Hengov an Henavogyon

Mat 15:1-20

1Hag y teuth war-barth dhodho an Fariseow, ha re a'n skribys, devedhys a Yerusalem. 2Hag i a welas re a'y dhyskyblon ow tybri bara gans diwla defolys, henn yw, heb aga golghi 3– rag an Fariseow hag oll an Yedhewon, marnas i a wolgh aga diwla dour, ny dhebrons, ow kwitha hengov an henavogyon; 4ha pan dheffons a'n varghasla, marnas i a omwolgh, ny dhebrons; ha lies tra arall yma, re dhegemmersons ha gwitha: golghi hanafow ha pychers ha lestri a vrest ha gweliow.7:4 War-lergh re a'n dornskrifow nyns usi omma an geryow ha gweliow. 5Ha'n Fariseow ha'n skribys a wovynnas orto, ‘Prag na wra dha dhyskyblon kerdhes war-lergh hengov an henavogyon, mes dybri bara, defolys aga diwla?’ 6Mes ev a worthybis dhedha, ‘Yn ta y profoesas Ysay ahanowgh hwi, an falswesyon, dell yw skrifys:

“An bobel ma a'm enor gans aga diwweus,

mes pell yw aga holonn a-dhiworthiv;

7yn euver i a'm gordh,

ow tyski avel dyskas gorhemmynnow tus.”

8Ha hwi, ow korra dhe denewen gorhemmynn Duw, a with hengov tus.’7:8 War-lergh re a'n dornskrifow yma omma kepar ha golghi pychers ha hanafow; ha lies tra arall a'n par na hwi a wra.

9Hag ev a leveris dhedha, ‘Yn ta y hwrewgh nagha gorhemmynn Duw, may hyllowgh gwitha agas hengov agas honan! 10Rag Moyses a leveris, “Enor dha das ha'th vamm”; ha, “Neb a villikko y das po y vamm, bedhes gorrys dhe'n mernans.” 11Mes hwi a lever, mar lever den dh'y das po dh'y vamm, “Korban (henn yw, ro sakrys) yw pypynag a gaffes dhiworthiv”, 12ena ny'n gesowgh dhe wruthyl tra vytholl rag y das na'y vamm, 13ha hwi a dhile ger Duw der agas hengov re resowgh; ha hwi a wra lies tra a'n par na.’

14Ha wosa ev dhe elwel an routh dhodho arta, yn-medh ev dhedha, ‘Goslowewgh orthiv yn kettep penn, ha konvedhewgh. 15Nyns eus tra a'n tu a-ves dhe dhen, owth entra dhodho, a yll y dhefola, mes yth yw an taklow a dheu yn-mes anodho hag a wra defola an den. 16Seul a'n jeffo diwskovarn rag klewes, ev klewes.’7:16 Nyns usi an wers ma yn re a'n dornskrifow.

17Ha pan dheuth a-bervedh y'n chi a-dhiworth an routh, y dhyskyblon a wovynnas orto a-dro dhe'n barabolenn. 18Hag yn-medh ev dhedha, ‘Owgh hwi yndella heb konvedhes, hwi ynwedh? A ny gonvedhowgh, na yll defola den travyth a enter dhodho a'n tu a-ves, 19rag ny enter dh'y golonn, mes dh'y golodhyon, ha mos yn-mes y'n kawghti?’ Yndella ev a dheklaryas oll an boesow dhe vos glan. 20Hag yn-medh ev, ‘An pyth a dheu yn-mes a'n den, henna a wra defola an den. 21Rag a'n tu a-bervedh, yn-mes a golonn tus, y teu drokprederow: fornikasyon, ladrans, denladh: 22avoutri, krefni, sherewneth, falsuri, drokhwans direwl, tebel-lagas, blasfemi, goeth, follneth; 23oll an drogow ma a dheu a'n tu a-bervedh, hag a dhefol an den.’

Fydh an Venyn a Syrofenikia

Mat 15:21-28

24Hag ev a sevis a'n tyller na ha mos yn oryon Tyr ha Sidon,7:24 War-lergh re a'n dornskrifow nyns usi omma an geryow ha Sidon. hag entra dhe ji, ha ny vynnsa bos godhvedhys henna gans denvyth oll; mes ny ylli pesya kudhys; 25rag dison unn venyn, ma's teva hy myrgh vyghan spyrys avlan, a glewas son anodho, hag a dheuth ha koedha orth y dreys. 26An venyn o Grek, Syrofenikek hy henedhel; ha hi a'n pysis may hwrella tewlel yn-mes an jowl a'y myrgh. 27Mes ev a leveris dhedhi, ‘Gas an fleghes dhe vos lenwys kynsa, rag nyns yw da kemmeres bara an fleghes, ha'y dewlel dhe'n keun.’ 28Ha hi a worthybis ha leverel dhodho, ‘Ya,7:28 War-lergh re a'n dornskrifow nyns usi omma an ger Ya. Arloedh; hwath an keun yn-dann an voes a dheber brewyon an fleghes.’ 29Hag ev a leveris dhedhi, ‘Rag an lavar ma ke war dha hyns; gallas an jowl yn-mes a'th vyrgh.’ 30Ha hi pan o devedhys dh'y chi, a gavas hy myrgh a'y growedh war an gweli, ha'n jowl gyllys mes.7:30 a gavas hy myrgh a'y growedh war an gweli, ha'n jowl gyllys mes: War-lergh re a'n dornskrifow a gavas yth o gyllys an jowl, ha'n vyrgh a'y growedh war an gweli.

Yaghheans Den Bodhar hag Avlavar

31Ha mos a wrug arta dhiworth oryon Tyr, ha dos dre Sidon dhe vor Galile, bys yn oryon Dekapolis. 32Hag i a dhros dhodho onan o bodhar hag avlavar;7:32 avlavar: Greka heb an galloes a gewsel yn ewn. hag i a'n pysis a worra y leuv warnodho. 33Hag ev a'n kemmeras a-denewen yn-mes a'n routh, hag a worras y vysies yn y dhiwskovarn, hag a drewas, ha tochya y daves; 34hag ow mires war-vann troha nev, ev a hanasas, ha leverel dhodho, ‘Effatha’, henn yw, ‘Bydh igerys.’ 35Ha dihwans y dhiwskovarn a veu igerys, ha kolm y daves a veu digelmys, hag ev a gewsis yn ewn. 36Hag ev a erghis dhedha na lavarrens dhe dhenvyth; mes seul voy yth esa owth erghi dhedha dhe voy hwath i a'n dylli. 37Hag yth o dhedha marth dres eghenn, hag yn-medhons, ‘Ev re wrug pup-tra yn fas; ev a wra dhe'n re vodhar klewes, ha dhe'n re avlavar kewsel.’