Yesu a-rag Pilat

Mat 27:1-2, 11-14; Luk 23:1-5; Yow 18:28-38

1Ha desempis y'n myttin an bennoferysi a wrug omgusulyans gans an henavogyon ha'n skribys hag oll an Sanhedrin; hag i a golmas Yesu, ha'y dhoen yn-kerdh ha'y dhaskorr dhe Pilat. 2Ha Pilat a wovynnas orto, ‘Ty yw Myghtern an Yedhewon?’ Hag ev a worthybis ha leverel dhodho, ‘Ty a'n lever.’ 3Ha'n bennoferysi a'n kuhudhas a lies tra.15:3 lies tra: War-lergh re a'n dornskrifow lies tra, mes ny worthybis travyth. 4Ha Pilat a wovynnas orto arta, ow leverel, ‘A ny worthybydh travyth? Mir py lies tra a guhudhons er dha bynn.’ 5Mes Yesu hwath ny worthybis travyth, mayth o marth dhe Pilat.

Yesu Dampnys dhe'n Mernans

Mat 27:15-26; Luk 23:13-25; Yow 18:39–19:16

6Lemmyn y'n goel ev a wre delivra dhedha unn prisner, piwpynag a vynnens i. 7Hag yth esa onan, Barabbas henwys, o prisonys gans an omsevysi neb re wrussa denladh y'n rebellyans. 8Ha'n routh ow karma15:8 ow karma: War-lergh re a'n dornskrifow ow tos yn-bann. a dhallathas govynn orto gul kepar dell wre dhedha a'y us. 9Mes Pilat a's gorthybis ow leverel, ‘A vynnowgh orthiv delivra dhywgh myghtern an Yedhewon?’ 10Rag ev a wodhya y hwrug an bennoferysi y ri dhodho dre atti. 11Mes an bennoferysi a vovyas an routh, may hwrella ev yn le henna delivra dhedha Barabbas. 12Ha Pilat a worthybis ha leverel dhedha arta, ‘Pandr'a vynnowgh, ytho, my dhe wul dhe neb a henwowgh myghtern an Yedhewon?’ 13Hag arta i a armas, ‘Krowsy e!’ 14Ena Pilat a leveris dhedha, ‘Ytho, pana dhrog re wrug ev?’ Mes i a armas hwath dhe voy, ‘Krowsy e!’ 15Ytho Pilat, ha hwans dhodho a blesya an routh, a dhelivras Barabbas dhedha; hag a ros Yesu, wosa y skorjya, dhe vos krowsys.

An Soudoryon a Skorn Yesu

Mat 27:27-31; Yow 19:2-3

16Ha'n soudoryon a'n hembronkas yn-kerdh a-bervedh y'n palys, henn yw an pretorium, hag i a elwis war-barth oll an bagas a soudoryon.15:16 oll an bagas a soudoryon: Po oll an kohort. 17Hag i a'n gwiskas gans purpur hag a blethas kurun a spern, hag a's gorras warnodho. 18Hag i a dhallathas y salusi, ‘Hayl, Myghtern an Yedhewon!’ 19Hag yth esens orth y weskel war an penn gans korsenn ha trewa warnodho; hag ow mos dhe benn-dewlin yth esens orth y wordhya. 20Ha wosa i dh'y skornya, i a dhi'skas an purpur dhiworto ha'y wiska yn y dhillas y honan. Hag i a'n dug yn-mes rag y growsya.

Krowsyans Yesu

Mat 27:32-44; Luk 23:26-43; Yow 19:17-27

21Hag i a gonstrynas unn Simon a Kyrene esa ow tremena, ow tos dhiworth an pow, tas Aleksander ha Rufus, dhe dhoen y grows. 22Hag i a'n dros bys y'n tyller Golgotha, dhe styrya yw, Tyller Krogen. 23Hag i a ros dhodho dhe eva gwin kemmyskys gans myrr; mes ny'n kemmeras. 24Hag i a'n krowsyas, ha ranna y dhillas, ow tewlel prenn warnedha, pandr'a gemmerra pubonan.

25Hag yth o an tressa eur, hag i a'n krowsyas. 26Ha pennskrifa y guhudhans o skrifys a-ughto, ‘Myghtern an Yedhewon.’ 27Ha ganso i a growsyas dew lader, an eyl a'n barth dhyghow dhodho, ha'y gila a'n barth kledh. 28Ha'n skryptor a veu kollenwys a lever, ‘Hag ev a veu reknys yn mysk drogoberoryon.’15:28 Nyns usi an wers ma yn re a'n dornskrifow. 29Ha'n dremenysi a'n kablas, ow shakya aga fenn, hag ow leverel, ‘Aha! ty, neb a dhistru an tempel hag a'n drehav kyns penn trydydh, 30omsaw dha honan ha diyskynn dhiworth an grows!’ 31Kekeffrys an bennoferysi ynwedh, gans an skribys, a'n skornyas yntredha aga honan ha leverel, ‘Ev a sawyas re erell; ny yll y omsawya y honan; 32Krist Myghtern Ysrael, diyskynnes lemmyn a'n grows, may hyllyn gweles ha krysi.’ Hag yth esa an re a veu krowsys ganso orth y dhespitya.

Mernans Yesu

Mat 27:45-56; Luk 23:44-49; Yow 19:28-30

33Ha pan dheuth an hweghves eur, yth esa tewolgow dres oll an tir bys y'n nawves eur. 34Hag y'n nawves eur Yesu a grias gans lev ughel, ‘Eloi, Eloi, lema sabaghthani?’, dhe styrya yw, ‘Ow Duw, ow Duw, prag y'm forsaksys?’ 35Ha re ow sevel ena pan y'n klewsons a leveris, ‘Otta, yma ow kelwel Elias.’ 36Ha nebonan a boenyas dhe lenwel spong a aysel, ha'y worra war gorsenn, ha'y ri dhodho dhe eva, ow leverel, ‘Gesewgh ni gweles mar teu Elias dh'y dhoen yn-nans!’ 37Ha Yesu a grias gans lev ughel hag anella y spyrys yn-mes. 38Ha vayl an tempel a veu skwardys yntra diw rann a'n penn dhe'n goeles. 39Ha pan welas an penn-kangour, esa ow sevel a-dal dhodho, ev dhe gria yndella hag anella y spyrys yn-mes,15:39 esa ow sevel a-dal dhodho, ev dhe gria yndella hag anella y spyrys yn-mes: War-lergh re a'n dornskrifow a-dal dhodho, ev dhe anella y spyrys yn-mes. ev a leveris, ‘Yn gwiryonedh, an den ma o Mab Duw.’

40Yth esa ynwedh benynes ow mires a-bell, hag yntredha Maria Magdalena, ha Maria mamm Jamys an byghan hag a Yoses, ha Salome, 41neb a wre y holya ha'y servya15:41 Yn niver byghan a dhornskrifow nyns usi omma an geryow ha'y servya. pan esa yn Galile, ha lies benyn arall neb a dheuth yn-bann dhe Yerusalem ganso.

Ynkleudhyans Yesu

Mat 27:57-61; Luk 23:50-56; Yow 19:38-42

42Ha gorthugher lemmyn devedhys, rag y vos an darbar, henn yw, an jydh kyns an sabot, 43y teuth Yosep a Arimathea, konseler bryntin, neb ynwedh esa ow kortos gwlaskor Duw, hag ev eth hardh a-ji bys yn Pilat hag a wovynnas korf Yesu. 44Ha marth o gans Pilat ev dhe vos marow seulabrys, ha wosa gelwel an penn-kangour dhodho, ev a wovynnas orto mars o pol'ta marow, 45ha pan y'n klewas dhiworth an penn-kangour, ev a ros an korf dhe Yosep. 46Hag ev a brenas lien hag a'n dug yn-nans, ha'y vaylya y'n lien hag a'n gorras ev yn bedh o treghys yn-mes a'n garrek; hag a rolyas men orth daras an bedh. 47Hag yth esa Maria Magdalena ha Maria mamm Yoses ow mires, ple feuva gorrys.