Kannasow dhiworth Yowann Besydhyer

Luk 7:18-35

1Ha pan worfennas Yesu y worhemmynnow dh'y dhewdhek dyskybel, ev a dremenas alena dhe dhyski ha dhe bregoth yn aga sitys. 2Ha pan glewas Yowann yn prison a-dro dhe oberow Krist, ev a dhannvonas dew a'y dhyskyblon11:2 a dhannvonas dew a'y dhyskyblon: War-lergh re a'n dornskrifow a dhannvonas der y dhyskyblon. 3dhe wovynn orto, ‘Yw ty an den a dal dos po ken onan a wortyn?’ 4Ha Yesu a worthybis ha leverel dhedha, ‘Ewgh dhe dherivas dhe Yowann an taklow a glewowgh hag a welowgh; 5dellyon a wel arta hag evredhyon a gerdh; klavorogyon yw glanhes, bodharyon a glew, ha tus varow yw drehevys, ha dhe voghosogyon an aweyl yw pregewthys; 6ha gwynn y vys neb na vo sklandrys ynnov vy.’ 7Ha pan ens i yn-kerdh, Yesu a dhallathas kewsel orth an routhow a-dro dhe Yowann, ‘Pandra ethewgh yn-mes dhe'n gwylvos dh'y weles? Korsenn kryghyllys gans an gwyns? 8Mes pandra ethewgh yn-mes dh'y weles? Den gwiskys yn dillas medhel? Otta, tus gwiskys yn dillas medhel, yn chiow myghternedh ymons. 9Mes pandra ethewgh yn-mes dhe weles? Profoes? Ya, yn-medhav dhywgh, ha moy ages profoes. 10Hemm yw neb may feu skrifys anodho,

“Awotta, my a dhannvon ow hannas a-rag dha fas,

neb a dharbar dha fordh a-dheragos.”

11Yn hwir y lavarav dhywgh: yn mysk an re genys a venynes ny sevis nagonan brassa ages Yowann Besydhyer; byttegyns an lyha yn gwlaskor nev yw brassa agesso ev. 12Mes dhiworth dydhyow Yowann Besydhyer bys lemmyn yma gwlaskor nev ow kodhevel garowder, ha tus a nell a's kemmer gans garowder. 13Rag oll an brofoesi ha'n lagha a wrug profoesa bys yn termyn Yowann; 14ha mar mynnowgh degemmeres hemma, ev yw Elias neb a dal dos. 15Neb a'n jeves diwskovarn rag klewes, ev klewes.

16‘Dhe bana dra y hwrav vy hevelebi an henedh ma? Haval yw dhe fleghes esedhys yn marghasvaow, ow karma an eyl dh'y gila 17ha leverel,

“Ni a bibas dhywgh ha ny wrussowgh donsya,

ni a ganas galargan11:17 ni a ganas galargan: War-lergh re a'n dornskrifow ni a ganas dhywgh galargan. ha ny wrussowgh oela.”

18Rag Yowann a dheuth heb dybri nag eva, hag yn-medhons, “Yma dyowl ganso”. 19Mab an den a dheuth ow tybri hag owth eva hag yn-medhons i, “Otta gargasenn ha penn-medhow, koweth tolloryon ha peghadoryon.” Mes furneth yw prevys ewn gans hy oberow.’11:19 gans hy oberow: War-lergh re a'n dornskrifow gans y fleghes.

Go-i an Sitys na Goedhas yn Edrek

Luk 10:13-15

20Ena ev a dhallathas keredhi an sitys may feu gwrys ynna i an brassa rann a'y oberow galloesek drefenn na goedhsons yn edrek: 21‘Go-jy Korasin! Go-jy Bethsada! rag mar pe gwrys yn Tyr ha Sidon an oberow galloesek a veu gwrys yn agas mysk, seuladhydh i a goedhsa yn edrek, yn yskar ha lusu. 22Mes yn-medhav dhywgh, y fydh moy perthadow rag Tyr ha Sidon dydh breus es dell vydh ragowgh hwi. 23Ha ty, Kapernaum,

a vydhydh ughelhes bys yn nev?

Ty a vydh iselhes bys yn ifarn.11:23 ifarn: Greka hades.

Rag mar pe gwrys yn Sodom an oberow galloesek a veu gwrys ynnos jy, hi a wrussa durya bys y'n jydh hedhyw. 24Byttegyns, y lavarav dhywgh, y fydh moy perthadow rag tir Sodom dydh breus es dell vydh ragos jy.’

Dewgh dhymmo Vy ha Powes

Luk 10:21-22

25Y'n prys na Yesu a worthybis ow leverel, ‘My a'th wormel, A Das, Arloedh nev ha nor, drefenn ty dhe gudha an taklow ma dhiworth an re fur ha skiansek ha'ga diskudha dhe fleghesigow; 26ya, A Das, rag yndella re beu dha vodh. 27Pup-tra oll a veu delivrys dhe'm charj gans ow Thas, ha denvyth ny aswonn an Mab saw an Tas, na ny aswonn denvyth an Tas saw an Mab ha neb may fynno an Mab y dhiskwedhes dhodho. 28Dewgh dhymmo vy oll hwi yw skwithys ha beghys poes, ha my a re powes dhywgh. 29Kemmerewgh ow yew warnowgh ha dyskewgh genev, rag klor yth ov hag uvel ow holonn, ha hwi a gyv powes dh'agas enev. 30Rag es yw ow yew ha skav yw ow begh.’