Aghskrif Yesu Krist

Luk 3:23-38

1Lyver linyeth Yesu Krist mab Davydh mab Abraham.

2Abraham a dhineythis Ysak, hag Ysak a dhineythis Yakob, ha Yakob a dhineythis Yuda ha'y vreder ev, 3ha Yuda a dhineythis Peres ha Zera a Thamar, ha Peres a dhineythis Hesron, ha Hesron a dhineythis Aram, 4hag Aram a dhineythis Amminadab, hag Amminadab a dhineythis Nahshon, ha Nahshon a dhineythis Salmon, 5ha Salmon a dhineythis Boaz a Rahab, ha Boaz a dhineythis Obed1:5 Obed: Greka Yobed. a Ruth, hag Obed a dhineythis Yesse, 6ha Yesse a dhineythis Davydh an myghtern. Ha Davydh a dhineythis Solomon a wreg Urri, 7ha Solomon a dhineythis Roboam, ha Roboam a dhineythis Abia, hag Abia a dhineythis Asaf,1:7 Asaf: War-lergh re a'n dornskrifow Asa. 8hag Asaf a dhineythis Yehoshafat, ha Yehoshafat a dhineythis Yoram, ha Yoram a dhineythis Uzzia, 9hag Uzzia a dhineythis Yoatham, ha Yoatham a dhineythis Ahaz, hag Ahaz a dhineythis Hezekia, 10ha Hezekia a dhineythis Manasse, ha Manasse a dhineythis Amos,1:10 Amos: War-lergh re a'n dornskrifow Amon po Ammon. hag Amos a dhineythis Yosia, 11ha Yosia a dhineythis Yekonia ha'y vreder ev yn prys aga divroans dhe Babylon.

12Ha wosa an divroans dhe Babylon Yekonia a dhineythis Shealtiel, ha Shealtiel a dhineythis Zerubbabel, 13ha Zerubbabel a dhineythis Abiud, hag Abiud a dhineythis Elyakim, hag Elyakim a dhineythis Azor, 14hag Azor a dhineythis Sadok, ha Sadok a dhineythis Akim, hag Akim a dhineythis Eliud, 15hag Eliud a dhineythis Eleazar, hag Eleazar a dhineythis Matthan, ha Matthan a dhineythis Yakob, 16ha Yakob a dhineythis Yosep gour Maria, may feu gensi dineythys Yesu, yw gelwys Krist.

17Ytho oll an henedhow a Abraham bys Davydh o peswardhek henedh, hag a Davydh bys an divroans dhe Babylon o peswardhek henedh, hag a'n divroans dhe Babylon bys Krist o peswardhek henedh.

Dineythyans Yesu Krist

Luk 2:1-7

18Dineythyans Yesu Krist o yndellma. Pan via y vamm Maria ambosys dhe Yosep, kyns i dhe dhos war-barth, yth omgavas owth omdhoen der an Spyrys Sans. 19Ha Yosep hy gour, a-ban o den ewnhynsek, ha ny vynni gul bismer dhedhi, a erviras hy gorra a-denewen yn-dann gel. 20Hag ev owth ombrederi a-dro dhe'n taklow ma, awotta, el an Arloedh a omdhiskwedhas dhodho dre hunros, ow leverel, ‘Yosep mab Davydh, na borth own a gemmeres Maria yn gwreg dhis; rag an pyth usi omdhegys ynni yw der an Spyrys Sans. 21Ha hi a dhineyth mab, ha ty a'n henow Yesu; rag ev a saw y bobel dhiworth aga feghosow.’ 22Oll henna yw hwarvedhys may fo kollenwys an dra kewsys gans an Arloedh der an profoes, ow leverel,

23‘Awotta, an wyrghes a wra omdhoen ha dineythi mab

hag i a'n henow Emmanuel’,

yw dhe styrya, Genen ni Duw. 24Ha Yosep pan dhifunas a'y gosk a wrug par dell worhemmynnsa dhodho el an Arloedh hag a gemmeras y wreg dhodho ev, 25ha ny's aswonnis bys pan dhineythis hi mab;1:25 bys pan dhineythis hi mab: War-lergh re a'n dornskrifow bys pan dhineythis hi hy mab kynsa-genys. hag ev a'n henwis Yesu.