Yesu a Dhargan Diswrians an Tempel

Mat 24:1-2; Luk 21:5-6

1Hag ev ow mos yn-mes a'n tempel, onan a'y dhyskyblon a leveris dhodho, ‘Mir, A Vester, pana veyn ha pana dhrehevyansow!’ 2Ha Yesu a leveris dhodho, ‘A wel'ta jy an drehevyansow meur ma? Ny vydh gesys omma men war ven na vydh terrys dhe'n dor.’

Dalleth Galarow

Mat 24:3-14; Luk 21:7-19

3Ha pan ova esedhys war an menydh Oliv a-dal an tempel, Peder ha Jamys ha Yowann hag Androw a wovynnas orto yn priva, 4‘Lavar dhyn, p'eur fydh an taklow ma? ha pandr'a vydh an tokyn pan vo oll an taklow ma parys dhe vos kowlwrys?’ 5Ha Yesu a dhallathas leverel dhedha, ‘Gwaytyewgh na'gas toello denvyth. 6Lies a dheu yn ow hanow, ow leverel, “My yw ev”, hag a wra toella lies. 7Mes pan glewowgh a vreselyow ha son a vreselyow, na gemmerewgh own; henna a res, mes an diwedh ny vydh hwath. 8Rag kenedhel a sev erbynn kenedhel ha gwlaskor erbynn gwlaskor; y fydh dorgrysyow yn lower le, y fydh divoetter;13:8 divoetter: War-lergh re a'n dornskrifow divoetter ha deray. dalleth gloesow yw an re ma.

9‘Mes bedhewgh war ragowgh agas honan; rag i a wra agas daskorr dhe gonselyow, hag y'n synagys hwi a vydh kronkys, ha hwi a vydh settys a-rag governours ha myghternedh a-barth dhymmo vy, yn dustuni er aga fynn. 10Ha kyns oll, res yw an aweyl dhe vos pregewthys dhe oll an kenedhlow. 11Mes pan wrellons agas hembronk ha'gas daskorr, na brederewgh kyns a bandr'a gewsewgh, mes pypynag a vo res dhywgh y'n eur na, henna leverewgh; rag nyns yw hwi a gews, mes an Spyrys Sans. 12Ha broder a dhaskorr y vroder dhe'n mernans ha tas y flogh, ha fleghes a sev erbynn kerens, ha gul dhedha bos ledhys; 13hag y fydhowgh kesys gans pub den oll a-barth ow hanow vy. Mes neb a dhur bys y'n diwedh, ev a vydh selwys.

An Galar Meur

Mat 24:15-28; Luk 21:20-24

14‘Mes pan welowgh pyth kasadow an difeythter ow sevel le na dhegoedh dhodho (gwres an redyer konvedhes), ena fies dhe'n menydhyow an re usi yn Yudi; 15ha neb a vo war do an chi, na dhiyskynnes, nag entra rag kyrghes neppyth yn-mes a'y ji; 16ha neb a vo y'n gwel, na dhehweles arta rag kyrghes y vantell. 17Go-i an re gans flogh y'n dorr, ha neb a re an vronn y'n dydhyow na! 18Ha pysewgh na hwarvo y'n gwav; 19rag y'n dydhyow na y fydh anken dell na veu a dhalleth an kreasyon a wrug Duw y wruthyl, bys lemmyn, na nevra ny vydh. 20Ha'n Arloedh mar ny wrella kott an dydhyow, ny via sawys kig vyth; mes a-barth an re dhewisys, neb a dhewisas ev, ev a wrug kott an dydhyow. 21Hag ena mar lever dhywgh den vyth, “Ottomma an Krist” po “Mir, ottava!”, na wrewgh krysi. 22Rag fals Kristow ha fals profoesi a sev, hag a dhiskwa toknys ha marthusyon, rag toella, mara kyllir, an re dhewisys. 23Mes bedhewgh war; my re dharganas dhywgh pup-tra.

Devedhyans Mab an Den

Mat 24:29-31; Luk 21:25-28

24‘Mes y'n dydhyow na, wosa an galar na,

an howl a vydh tewlhes,

ha'n loer ny re hy golow,

25ha'n ster a vydh ow koedha a'n nevow,

ha'n nerthow usi y'n nevow a vydh kryghyllys.

26Hag ena i a wel Mab an den ow tos y'n kommol gans meur alloes ha golewder. 27Hag ena ev a dhannvon an eledh ha kuntell war-barth y re dhewisys dhiworth an peswar gwyns, dhiworth penn pella an norvys bys yn penn pella an nevow.

Parabolenn an Figbrenn

Mat 24:32-35; Luk 21:29-33

28‘Dyskewgh an barabolenn dhiworth an figbrenn; y skorrenn kettell vo medhel ha gorra del yn-mes, hwi a woer bos yn ogas an hav. 29Yndella hwi ynwedh, pan welowgh an taklow ma ow hwarvos, hwi a woer ev dhe vos ogas, orth an darasow. 30Yn hwir y lavarav dhywgh, an henedh ma ny wra tremena erna vo oll an taklow ma gwrys. 31Nev ha nor a dremen dhe-ves, mes ow geryow vy, ny dremenons dhe-ves.

Ny Wodhor an Jydh na'n Eur

Mat 24:36-44

32‘Mes a-dro dhe'n jydh na ha'n eur, ny woer denvyth, naneyl an eledh yn nev, na'n Mab, marnas an Tas. 33Bedhewgh war, goelyewgh ha pysewgh;13:33: War-lergh re a'n dornskrifow nyns usi omma an geryow ha pysewgh. rag ny wodhowgh p'eur fydh an termyn. 34Yth yw kepar ha den ow mos yn hyns, neb a asas y ji, hag a ros awtorita dh'y gethwesyon, dhe bubonan y hwel, hag a erghis dhe'n porther a woelyas. 35Goelyewgh ytho; rag ny wodhowgh p'eur to mester an chi, po y'n gorthugher, po hanter-nos, po kulyek-kenys, po myttin, 36rag own ev dhe dhos yn tromm ha'gas kavoes hwi ow koska. 37Ha'n pyth a lavarav dhy'hwi, my a'n lever dhe bub den oll: goelyewgh.’