Terri Pennow-ys y'n Sabot

Mark 2:23-28; Luk 6:1-5

1Y'n prys na Yesu a dremenas der an ysegi y'n sabot; ha'y dhyskyblon a's teva nown, hag a dhallathas terri pennow an ys ha dybri. 2An Fariseow pan welsons a leveris dhodho, ‘Awotta dha dhyskyblon ow kul an dra nag yw lafyl y wul y'n sabot.’ 3Mes ev a leveris dhedha, ‘A ny redsowgh pandr'a wrug Davydh hag ev ow perthi nown, ev ha'n re esa ganso, 4fatell entras yn chi Duw ha dybri torthow an ragworrans nag o lafyl dhodho na dhe'n re esa ganso aga dybri, marnas dhe'n oferysi yn unnsel? 5Po a ny redsowgh y'n lagha bos an sabot terrys gans an oferysi y'n tempel ha'ga bos divlam? 6Mes my a lever dhywgh bos omma neppyth yw brassa ages an tempel. 7Ha mar kodhvewgh styr an lavar ma, “Ny vynnav sakrifis, mes tregeredh, ny wrussewgh ri breus erbynn an re dhivlam.” 8Rag Mab an den yw Arloedh an sabot.’

An Den Gwedhrys y Leuv

Mark 3:1-6; Luk 6:6-11

9Ha wosa ev dhe dremena alena, ev a dheuth dh'aga synaga. 10Hag awotta den, gwedhrys y leuv. Hag i a wovynnas orto, ow leverel, ‘Yw lafyl yaghhe y'n sabot?’ rag may hallens y guhudha. 11Mes ev a leveris dhedha, ‘Py den ahanowgh eus, hag unn dhavas ganso, mar koedh hi yn poll y'n sabot, na sett dalghenn ynni ha'y drehevel alena? 12Ytho, pygemmys moy a vri yw den ages davas! Rakhenna lafyl yw gul ober da y'n sabot.’ 13Ena yn-medh ev dhe'n den, ‘Ystynn dha leuv.’ Hag ev a's ystynnas ha hi a veu restorys, yagh avel hy ben. 14Ha'n Fariseow owth omdenna a omgusulyas er y bynn fatell allens y dhistrui.

An Gwas Dewisys

15Mes Yesu ow merkya hemma a omdennas alena; ha routhow bras a'n siwyas, hag ev a's yaghhas pubonan oll, 16ow korhemmynna dhedha na wrellens gul dhodho bos aswonnys yn apert, 17may fe kollenwys an dra menegys gans Ysay an profoes, ow leverel,

18‘Awotta ow gwas a dhewisis,

ow haradow mayth usi ynno ow delit;

my a worr ow spyrys warnodho

hag ev a dheriv breus dhe'n Jentilys.

19Ny wra strivya na garma,

na ny glew denvyth y lev y'n stretys.

20Korsenn vrewys ny's terr

na bubenn ow megi ny's difeudh,

erna dhokko ev ewnder dhe vudhogoleth,

21hag yn y hanow ev an Jentilys a's tevydh govenek.’

Yesu ha Belzebul

Mark 3:20-30; Luk 11:14-32, 12:10

22Ena y feu dres dhodho sagh dyowl, dall hag avlavar, hag ev a'n sawyas par may hylli an avlavar12:22 an avlavar: War-lergh re a'n dornskrifow an dall ha'n avlavar. kewsel ha gweles. 23Ha marth bras a'n jevo oll an routhow, hag yn-medhons, ‘A allsa hemma martesen bos mab Davydh?’ 24Mes an Fariseow pan y'n klewsons a leveris, ‘Ny dewl an den ma an dhywolow yn-mes saw dre Belzebul, pryns an dhywolow.’ 25Mes ev owth aswonn aga frederow a leveris, ‘Pub gwlaskor rynnys er hy fynn hy honan yw gwrys difeyth ha pub sita po chi rynnys er hy fynn hy honan ny sev. 26Ha Satnas mara tewl ev Satnas yn-mes, rynnys yw erbynn y honan; ytho fatell yll y wlaskor sevel? 27Ha mar towlav vy dywolow yn-mes dre Belzebul, dre biw y's tewl agas mebyon? Rakhenna y fydhons i agas breusysi. 28Mes mars yw dre Spyrys Duw y towlav vy dywolow yn-mes, ena gwlaskor Duw yw devedhys warnowgh. 29Po fatell yll nebonan mos a-bervedh yn chi den krev ha pylla y byth mar ny wra ev kyns oll kelmi an den krev hag ena pylla y ji? 30Neb nag yw genev, er ow fynn yma, ha neb na guntell genev, skoellya y hwra. 31Rakhenna, yn-medhav dhywgh: pub pegh ha blasfemi a vydh gevys dhe dus, mes blasfemi erbynn an Spyrys Sans ny vydh gevys. 32Ha piwpynag a gewsso ger erbynn Mab an den, dhodho y fydh gevys; mes piwpynag a gowsso erbynn an Spyrys Sans ny vydh gevys dhodho naneyl y'n oes ma nag y'n oes a dheu.

Gwydhenn ha'y Frut

Luk 6:43-45

33‘Poken gwrewgh an wydhenn dhe vos da ha'y frut da, po gwrewgh an wydhenn dhe vos podredhek ha'y frut podredhek, rag dre hy frut yth yw an wydhenn aswonnys. 34Hwi askorr nadres, fatell yllowgh leverel taklow da ha hwi ow pos drog? Rag yn-mes a lanwes an golonn y lever an ganow. 35An den da a dhre taklow da yn-mes a'y dresor da, ha'n drog dhen a dhre droktaklow yn-mes a'y dhroktresor. 36Hag yn-medhav dhywgh, pub lavar dibreder a gews tus, i a attal akont anodho dydh breus, 37rag herwydh dha lavarow y fydhydh akwitys ha herwydh dha lavarow y fydhydh dampnys.’

Hwila Tokyn

Mark 8:11-12; Luk 11:29-30

38Ena y hworthybis dhodho re a'n skribys ha'n Fariseow ow leverel, ‘Mester, ni a vynn gweles tokyn dhiworthis.’ 39Hag ev a worthybis dhedha, ‘Henedh drog hag avoutrek a hwila tokyn, ha ny vydh tokyn res dhodho saw tokyn Yona an profoes. 40Rag kepar dell esa Yona yn torr an morvil tri dydh ha teyr nos, yndella y fydh Mab an den tri dydh ha teyr nos yn kolonn an nor. 41Gwer Nineve a sev yn-bann y'n vreus gans an henedh ma ha'y dhampnya; rag i a goedhas yn edrek orth pregoth Yona, hag ottomma neppyth moy ages Yona. 42Myghternes an dhyghowbarth a sev y'n vreus gans an henedh ma ha'y dhampnya, rag hi a dheuth dhiworth pennow an bys dhe glewes furneth Solomon, hag ottomma neppyth yw moy ages Solomon.

Dehweles an Spyrys Avlan

Luk 11:24-26

43‘Peskweyth mayth ello spyrys avlan yn-mes a dhen, ev a dremen dre dylleryow sygh ow hwilas powesva ha ny's kyv. 44Ena yn-medh ev, “My a dhehwel dhe'm chi may teuth vy yn-mes anodho”; ha pan yw devedhys, ev a'n kyv gwag ha skubys ha tekhes. 45Ena yth a ha dri ganso seyth spyrys arall gweth agesso y honan, hag i ow mones a-bervedh, a drig ena; ha diwedh an den na yw gweth ages y dhalleth. Yndella ynwedh y fydh hi dhe'n henedh drog ma.’

Mamm ha Breder Yesu

Mark 3:31-35; Luk 8:19-21

46Hag ev ow kewsel orth an routhow, otta, yth esa y vamm ha'y vreder ow sevel a-ves hag ow hwilas kewsel orto. 47Ytho nebonan a leveris dhodho, ‘Ottomma dha vamm ha'th vreder ow sevel a-ves ha hwilas kewsel orthis.’12:47 Nyns usi an wers ma yn re a'n dornskrifow. 48Mes ev a worthybis ha leverel dhe'n den a dherivas henna dhodho, ‘Piw yw ow mamm ha piw yw ow breder?’ 49Hag owth ystynn i leuv war-tu ha'y dhyskyblon yn-medh ev, ‘Ottomma ow mamm ha'm breder, 50rag seul a wrello bodh ow Thas eus y'n nevow, an keth henna yw ow broder ha'm hwoer ha'm mamm.’