Treusfigurans Krist

Mat 17:1-13; Luk 9:28-36

1Hag ev a leveris dhedha, ‘Yn hwir y lavarav dhywgh, bos rann an re usi ow sevel omma, na vydhons ow tastya mernans, kyns i dhe weles gwlaskor Duw devedhys gans nerth.’

2Ha wosa hwegh dydh, Yesu a gemmeras ganso Peder, ha Jamys ha Yowann, ha'ga hembronk yn-bann yn menydh ughel, yn priva, aga honan; hag y feu treusfigurys a-ragdha. 3Ha'y dhillas a dhewynnyas yn pur wynn, yn fordh ma na ylli troghyer vyth war an nor aga hanna. 4Hag yth omdhiskwedhas dhedha Elias gans Moyses, hag yth esens ow keskewsel gans Yesu. 5Ha Peder a worthybis ha leverel dhe Yesu, ‘Mester, da yw ni dhe vos omma; ha gwren ni gul teyr skovva, onan dhiso jy, hag onan dhe Moyses, hag onan dhe Elias.’ 6Rag ny wodhva pandra dhe leverel, rag own bras a's teva. 7Hag y teuth kommolenn ha tewlel skeus warnedha; ha lev a dheuth yn-mes a'n gommolenn, ‘Hemm yw ow Mab karadow: klewewgh ev.’ 8Ha desempis, wosa i dhe vires a-derdro, ny welsons denvyth namoy, saw unnsel Yesu gansa.

9Ha pan esens ow tos yn-nans a'n menydh, ev a erghis dhedha ma na wrellens derivas dhe dhenvyth an taklow a welsens, bys pan ve Mab an den dasserghys a'n re varow. 10Hag i a withas an lavar dhedha aga honan, ow kovynn an eyl orth y gila pandra ve styr dasserghyans a'n re varow. 11Hag i a wovynnas orto ow leverel, ‘Prag y lever an skribys bos res dhe Elias dos kynsa?’ 12Mes ev a leveris dhedha, ‘Elias dhe wir a dheu kynsa ha restorya pub tra; fatell ytho yw skrifys a Vab an den ev dhe wodhevel lies tra ha bos dispresys? 13Mes my a lever dhywgh, bos Elias dhe wir devedhys, hag i re wrug dhodho pypynag oll a vynnens, kepar dell yw skrifys anodho.’

Yaghheans Mab gans Spyrys Avlan

Mat 17:14-20; Luk 9:37-43

14Ha pan dheuthons dhe'n dhyskyblon, i a welas9:14 Ha pan dheuthons dhe'n dhyskyblon, i a welas: War-lergh re a'n dornskrifow Ha pan dheuth dhe'n dhyskyblon ev a welas. routh veur yn aga hyrghynn, ha skribys ow tisputya orta. 15Hag a-dhesempis oll an routh, pan y'n gwelsons, o sowdhenys meur, ha poenya a wrussons bys dhodho ha'y salusi. 16Hag ev a wovynnas orta, ‘Pandr'a dhisputyowgh hwi orta?’ 17Ha nebonan a'n routh a worthybis dhodho, ‘Mester, my re dhros dhis ow mab, hag ynno spyrys avlavar, 18ha plepynag y talghenn ynno, ev a'n deghes dhe'n dor, hag ev a ewyn, ha deskerni gans y dhyns ha dos ha bos diwedhyn; ha my a leveris dhe'th dyskyblon ma'n towllens mes, ha ny allsons.’ 19Mes ev a worthybis dhedha ha leverel, ‘A henedh diskryjyk, pes termyn y fydhav vy genowgh? Pes termyn y hwrav agas perthi? Drewgh e dhymm.’ 20Hag i a'n dros dhodho. Ha pan y'n gwelas, desempis an spyrys a ros dhodho shora hag ev a goedhas dhe'n dor, ha rolya a-dro, owth ewyni. 21Hag ev a wovynnas orth y das, ‘Pes termyn yth yw a-ban dheuth hemma dhodho?’ Hag ev a leveris, ‘A-dhia y flogholeth; 22ha lieskweyth ev re'n tewlis yn tan hag yn dowrow rag y dhistrui; mes ty, mar kyllydh gul neppyth, kemmer truedh ahanan, ha gweres dhyn ni.’ 23Ha Yesu a leveris dhodho, ‘Mar kyllydh? Pup-tra9:23 Mar kyllydh? Pup-tra yw possybyl: War-lergh re a'n dornskrifow Mar kyllydh krysi, pup-tra yw possybyl. yw possybyl dhe neb a grysso.’ 24Hag a-dhesempis tas an flogh a grias gans dagrow9:24 War-lergh re a'n dornskrifow nyns usi omma an geryow gans dagrow. ha leverel, ‘Arloedh, my a grys: ty gweres ow diskryjyans.’ 25Mes pan welas Yesu routh dhe boenya war-barth, ev a rebukyas an spyrys avlan, ow leverel dhodho, ‘Ty spyrys avlavar ha bodhar, my a ergh dhis, deus yn-mes anodho, ha na wra mos ynno namoy.’ 26Ha'n spyrys a grias, hag a ros dhodho lies shora, hag a dheuth yn-mes; hag y feu avel onan marow, may hwrug lies leverel, ‘Marow ywa.’ 27Mes Yesu a'n kemmeras er an leuv ha'y dhrehevel, hag ev a sevis yn-bann. 28Ha pan ova devedhys y'n chi, y dhyskyblon a wovynnas orto yn priva ‘Prag na yllsyn ni y dewlel yn-mes?’ 29Hag ev a leveris dhedha, ‘Kammenn na yll an eghenn ma dos yn-mes marnas dre bysi ha penys.’9:29 War-lergh re a'n dornskrifow nyns usi omma an geryow ha penys.

Yesu a Dhargan Arta y Vernans ha'y Dhasserghyans

Mat 17:22-23; Luk 9:43-45

30Hag i eth alena ha tremena dre Alile; hag ev ny vynna denvyth dhe wodhvos henna. 31Rag ev a dhyski y dhyskyblon ha leverel dhedha, ‘Mab an den a vydh daskorrys yntra diwla tus, hag y hwrons y ladha, ha wosa bos ledhys, ev a dhassergh wosa trydydh.’9:31 wosa trydydh: War-lergh re a'n dornskrifow y'n tressa dydh. 32Mes ny gonvedhens an lavar, hag own a's teva a wovynn orto.

Piw Yw an Brassa?

Mat 18:1-5; Luk 9:46-48

33Hag ev a dheuth9:33 ev a dheuth: War-lergh re a'n dornskrifow i a dheuth. dhe Kapernaum; ha pan esa y'n chi ev a wovynnas orta, ‘Pyth esewgh orth y dhisputya war an fordh?’ 34Mes i a dewis; rag war an fordh i re bia ow tisputya yntredha piw a vedha moyha. 35Hag ev a esedhas ha gelwel an dewdhek ha leverel dhedha, ‘Mara mynn neb den bos kynsa, ev a vydh an diwettha oll, ha servont dhe bub den oll.’ 36Hag ev a gemmeras flogh ha'y settya yn aga mysk, ha wosa y gemmeres ev yn y dhiwvregh, ev a leveris dhedha, 37‘Piwpynag a dhegemmerro onan a'n fleghes a'n par ma yn ow hanow vy, a'm degemmer vy, ha piwpynag a'm degemmerro, ny'm degemmer vy, saw ev neb a'm dannvonas.’

Neb na Vo er agan Pynn, ragon Ni yth Yw

Luk 9:49-50

38Yowann a leveris dhodho, ‘Mester, ni a welas nebonan ow tewlel mes dywolow y'th hanow jy; ha ni a'n lettyas drefenn na wre agan holya.’ 39Mes Yesu a leveris, ‘Na'n lettyewgh ev; rag nyns eus denvyth a wra marthusyon yn ow hanow vy hag a yll a verr spys kewsel drog ahanav. 40Rag neb na vo er agan pynn ni, ragon ni9:40 er agan pynn ni, ragon ni: War-lergh re a'n dornskrifow er agas pynn hwi, ragowgh hwi. yth yw. 41Rag piwpynag a rollo dhywgh hanafas a dhowr dhe eva y'm hanow vy, drefenn agas bos dhe Grist,9:41 hanafas a dhowr dhe eva y'm hanow vy, drefenn agas bos dhe Grist: War-lergh re a'n dornskrifow hanafas a dhowr dhe eva rag hwi dhe vos yn hanow Krist. yn hwir y lavarav dhywgh, kammenn na gyll y wober.

Temptyans dhe Begh

Mat 18:6-9; Luk 17:1-2

42‘Ha piwpynag a wrello dhe onan a'n re vyghan ma trebuchya, neb a grys ynnov vy, gwell via dhodho mar pe kregys men-melin meur a-dro dh'y gonna, ha'y vos tewlys y'n mor. 43Ha'th leuv mar kwra dhis trebuchya, trogh hi mes; gwell yw dhis entra mans dhe vewnans, ages mos yn ifarn9:43 ifarn: Greka Gehenna. ha genes diw leuv, y'n tan nevra na vydh difeudhys, 44le na verow aga fryv i, ha ny vydh an tan difeudhys.9:44 Nyns usi an wers ma yn re a'n dornskrifow. 45Ha'th troes mar kwra dhis trebuchya, trogh ev mes; gwell yw dhis entra dhe vewnans evredhek, ages bos tewlys yn ifarn, ha genes dew droes, y'n tan nevra na vydh difeudhys,9:45 War-lergh re a'n dornskrifow nyns usi omma an geryow y'n tan nevra na vydh difeudhys. 46le na verow aga fryv i, ha'n tan ny vydh difeudhys.9:46 Nyns usi an wers ma yn re a'n dornskrifow. 47Ha'th lagas mar kwra dha sklandra, tenn ev mes; gwell yw dhis entra dhe wlaskor Duw unnlagasek, ages bos tewlys yn tan ifarn9:47 yn tan ifarn: Greka y'n Gehenna a dan. ha genes dew lagas, 48le na verow aga fryv, ha'n tan ny vydh difeudhys.

49‘Rag pub den a vydh sellys gans tan, ha pub sakrifis a vydh sellys gans hoelan.9:49 War-lergh re a'n dornskrifow nyns usi omma an geryow ha pub sakrifis a vydh sellys gans hoelan. 50Hoelan yw da; mes mar teu an hoelan ha bos heb blas, gans pandra y fydh ev sawrys? Bedhes genowgh hoelan ynnowgh agas honan, ha bedhes genowgh kres, an eyl gans y gila.’