrenn a-bell ha dhodho del, ev a dheuth dhe weles mar kaffa neppyth warnodho, ha pan dheuth dhodho, ny gavas travyth saw del; rag nyns esa termyn figys. 14Ha Yesu a worthybis ha leverel dhodho, ‘Denvyth byth na dhybres frut ahanas alemma rag, bys vykken.’ Ha'y dhyskyblon a'n klewas.

Glanhe an Tempel

Mat 21:12-17; Luk 19:45-48; Yow 2:13-22

15Hag i a dheuth dhe Yerusalem. Ha devedhys a-ji dhe'n tempel, ev a dhallathas tewlel yn-mes an re esa ow kwertha hag ow prena y'n tempel, hag ev a dhomhwelis moesow an arghansoryon, hag esedhow an re esa ow kwertha kelemmi; 16ha ny vynna godhav denvyth dhe dhoen tra vytholl11:16 tra: Po daffar, po lester, po gwara. der an tempel. 17Hag yth esa ev ow tyski, hag ow leverel dhedha, ‘A nyns yw skrifys,

“Ow chi a vydh gelwys chi pysadow

rag oll an kenedhlow”?

Mes hwi re'n gwrug fow ladron.’ 18Ha'n bennoferysi ha'n skribys a glewas, hag i a hwila fatell allens y dhistrui; rag i a's teva own anodho drefenn bos marth gans oll an routh a'y dhyskas. 19Ha pan o devedhys gorthugher, ev11:19 ev: War-lergh re a'n dornskrifow i. eth yn-mes a'n sita.

Dyskas an Figbrenn Gwedhrys

Mat 21:20-22

20Ha myttin, pan esens ow tremena, i a welas an figbrenn desyghys dhiworth an gwreydhyow. 21Ha Peder, ow perthi kov, a leveris dhodho, ‘Mester, awotta'n figbrenn a wrussys y villiga yw desyghys.’ 22Ha Yesu a worthybis ha leverel dhedha, ‘Bedhes genowgh fydh yn Duw. 23Yn hwir y lavarav dhywgh, piwpynag a lavarro dhe'n menydh ma “Ty bydh kemmerys yn-bann, ha bydh tewlys y'n mor” ha na dhouttyo yn y golonn, mes a grysso y hwyrvydh an pyth a gews, ev a'n kyv. 24Rakhenna my a lever dhywgh, pypynag a hwilowgh pan bysowgh, krysewgh y dhegemmeres,11:24 krysewgh y dhegemmeres: War-lergh re a'n dornskrifow krysewgh y'n degemmersowgh. ha hwi a'n kyv.

25‘Ha peskweyth may seffowgh dhe bysi, gevewgh hwi, mara'gas beus travyth erbynn nebonan, rag may haffo agas Tas eus yn nevow dhywgh hwi agas kammweythresow. 26Mes hwi mar ny wrewgh hwi gava, agas Tas eus y'n nevow ny wra gava agas kammweythresow hwi.’11:26 Nyns usi an wers ma yn re a'n dornskrifow.

Govynn a-dro dhe Awtorita Yesu

Mat 21:23-27; Luk 20:1-8

27Hag i a dheuth arta dhe Yerusalem; ha pan esa ev ow kerdhes y'n tempel, an bennoferysi ha'n skribys ha'n henavogyon a dheuth dhodho, 28ha leverel dhodho, ‘Py awtorita dredho y hwre'ta an taklow ma, po piw a ros dhis an awtorita ma dh'aga gul?’ 29Ha Yesu a leveris dhedha, ‘My a wovynn orthowgh unn dra; gorthybewgh hwi dhymm, ha my a lever dhywgh py awtorita dredho y hwrav an taklow ma. 30Besydh Yowann, ova a nev, po a dus? Gorthybewgh dhymmo.’ 31Hag i a resnas yntredha, ow leverel, ‘Mar leveryn “A nev”, ev a lever, “Ytho prag na wrussowgh krysi dhodho?” 32Mes mar kwren ni leverel, “A dus”, pandra ytho?’11:32 Nyns usi an geryow Pandra ytho? y'n Greka. Own a's teva a'n routh; rag pub den a synsi Yowann dhe vos profoes yn tevri. 33Ytho i a worthybis ha leverel dhe Yesu, ‘Ny wodhon.’ Ha Yesu a leveris dhedha, ‘Na byth moy ny lavarav vy dhywgh py awtorita dredho y hwrav vy an taklow ma.’