An Dewdhek Abostol

Mark 6:7-13; Luk 9:1-6

1Ena ev a elwis y dhewdhek abostol hag a ros dhedha galloes war spyrysyon avlan rag aga thewlel yn-mes ha yaghhe pub eghenn a gleves ha dises. 2Ottomma henwyn an dewdhek abostol: an kynsa, Simon, neb yw gelwys Peder, hag Androw y vroder, Jamys mab Zebede ha Yowann y vroder, 3Felip ha Bertyl, Tommas ha Matthew an toller, Jamys mab Alfeus, ha Thaddeus, 4Simon an Kananyas ha Yudas Skaryoth, neb a'n traytas.

Dannvon an Dewdhek

Mark 6:7-13; Luk 9:1-6

5An dewdhek ma Yesu a's dannvonas yn-mes ow ri charj dhedha ha leverel, ‘Na wrewgh mos yn fordh an Jentilys na dhe sita vydh a'n Samaritanys; 6mes kyns oll ewgh dhe dheves kellys chi Ysrael. 7Ha hwi war agas hyns, pregewthewgh ow leverel, “Gwlaskor nev re dheuth nes.” 8Yaghhewgh an glevyon, drehevewgh an re varow, glanhewgh an glavorogyon, tewlewgh yn-mes an dhywolow; heb kost y tegemmersowgh, rewgh heb kost. 9Na hwilewgh kavoes nag owr nag arghans na brest yn agas grogysyow, 10na skryp rag an hyns, na diw bows nag eskisyow na lorgh vytholl; rag an oberwas a dhervynn y voes. 11Hag yn py sita bynag po tre yth yllowgh, hwilewgh godhvos piw yw gwiw ena; hag ena trigewgh bys pan yllowgh yn-kerdh. 12Ha hwi ow mos a-bervedh yn chi, salusewgh ev; 13ha mars yw gwiw an chi, gwres agas kres dos warnodho, mes mar nyns yw gwiw, dehweles agas kres dhywgh hwi. 14Ha piwpynag na'gas degemmerro po na woslowo agas geryow, pan yllowgh yn-mes a'n chi po a'n sita na, shakyewgh an doust dhiworth agas treys. 15Yn hwir y lavarav dhywgh, esya vydh hi dhe bow Sodom ha Gomorra dydh breus ages dhe'n sita na.

Torment a Dheu

Mark 13:9-13; Luk 21:12-17

16‘Awotta, my a'gas dannvon yn-mes avel deves yn mysk bleydhi; rakhenna bedhewgh fur avel serf ha gwiryon avel kelemmi. 17Mes omwithewgh rag tus; rag i a'gas daskorr dhe gonselyow ha'gas skorjya yn aga synagys; 18ha hwi a vydh dres a-rag governours ha myghternedh a'm govis vy yn dustuni dhedha ha dhe'n Jentilys. 19Mes pan wrons agas daskorr na vedhewgh prederus fatell po pandr'a leverowgh; rag y fydh res dhywgh y'n eur na an dra y koedh dhywgh y leverel; 20rag nyns yw hwi a gews mes Spyrys agas Tas neb a gews ynnowgh. 21Broder a dhaskorr broder dhe'n mernans ha'n tas y flogh, ha fleghes a sev erbynn kerens ha gul dhedha bos ledhys. 22Ha hwi a vydh kesys gans pub den oll a-barth ow hanow, mes neb a dhur bys y'n diwedh, ev a vydh selwys. 23Pan y'gas helghyons y'n sita ma, fiewgh dhe onan arall; rag yn hwir y lavarav dhywgh, ny worfennowgh tremena dre sitys Ysrael kyns bos devedhys Mab an den.

24‘Nyns yw dyskybel a-ugh y vester na kethwas a-ugh y arloedh. 25Lowr yw dhe'n dyskybel y vos avel y vester, ha'n kethwas avel y arloedh. Mar kalwsons mester an chi Belzebul, pygemmys moy y vayni ev?

Neb yw Res Perthi Own Anodho

Luk 12:2-7

26‘Rakhenna na berthewgh own anedha; rag nyns eus travyth kudhys na vo diskudhys, po kelys na vo aswonnys. 27An dra a dherivav dhywgh y'n tewlder henna leverewgh y'n golow, ha'n dra a glewowgh hwystrys y'n skovarn gwrewgh y arma war bennow an chiow. 28Ha na berthewgh own a'n re a ladh an korf, mes na yll ladha an enev; mes kyns oll perthewgh own a neb a yll diswul ha'n enev ha'n korf yn ifarn.10:28 ifarn: Greka Gehenna. 29A nyns yw dew olvan gwerthys a unn ferdhynn?10:29 ferdhynn: Greka assarion. Mes nyns eus nagonan anedha a goedh dhe'n leur heb bodh agas Tas. 30Ha hwi – pub blewenn a'gas penn yw niverys. 31Na berthewgh own ytho; hwi a dal moy ages lies golvan.

Aswonn Krist a-dherag Tus

Luk 12:8-9

32‘Piwpynag ytho a'm aswonno a-rag tus, an keth den na my a'n aswonn a-rag ow Thas eus y'n nevow; 33ha piwpynag a'm denaggho a-rag tus, my ynwedh a'n denagh ev a-rag ow Thas eus y'n nevow.

Kledha, a-der Kres

Luk 12:51-53, 14:26-27

34‘Na dybewgh ow bos vy devedhys rag dannvon kres war an norvys; nyns ov devedhys rag dannvon kres saw kledha. 35Rag yth ov devedhys

rag settya den erbynn y das,

ha myrgh erbynn hy mamm,

ha gohydh erbynn hy hweger,

36hag eskerens den a vydh eseli y vayni y honan.

37Neb a gar tas po mamm moy agesov vy nyns yw gwiw dhymm, ha neb a gar mab po myrgh moy agesov vy nyns yw gwiw dhymm; 38ha'n den na gemmer y grows ha'm holya nyns yw gwiw dhymm. 39Neb a hwila kavoes y vewnans, ev a'n kyll, ha piwpynag a gollo y vewnans a'm govis vy, a'n kyv.

Gobrow

Mark 9:41

40‘Neb a'gas degemmer hwi, a'm degemmer vy, ha piwpynag a'm degemmerro vy a dhegemmer neb a'm dannvonas. 41Piwpynag a dhegemmerro profoes yn hanow profoes a gyv gober profoes; ha neb a dhegemmer den gwiryon yn hanow den gwiryon a gyv gober den gwiryon. 42Ha piwpynag a rollo unnweyth hanafas a dhowr yeyn dhe eva dhe onan a'n re vyghan ma, yn hanow dyskybel, yn hwir y lavarav dhywgh, kammenn ny gyll ev y wober.’