Yaghheans an Den a Gadara Tormentys gans Dywolow

Mat 8:28-34; Luk 8:26-39

1Hag i a dheuth bys yn tu arall an mor, yn bro an Gadarenys.5:1 Gadarenys: War-lergh re a'n dornskrifow Gerasenys, po Gergesenys. 2Ha kettell dhiyskynnas ev a'n gorhel, y teuth yn-mes a'n bedhow orth y dhyerbynna unn den gans spyrys avlan, 3neb a'n jevo y drigva yn mysk an bedhow; ha ny ylli denvyth y gelmi na fella, na hwath gans chayn, 4drefenn ev dhe vos kelmys yn fenowgh gans kargharow ha chaynys, ha'n chaynys re bia terrys a-les ganso, ha'n kargharow terrys dhe demmyn, ha ny ylli denvyth y dempra. 5Ha prest nos ha dydh yth esa y'n bedhow, hag y'n menydhyow, ow karma hag owth omdreghi y honan gans meyn. 6Mes pan welas Yesu a-bell, ev a boenyas hag omblegya a-dheragdho, 7hag a armas gans lev ughel ha leverel, ‘Pandr'a vynnydh tejy genev vy, Yesu, ty Vab an Duw Ughella? My a'th konjor a-barth Duw, na wrylli ow thormentya.’ 8Rag ev re bia ow leverel dhodho, ‘Deus yn-mes a'n den, ty spyrys avlan!’ 9Hag ev a wovynnas orto ‘Pyth yw dha hanow?’ Yn-medh ev dhodho, ‘Ow hanow yw Lyjyon, rag lies on ni.’ 10Hag ev a'n pysi meur na's dannvonna yn-kerdh yn-mes a'n pow.

11Mes yth esa ena troha'n menydh, flokk bras a vogh ow peuri. 12Hag oll an dhywolow5:12 Hag oll an dhywolow a'n pysis: War-lergh re a'n dornskrifow Hag i a'n pysis. a'n pysis, ‘Dannvon ni a-bervedh y'n mogh, may hyllyn entra dhedha.’ 13Hag ev a ros dhedha kummyas, ha'n spyrysyon avlan eth yn-mes, hag entra dhe'n mogh, ha'n flokk, neb dew vil, a boenyas gwyls yn-nans dres an lann serth bys y'n mor hag y fons beudhys y'n mor.

14Ha'n re a's bugelya a fias dhe'n fo ha derivas an dra y'n sita hag y'n pow; hag i a dheuth rag gweles an pyth o hwarvedhys. 15Hag y teuthons dhe Yesu ha gweles an den o sagh dyowl, ha dhodho an lyjyon, esedhys ena, gwiskys, ha yagh y vrys, hag yth esa own dhedha. 16Ha'n re a'n gwelas a dherivas dhedha fatell hwarva dhe'n sagh dyowl, hag ynwedh a-dro dhe'n mogh. 17Hag i a dhallathas y bysi mayth ella yn-mes a'ga oryon. 18Ha pan o devedhys a-bervedh y'n gorhel, an den re bia dalghennys gans dyowl a'n pysis may halla bos ganso. 19Mes ny'n gasas, mes ev a leveris dhodho, ‘Ke dhe-dre dhe'th kerens, ha derivas dhedha pygemmys re wrug an Arloedh ragos, hag ev dhe gemmeres truedh ahanas.’ 20Hag ev eth yn-kerdh ha dalleth derivas y'n Dekapolis pygemmys re wrussa Yesu ragdho; ha peub a'n jeva marth.

Myrgh an Rewler, ha'n Venyn a Dochyas Dillas Yesu

Mat 9:18-26; Luk 8:40-56

21Ha Yesu pan veu tremenys arta y'n gorhel bys y'n tu arall, routh veur a omguntellas orto, hag yth esa ev ryb an mor. 22Hag y teuth onan a rewloryon an synaga, Yairus henwys; ha pan y'n gwelas, ev a goedhas orth y dreys, 23hag a'n pysis yn fen, ow leverel, ‘Yma ow myrgh vyghan yn eneworres; my a'th pys a dhos ha gorra dha dhiwla warnedhi, may fo sawys, ha bewa.’

24Ytho ev eth dhe-ves ganso. Ha routh veur a'n holyas, ha'y waska. 25Hag unn venyn, neb re bia klav gans liv goes nans o dewdhek blydhen, 26hag a wodhavsa lies tra gans lies medhek, ha spena oll hy fyth, heb bos difresys kammenn, saw yn le henna gyllys gweth o hi, 27pan glewas a Yesu, hi a dheuth a-dryv y'n routh ha tochya y vantell. 28Rag hi a leveris, ‘Mar kallen y dochya, kyn na ve ma's y vantell, sawys vydhav.’ 29Hag a-dhesempis fenten hy goes a veu desyghys; ha hi a wodhva yn hy horf hy bos yaghhes a'n plag. 30Ha Yesu, ow kodhvos desempis ynno y honan galloes dhe vos gyllys yn-mes anodho, a dreylyas y'n routh ha leverel, ‘Piw a dochyas ow dillas?’ 31Ha'y dhyskyblon a leveris dhodho ‘Ty a wel an routh orth dha waska, ha leverel, “Piw a wrug ow thochya?” ’ 32Hag ev a viras a-dro rag gweles neb re wrussa hemma. 33Mes an venyn, gans own hag ow krena, ow kodhvos pandr'a veu dhedhi gwrys, a dheuth ha koedha dhe'n dor a-ragdho, ha derivas dhodho an gwiryonedh oll. 34Hag yn-medh ev dhedhi, ‘Myrgh, dha fydh re'th sawyas; ke yn kres, ha bydh yagh a'th plag.’

35Hag ev hwath ow kewsel, y teuth yn-mes a ji rewler an synaga re a leveris ‘Dha vyrgh yw marow; prag yth ankombrydh an Mester pella?’ 36Mes Yesu, kettell glewas an ger o kewsys, a leveris dhe rewler an synaga, ‘Na borth own, unnweyth krys.’ 37Ha ny asas dhe dhenvyth y holya, saw unnsel Peder ha Jamys ha Yowann broder Jamys. 38Hag i a dheuth dhe ji rewler an synaga, hag ev a welas deray, ha tus owth oela hag ow kyni yn feur, 39ha pan o devedhys a-ji, ev a leveris dhedha, ‘Prag yth esowgh hwi ow kul tros hag owth oela? Nyns yw an flogh marow, mes ow koska yma.’ 40Hag i a'n skornyas. Mes wosa ev dh'aga gorra yn-mes yn kettep penn, ev a gemmeras ganso tas an flogh, ha'y mamm, ha'n re esa ganso, ha mos a-ji dhe'n tyller mayth esa an flogh a'y growedh.5:40 War-lergh re a'n dornskrifow nyns usi omma an geryow a'y growedh. 41Hag ow kemmeres an flogh er an leuv, ev a leveris dhedhi, ‘Talitha kumi’, dhe styrya yw, ‘Moren, y lavarav dhis, sav!’ 42Hag a-dhesempis an voren a sevis yn-bann, ha kerdhes; rag dewdhek bloedh o hi. Ha sowdhenys ens i gans marth bras. 43Ev a erghis dhedha yn straght ma na dal denvyth godhvos a hemma; hag ev a worhemmynnis may fe res dhedhi dhe dhybri.