Parabolenn an Gonador

Mark 4:1-9; Luk 8:4-8

1Y'n jydh na, Yesu eth yn-mes a'n chi hag esedha ryb an mor; 2ha routhow bras a omguntellas dhodho; ytho ev eth a-bervedh yn gorhel hag esedha, hag oll an routh a sevis war an treth. 3Hag ev a dherivas dhedha lies tra dre barabolennow, ow leverel, ‘Yth eth yn-mes gonador dhe wonedh has. 4Hag ev ow konis, rann a'n has a goedhas ryb an fordh, ha'n ydhyn a dheuth ha'y devorya. 5Rann arall a goedhas war an veynek, le nag esa meur a dhor, hag a-dhihwans yth eginas drefenn nag esa dhedhi downder dor; 6ha pan o an howl drehevys, y feu goleskys; ha rag nag esa gwreydhenn dhedhi, y feu desyghys. 7Rann arall a goedhas yn mysk spern ha'n spern a devis ha'y thaga. 8Mes rann arall a goedhas war dir da hag a dhug trevas, rann kansplek, rann tri-ugensplek ha rann deg warn ugens. 9Neb a'n jeves diwskovarn,13:9 diwskovarn: War-lergh re a'n dornskrifow diwskovarn rag klewes. ev klewes.’ 10Ena y teuth dhodho an dhyskyblon ha leverel dhodho, ‘Prag y kewsydh orta dre barabolennow?’ 11Ev a worthybis ha leverel dhedha, ‘Dhy'hwi yth yw grontys aswonn kevrinyow gwlaskor nev, mes dhedha i nyns yw grontys. 12Rag neb a bewvo, dhodho ev y fydh res, hag ev a'n jevydh lanwes; mes neb na bewvo, y fydh kemmerys a-dhiworto ynwedh an pyth a bew. 13Rakhenna dre barabolennow y kowsav dhedha, rag “i a vir mes ny welons, hag i a woslow mes ny glewons na konvedhes.” 14Hag a-dro dhedha yma kollenwys profoesans Ysay neb a lever,

“Ow klewes y klewowgh, mes ny gonvedhowgh,

hag ow mires y firowgh, mes ny aswonnowgh,

15rag brys an bobel ma a veu gwrys talsogh

ha poes yw klewans aga diwskovarn

ha'ga lagasow re dhegesons,

ma na wellons gans aga lagasow,

na klewes gans aga skovornow

na konvedhes gans aga holonn ha treylya,

hag ytho my a wra aga sawya.”

16Mes gwynnvys agas lagasow hwi rag y hwelons, ha'gas skovornow hwi rag y klewons. 17Rag yn hwir y lavarav dhywgh, lies profoes ha den gwiryon re beu hwansek dhe weles an taklow a welowgh hwi mes ny welsons ha dhe glewes an taklow a glewowgh hwi mes ny glewsons.

Styr Parabolenn an Gonador

Mark 4:13-20; Luk 8:11-15

18‘Klewewgh ytho parabolenn an gonador: 19Pan glew nebonan ger an wlaskor heb y gonvedhes, an tebel el a dheu ha doen dhe-ves an dra yw hesys yn y golonn; hemm yw an dra hesys ryb an fordh. 20Mes an dra hesys war an veynek, ev yw neb a glew an ger ha dihwans a'n degemmer gans lowena. 21Byttegyns nyns eus ganso gwreydhenn ynno y honan hag ev ny bes saw pols byghan, ha pan dheffo trobel po helghyans drefenn an ger, ev a drebuch desempis. 22Ha'n dra hesys yn mysk spern, ev yw neb a glew an ger, mes fienasow an bys ha dynyans rychys a dag an ger hag ev ny dheg frut. 23Mes an dra hesys yn tir da, ev yw neb a glew an ger ha'y gonvedhes hag ev a dheg frut, re anedha ow ri kansplek, re tri-ugensplek ha re deg warn ugensplek.’

Parabolenn an Ivra yn mysk an Ys

24Ev a worras parabolenn arall a-ragdha, ow leverel, ‘Gwlaskor nev yw hevelebys dhe dhen a wonedhas has da yn y wel. 25Mes pan esa tus ow koska y teuth y eskar ha gonis ivra yn mysk an ys da hag ena mos yn-kerdh. 26Mes pan eginas an skyll ha doen greun, ena yth omdhiskwedhas an ivra ynwedh. 27Ha kethwesyon an tiek a dheuth ha leverel dhodho, “Syrra, a ny wruss'ta jy gonis has da y'th wel? Ytho a-ble kavas ivra?” 28Yn-medh ev dhedha, “Eskar re wrug henna.” Yn-medh an gethwesyon dhodho, “A vynn'ta jy mayth yllyn ha'ga huntell?” 29Mes yn-medh ev, “Na vynnav, rag own ha hwi ow kuntell an ivra, hwi a dhiwreydh an ys gansa. 30Gesewgh an dhew dhe devi war-barth bys y'n drevas hag yn prys an drevas my a lever dhe'n vysoryon, Kyns oll kuntellewgh war-barth an ivra ha'y gelmi yn manalow rag y leski, mes kuntellewgh an ys y'm skiber.” ’

Parabolennow Has Kedhow ha Goell

Mark 4:30-32; Luk 13:18-21

31Ev a worras parabolenn arall a-ragdha, ow leverel, ‘Gwlaskor nev yw haval dhe hasenn kedhow a wrug den hy hemmeres ha'y gorra yn y bark. 32Hi yw an byghanna a oll an hasennow, mes pan vo tevys, an brassa yw hi yn mysk oll an losow ha hi a dheu ha bos gwydhenn may teu ydhyn an ayr ha triga yn hy skorrennow.’

33Parabolenn arall y leveris dhedha: ‘Gwlaskor nev yw haval dhe woell, a gemmeras benyn ha'y gemmyska yn tri musur13:33 musur: Greka saton a vleus bys pan wrug dhe oll an toes sevel.’

Entent Parabolennow

Mark 4:33-34

34Yesu a leveris oll an taklow ma dhe'n routhow dre barabolennow, ha heb parabolennow nyns esa ow leverel dhedha travyth, 35may fe kollenwys an dra kewsys gans an profoes ow leverel,

‘My a iger ow ganow yn parabolennow,

my a dheriv taklow a veu kelys a-dhia fondyans an bys.’

Styryans Parabolenn an Ivra

36Ena Yesu a asas an routhow ha mos y'n chi. Ha'y dhyskyblon a dheuth dhodho ha leverel, ‘Ro dhyn ni styryans parabolenn ivra an gwel.’ 37Hag ev a worthybis, ow leverel, ‘Neb a wonedh an has da yw Mab an den, 38ha'n gwel yw an bys, ha'n has da yw mebyon an wlaskor; mes an ivra yw mebyon an tebel el, 39ha'n eskar neb a's gonedhas yw an jowl, ha'n drevas yw diwedh an oes, ha'n vysoryon yw eledh. 40Ytho kepar dell yw an ivra kuntellys ha leskys yn tan, yndella y fydh yn diwedh an oes. 41Mab an den a vynn dyllo y eledh hag i a guntell yn-mes a'y wlaskor pub acheson a drebuchya, ha'n re a wra anlaghedh, 42hag a's tewl yn fornes tan; ena y fydh oelva ha skrinva dyns. 43Ena y terlenter an re wiryon avel an howl yn gwlaskor aga Thas. Neb a'n jeves diwskovarn,13:43 diwskovarn: War-lergh re a'n dornskrifow diwskovarn rag klewes. ev klewes.

Teyr Farabolenn

44‘Arta,13:44 War-lergh re a'n dornskrifow nyns usi omma an ger arta. haval yw gwlaskor nev dhe dresor kelys yn gwel, ha den pan y'n kavas, a'n kudhas, hag yn y lowender, yth eth dhe wertha oll y byth ha prena an gwel na.

45‘Arta, gwlaskor nev yw haval dhe varghador eus ow hwilas perlys teg; 46ha pan gavas perl a bris meur yth eth ha gwertha oll a'n jeva hag a'n prenas.

47‘Arta, haval yw gwlaskor nev dhe roes tewlys y'n mor hag a guntellas pub eghenn a bysk.13:47 Y'n Greka nyns usi omma an geryow a bysk. 48Honna pan o hi leun, i a's tennas dhe'n treth ha wosa esedha i a guntellas an re da yn lestri, mes i a dewlis yn-mes an re podrek. 49Yndella y fydh hi yn diwedh an oes; an eledh a yn-rag ha ranna an re dhrog dhiworth an re wiryon, 50hag a's tewl yn fornes tan; ena y fydh oelva ha skrinva dyns.’

Tresoryow Nowydh ha Koth

51Yn-medh Yesu dhedha,13:51 War-lergh re a'n dornskrifow nyns usi omma an geryow Yn-medh Yesu dhedha. ‘A wrussowgh hwi konvedhes oll an lavarow ma?’ Yn-medhons dhodho, ‘Gwrussyn, Arloedh.’13:51 War-lergh re a'n dornskrifow nyns usi omma an ger Arloedh. 52Yn-medh ev dhedha, ‘Pub skriba, ytho, a veu dyskys rag gwlaskor nev yw haval dhe diek neb a denn yn-mes a'y withva taklow nowydh ha taklow koth.’

Yesu Neghys yn Nazareth

Mark 6:1-6; Luk 4:16-30

53Ha Yesu pan worfennsa an parabolennow ma a omdennas alena. 54Ha wosa ev dhe dhos dh'y vro y honan, ev a's dyskas yn aga synaga, par mayth esa marth dhedha, hag yn-medhons, ‘A-ble kavas hemma an furneth ma ha'n oberow barthusek ma? 55A nyns yw hemma mab an ser prenn? A nyns yw y vamm henwys Maria, ha'y vreder Jamys ha Yosep13:55 Yosep: War-lergh re a'n dornskrifow Yoses. ha Simon ha Yudas? 56Ha'y hwerydh, a nyns esons i oll omma yn agan mysk? A ble ytho y kavas ev oll an taklow ma?’ 57Ha sklandrys ens i anodho. Mes Yesu a leveris dhedha, ‘Nyns yw profoes heb enor saw yn y vro y honan hag yn y ji y honan.’ 58Ha ny wrug ev meur a oberow galloesek ena drefenn aga diskryjyans.