Parabolenn an Gonador

Mat 13:1-9; Luk 8:4-8

1Hag ev a dhallathas dyski arta ryb an mor. Hag yth o kuntellys a-dro dhodho routh veur, ytho ev eth a-bervedh yn gorhel, hag esedha ynno war an mor: hag yth esa oll an routh war an tir ryb an mor. 2Hag yth esa ow tyski dhedha lies tra dre barabolennow, ha leverel dhedha yn y dhyskas, 3‘Goslowewgh! Yth eth yn-mes gonador rag gonis has. 4Ha pan esa ow konis, rann a'n has a goedhas ryb an fordh, ha'n ydhyn a dheuth ha'y devorya. 5Ha rann arall a goedhas war an veynek, ma nag esa meur a dhor, hag a-dhesempis hi a eginas, drefenn nag esa dhedhi downder dor; 6mes pan dhrehevis an howl, goleskys veu, ha drefenn nag esa dhedhi gwreydh, y feu desyghys. 7Ha rann arall a goedhas yn mysk spern, ha'n spern a devis ha'y thaga, ha ny dhug trevas. 8Ha rann arall a goedhas yn dor da, hag a dhug trevas esa ow tevi hag ow kressya, hag a dhug, rann deg warn ugens, rann tri-ugens, ha rann kansplek.’ 9Hag yn-medh ev, ‘Neb a'n jeva diwskovarn rag klewes, ev klewes.’

Porpos an Parabolennow

Mat 13:10-17; Luk 8:9-10

10Ha pan esa y honan, an re esa a-dro dhodho gans an dewdhek a wovynnas orto a-dro dhe'n parabolennow. 11Hag ev a leveris dhedha, ‘Dhywgh hwi yma grontys kevrin gwlaskor Duw, mes dhe'n re a-ves, pup-tra a dheu dre barabolennow,

12“rag may firons dhe wir, mes heb gweles,

ha may klewons dhe wir, mes heb konvedhes,

rag own i dhe dreylya, ha may fo gevys dhedha.” ’

Styr Parabolenn an Gonador

Mat 13:18-23; Luk 8:11-15

13Hag yn-medh ev dhedha, ‘A ny gonvedhowgh hwi an barabolenn ma? Ytho fatell yllowgh konvedhes parabolennow vytholl? 14An gonador a has an ger. 15Ha'n re ma yw an re usi ryb an fordh, le mayth yw hesys an ger; ha wosa i dh'y glewes, Satnas a dheu desempis, ha kemmeres dhe-ves an ger a veu hesys ynna.4:15 ynna: War-lergh re a'n dornskrifow yn aga holonn. 16Ha'n re erell keffrys yw an re a veu hesys war an veynek, ha wosa i dhe glewes an ger, i a'n degemmer a-dhistowgh gans lowena; 17hag i ny's teves gwreydhenn ynna i aga honan, mes ny wrons pesya mes pols byghan; ena, pan dheffo trobel po helghyans rag an ger, i a drebuch desempis. 18Ha re erell yma, a veu hesys yn mysk spern; yth yns i an re a glew an ger, 19ha fienasow an bys ma, ha dynyans rychys, ha hwans a daklow erell ow tos a-ji, a dag an ger, ha ny dheg frut. 20Ha'n re na yw an re a veu hesys yn tir da, neb a glew an ger hag a'n degemmer, hag a dheg frut, re deg warn ugens, re tri-ugens, ha re kansplek.’

Lugarn yn-dann Vushel

Mat 5:15-16; Luk 8:16-18

21Hag ev a leveris dhedha, ‘Yw lugarn dres may haller y worra yn-dann vushel, po yn-dann weli? A nyns yw rag y settya war an kantolbrenn? 22Rag nyns yw travyth kelys marnas rag may fo diskwedhys, na nyns yw travyth kudhys, marnas rag may teffo bys yn golow. 23Den mara'n jeves diwskovarn rag klewes, ev klewes.’

24Hag yn-medh ev dhedha, ‘Bedhewgh war a'n pyth a glewowgh. Gans an musur a vusurowgh, y fydh musurys dhywgh hwi: ha dhywgh hwi neb a woslow,4:24 War-lergh re a'n dornskrifow nyns usi omma an geryow neb a woslow. moy a vydh res. 25Rag neb a bewvo, dhodho ev y fydh res; ha neb na bewvo, y fydh kemmerys a-dhiworto ynwedh an pyth a bew.’

Parabolenn an Has owth Egina

26Hag ev a leveris, ‘Yndella yth yw gwlaskor Duw: kepar ha pan ve den ow tewlel has y'n dor, 27ha koska, ha sevel nos ha dydh, ha'n has a wra egina ha tevi, ny woer ev fatell y'n gwra. 28Rag an dor a dheg trevas anodho y honan, kynsa an welsenn, ena an penn-ys, wosa henna an ys leun y'n penn. 29Mes pan vo parys an drevas, desempis ev a worr an gromman ynni, rag bos devedhys an ysasver.’

30Hag ev a leveris ‘Dhe bana dra a wren ni hevelebi gwlaskor Duw, po py barabolenn dredhi y hyllyn hy deskrifa? 31Yth yw kepar ha hasenn kedhow, ha hi pan vo hesys yn dor, byghanna yw ages oll an hasennow usi y'n dor; 32ha wosa hy bos hesys, hi a dyv yn-bann, hag a dheu ha bos brassa ages oll an losow, hag a dheg skorrennow meur, may hallo ydhyn an nevow triga yn-dann an goskes anedhi.’

Dyski dre Barabolennow

Mat 13:34-35

33Dre lies parabolenn a'n par na yth esa ow terivas an ger dhedha, kepar dell esa dhedha galloes a'y glewes; 34heb parabolenn ny gewsi orta, mes yn priva ev a styrya pup-tra dh'y dhyskyblon.

Yesu a Goselha Annawel

Mat 8:23-27; Luk 8:22-25

35An keth jydh na, ha'n gorthugher devedhys, ev a leveris dhedha, ‘Gwren ni tremena dhe'n tu arall.’ 36Ytho i a asas an routh, ha'y gemmeres ev, kepar dell esa, y'n gorhel. Hag yth esa skathow erell ganso. 37Hag annawel veur a wyns a sevis, ha'n tonnow a weskis y'n gorhel may feu an gorhel lemmyn ow pos lenwys. 38Hag yth esa ev yn delergh an gorhel, ow koska war bluvek. Hag i a wrug dhodho difuna, ha leverel dhodho, ‘Mester, a ny'th teur mann, ha ni ow mos dhe goll?’ 39Hag ev a sevis, ha keredhi an gwyns, hag a leveris dhe'n mor ‘Taw, spavennha!’ Ha'n gwyns a hedhis, hag yth esa kalmynsi meur. 40Hag ev a leveris dhedha, ‘Prag yth owgh hwi mar ownek? Fatell yw nag eus dhywgh fydh?’4:40 Prag yth owgh hwi mar ownek? Fatell yw nag eus dhywgh fydh? War-lergh re a'n dornskrifow Prag yth owgh hwi ownek? A nyns eus genowgh hwath fydh? 41Mes own bras a's teva, hag yn-medhons an eyl dh'y gila, ‘Py par den yw hemma, mayth yw gostydh dhodho keffrys an gwyns ha'n mor?’